ສອບຖາມບັນຫາກ່ຽວກັບລັດວິສາຫະກິດໄຟຟ້າລາວ
ການບໍລິການ
- ພາຍຫຼັງຊໍາລະຄ່າຕິດຕັ້ງໝໍ້ນັບໄຟໃໝ່ແມ່ນໃຊ້ໄລຍະເວລາເທົ່າໃດເຖິງຈະມາຕິດຕັ້ງໃຫ້ ?
- ສາຍດ່ວນ 1199 ຕິດຕໍ່ຍາກຫຼາຍ ໂທຍາມໃດສາຍບໍ່ວ່າງຕະຫຼອດ, ສາເຫດເປັນຍ້ອນຫຍັງ ?
- ການຊຳລະເງິນຄ່າກະແສໄຟຟ້າ ແມ່ນສາມາດຊຳລະຜ່ານຊ່ອງທາງໃດໄດ້ແດ່?
- ຍ້ອນຫຍັງ ເວລາມີບັນຫາໄຟຟ້າແລ້ວໂທແຈ້ງ ແຕ່ຜ່ານໄປ 2-3 ຊົ່ວໂມງກໍຍັງບໍ່ມາສ້ອມແປງ ແລະ ເປັນຫຍັງໄຟຟ້າດັບແຕ່ລະຄັ້ງ ຈຶ່ງໃຊ້ເວລາໃນການສ້ອມແປງດົນ ?
- ສາຍດ່ວນ 1199 ມີໜ້າທີ່ຫຍັງແດ່?
- ພະນັກງານຈົດເລກກົງເຕີໄຟແບບເດົາ ບໍ່ມາຈົດໂຕເລກທີ່ຖືກຕ້ອງລະອຽດ.
- ໝໍ້ນັບໄຟມີທັງໝົດຈັກປະເພດ? ມີຈັກຂະໜາດ?
- ຂໍໃຫ້ພະນັກງານກວດກາໝໍ້ນັບໄຟ ລົງກວດກາໃຫ້ທົ່ວທຸກຫຼັງຄາເຮືອນ.
ຕໍ່ກັບກະແສສັງຄົມທີ່ເກີດຂຶ້ນກ່ຽວກັບການບໍລິການ ລັດວິສາຫະກິດໄຟຟ້າລາວ ໄດ້ມີການຕິດຕາມ ແລະ ແກ້ໄຂແນວໃດເພື່ອສ້າງຄວາມເຊື່ອໝັ້ນໃຫ້ກັບຜູ້ຊົມໃຊ້ໄຟຟ້າ ກໍຄືແນວທາງນະໂຍບາຍຂອງພັກ ແລະ ລັດຖະບານ?
ວຽກງານບໍລິການຂອງພວກເຮົາປະກອບດ້ວຍ ທີມງານສ້ອມແປງໄຟສຸກເສີນ, ທີມງານຕິດຕັ້ງສ້ອມແປງ Hot line (ສ້ອມແປງໃນກໍລະນີສຸກເສີນ ບໍ່ໄດ້ມອດໄຟ), ທີມງານບໍລິການສາຍດ່ວນ (Call Center), ວຽກງານຈົດເລກໝໍ້ນັບໄຟ ແລະ ທີມງານອື່ນໆອີກຈໍານວນໜຶ່ງ ຊຶ່ງໄລຍະຜ່ານມາພວກເຮົາກໍ່ໄດ້ເອົາໃຈໃສ່ ເຮັດໜ້າທີ່ດ້ວຍຄວາມຮັບຜິດຊອບສູງ ເປັນຕົ້ນແມ່ນການບໍລິການແກ້ໄຂໄຟຕົກ-ໄຟມອດ ທີ່ເກີດຈາກຫຼາຍປັດໄຈ ເຊັ່ນ: ບັນຫາດ້ານເຕັກນິກ, ໄພທໍາມະຊາດ ແລະ ເຫດສຸດວິໄສອື່ນໆ. ແຕ່ກໍ່ຍອມຮັບວ່າບາງຄັ້ງຄາວ ການເຮັດໜ້າທີ່ກໍ່ຍັງມີຄວາມຊັກຊ້າ ໂດຍສະເພາະໃນຊ່ວງໄລຍະທີ່ໄພທໍາມະຊາດກະທົບຕໍ່ລະບົບສົ່ງ ແລະ ລະບົບຈໍາໜ່າຍເປັນວົງກວ້າງ.
- ຕໍ່ວຽກງານບໍລິການປະຊາຊົນ (ລູກຄ້າ), ພວກເຮົາໄດ້ເອົາໃຈໃສ່ປັບປຸງແກ້ໄຂວິທີການເຮັດວຽກເປັນແຕ່ລະໄລຍະ, ຊຶ່ງປັດຈຸບັນໄດ້ເອົາໃຈໃສ່ວຽກງານປັບປຸງປະຊາສໍາພັນ ເປັນຕົ້ນແມ່ນການປັບປຸງລະບົບບໍລິການສາຍດ່ວນໃຫ້ສາມາດໃຊ້ໄດ້ຢ່າງເປັນປົກກະຕິ ແລະ ຮອງຮັບຄູ່ສາຍຫຼາຍຂຶ້ນ. ພ້ອມນີ້, ກໍ່ໄດ້ເອົາໃຈໃສ່ລົງແກ້ໄຂຂໍ້ຂ້ອງໃຈຕາມສະຖານທີບ້ານເຮືອນຂອງ ພໍ່ແມ່ປະຊາຊົນ ທີ່ໄດ້ຮ້ອງຮຽນ ຫຼື ມີຂໍ້ສົງໃສ່ກ່ຽວກັບບັນຫາຕ່າງໆ ຂອງ ໄຟຟ້າລາວ.