ກອງປະຊຸມ The 2nd Meeting of Thai-Laos System to System Interconnection Working Group ລະຫວ່າງ ລັດວິສາຫະກິດໄຟຟ້າລາວ(ຟຟລ) ແລະ ການໄຟຟ້າຝ່າຍຜະລິດແຫ່ງປະເທດໄທ(ກຟຜ) ໄດ້ໄຂຂື້ນໃນວັນທີ 16 ທັນວາ 2016 ທີ່ຜ່ານມາ, ຢູ່ທີ່ແຂວງພູເກັດ ປະເທດໄທ. ໂດຍການເປັນປະທານຮ່ວມຂອງທ່ານ ດວງສີ ພາຣະຍົກ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ ກິດຈາ ສີພັດຕັງກູລະ ຮອງຜູ້ວ່າການ ການໄຟຟ້າຝ່າຍຜະລິດແຫ່ງປະເທດໄທ. ມີ ຄະນະຝ່າຍຄຸ້ມຄອງສາຍສົ່ງ-ສະຖານີ, ຫົວໜ້າພະແນກວາງແຜນສາຍສົ່ງ ຈາກກະຊວງພະລັງງານ ແລະ ບໍ່ແຮ່ ແລະ ພະນັກງານວິຊາການຂອງສອງພາກສ່ວນເຂົ້າຮ່ວມ.
ໃນກອງປະຊຸມດັ່ງກ່າວ ແມ່ນໄດ້ທວນຄືນເນື້ອໃນ ແລະ ຂໍ້ຄົງຄ້າງ ຈາກການປະຊຸມຄັ້ງທີ 1 ທີ່ຜ່ານມາ ລວມເຖິງແຜນໃນອະນາຄົດອັນໃກ້ ກ່ຽວກັບການປັບປຸງລະບົບຮັບ-ສົ່ງກະແສໄຟຟ້າ ເພື່ອໃຫ້ລະບົບໄຟຟ້າຂອງທັງສອງປະເທດ ມີສະຖຽນລະພາບ ແລະ ມີຄວາມໝັ້ນຄົງຄຽງຄູ່ກັນ. ຫາຈຸດເຊື່ອມຕໍ່ໃໝ່ ເພື່ອແລກປຽ່ນພະລັງງານໃຫ້ຫຼາຍຂື້ນ ລະຫວ່າງ 2 ປະເທດ, ປຶກສາຫາລືກ່ຽວກັບບັນຫາຂອງລະບົບສົ່ງ ທີ່ບໍ່ສອດຄ່ອງກັນ, ການກໍ່ສ້າງສາຍສົ່ງ-ສະຖານີໃໝ່ ຕາມເຂດຊາຍແດນຂອງທັງສອງປະເທດ ເພື່ອເຊື່ອມຫາກັນ, ຍົກລະ ດັບແຮງດັນຈາກ 115 Kv ເປັນ 230 Kv ແລະ ຈາກ 230 Kv ເປັນ 500 Kv, ກຳນົດຂອບເຂດເວລາ ຂອງການແລກປຽ່ນພະລັງງານໃນອະນາຄົດ ເພື່ອກຽມການຮອງຮັບພະລັງງານຈາກເຂື່ອນທີ່ກໍ່ສ້າງແລ້ວໃນອະນາຄົດ ແລະ ບັນຫາຂອງການກໍ່ສ້າງໂຄງການ ບາງໂຄງການທີ່ຍັງລ່າຊ້າຈາກຜູ້ຮັບເໝົາ, ຊຶ່ງມີການທົບທວນກ່ຽວກັບສັນຍາການແລກປ່ຽນພະລັງງານຂອງ 2 ປະເທດ, ພ້ອມທັງວາງແຜນແກ້ໄຂບັນຫາທີ່ອາດຈະເກີດຂຶ້ນໃນປີຕໍ່ໄປ, ນອກນັ້ນ ຟຟລ-ກຟຜ ຍັງໄດ້ຕົກລົງຈະສ້າງສາຍສົ່ງເພີ່ມຂຶ້ນ ເພື່ອຮັບປະກັນຄວາມມີສະຖຽນລະພາບຂອງລະບົບໄຟຟ້າທັງສອງປະເທດ ແລະ ບົບເຊື່ອມໂຍງລະຫວ່າງ ຟຟລ ແລະ ກຟຜ ໃນລັກສະນະລະບົບຕໍ່ລະບົບ ເຮັດໃຫ້ການສົ່ງອອກພະລັງງານມີປະສິດທິພາບ ແລະ ຄວາມໝັ້ນຄົງໃຫ້ຫຼາຍກວ່າເກົ່າ.