ລັດວິສາຫະກິດໄຟຟ້າລາວ ຮ່ວມກັບ ກະຊວງພະລັງງານ-ບໍ່ແຮ່ ຊີ້ແຈງ ກ່ຽວກັບບັນຫາໄຟຕົກ-ໄຟມອດ-ໄຟບໍພໍ, ວິທີແກ້ໄຂ ແລະ ແຜນຮອງຮັບໃນຕໍ່ຫນ້າ

17-05-2024.



 ໃນວັນທີ 17 ພຶດສະພາ 2024 ນີ້ ທີ່ຫ້ອງປະຊຸມກະຊວງພະລັງງານ ແລະ ບໍ່ແຮ່, ທ່ານ ຄໍາໂສ້ ກຸໂພຄໍາ ຫົວຫນ້າຫ້ອງການກະຊວງ ແລະ ທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ (ຟຟລ) ໄດ້ຮ່ວມກັນຈັດພິທີຖະແຫຼງຂ່າວກ່ຽວກັບສາຍເຫດທີ່ພາໃຫ້ເກີດໄຟຕົກ-ໄຟມອດ, ໄຟບໍພໍ, ໄຟໄໝ້ສາຍໄຟ ແລະ ໝໍ້ແປງ ຊຶ່ງເກີດມາຈາກສາເຫດຫຍັງແທ້? ພ້ອມທັງວິທີແກ້ໄຂ ແລະ ແຜນຮອງຮັບໃນຕໍ່ຫນ້າ; ຕໍ່ບັນຫາດັ່ງກ່າວ, ທ່ານຜູ້ອໍານວຍການໃຫຍ່ ຟຟລ ໄດ້ແຈ້ງໃຫ້ຊາບວ່າ: ໃນໄລຍະຜ່ານມາ ລັດວິສາຫະກິດໄຟຟ້າລາວ ໄດ້ລົງທຶນຢ່າງມະຫາສານສຸມໃສ່ວຽກງານການກໍ່ສ້າງລະບົບສາຍສົ່ງ-ສະຖານີໄຟຟ້າແຮງສູງ ແລະ ແຫຼ່ງຜະລິດໄຟຟ້າຈໍານວນໜຶ່ງເປັນຂອງຕົນເອງ ເພື່ອຮັບໃຊ້ການສະໜອງໄຟພາຍໃນໃຫ້ພຽງພໍ ຕາມແນວທາງນະໂຍບາຍຂອງລັດຖະບານວາງອອກ ແຕ່ລະໄລຍະ.

ສ່ວນວ່າ ລະບົບຈໍາໜ່າຍໄຟຟ້າທົ່ວປະເທດ ຍັງບໍ່ທັນມີການສຸມໃສ່ການລົງທຶນພັດທະນາເປັນໂຄງການພໍປານໃດ ມີແຕ່ນໍາໃຊ້ງົບປະມານບໍລິຫານປະຈໍາປີຂອງໄຟຟ້າລາວ ເຂົ້າໃນການບໍາລຸງຮັກສາ ແລະ ສ້ອມແປງ, ປ່ຽນຖ່າຍບາງອຸປະກອນຈໍານວນໜຶ່ງເທົ່ານັ້ນ; ນອກນັ້ນ, ສະພາບລະບົບຕາຂ່າຍໄຟຟ້າໃນຂອບເຂດທົ່ວປະເທດ ມີຄວາມຍາວໄກ (ເກີນມາດຕະຖານກໍານົດ) ລະບົບເກົ່າແກ່ເຊື່ອມໂຊມ, ເປ່ເພຕາມອາຍຸການໃຊ້ງານ. ຖ້າອີງໃສ່ມາດຕະຖານສາກົນກຳນົດ ລວງຍາວຕາຂ່າຍ 22 ກວ ທີ່ເຊື່ອມຕໍ່ອອກຈາກສະຖານີແຕ່ລະຈຸດ ແມ່ນບໍ່ເກີນ 22 ກິໂລແມັດ (ແຕ່ກົງກັນຂ້າມລະບົບຕາຂ່າຍຂອງ ຟຟລ ໃນຂອບເຂດທົ່ວປະເທດຫຼາຍຈຸດ ມີລວງຍາວສະເລ່ຍຫຼາຍກວ່າ 100 ກິໂລແມັດ) ເຮັດໃຫ້ບໍ່ມີຄວາມສະຖຽນລະພາບ ແລະ ເວລາເກີດເຫດການໄຟຕົກ-ໄຟມອດ ໃຊ້ເວລາດົນໃນການແກ້ໄຂສ້ອມແປງ.

ມາຮອດປັດຈຸບັນ ອີງໃສ່ສະພາບການຂະຫຍາຍຕົວເສດຖະກິດ-ສັງຄົມ ມີການພັດທະນາຢ່າງກ້າວກະໂດດ ເຊິ່ງສະແດງອອກສະຖິຕິການຊົມໃຊ້ໄຟຟ້າ ເພີ່ມຂຶ້ນໃນແຕ່ລະປີ ໂດຍສະເພາະປີນີ້ ເພີ່ມຂຶ້ນແບບກ້າວກະໂດດ ໃນທົ່ວປະເທດ (ສະເພາະນະຄອນຫຼວງວຽງຈັນ ເພີ່ມຂຶ້ນ ປະມານ 28%), ເນື່ອງຈາກສະພາບການຂອງໂລກຮ້ອນ ຜິດປົກກະຕິ, ບວກກັບສະພາບການລາຄານໍ້າມັນເຊື້ອໄຟ ມີການເໜັງຕີງບໍ່ປົກກະຕິ (ລາຄາສູງ) ເຮັດໃຫ້ປະຊາຊົນຫັນມາຊົມໃຊ້ລົດໄຟຟ້າ ປ່ຽນແທນລົດທີ່ນໍາໃຊ້ນໍ້າມັນ ຕາມແນວທາງຂອງລັດຖະບານວາງອອກ ມີທ່າອ່ຽງເພີ່ມຂຶ້ນໃນແຕ່ລະປີ ຈາກສະຖິຕິການນໍາເຂົ້າລົດໄຟຟ້າ ແຕ່ປີ 2019-2023 ມີທັງໝົດ 3.220 ຄັນ ແລະ ຄາດຄະເນຈະເພີ່ມຂຶ້ນເປັນ 500.000 ກວ່າຄັນ ໃນປີ 2030 (ຕາມຂໍ້ມູນຈາກກົມສົ່ງເສີມ ແລະ ປະຢັດພະລັງງານ).

ໃນໄລຍະມີການຊົມໃຊ້ໄຟຟ້າຫຼາຍ ຈະເຮັດໃຫ້ລະບົບຈໍາໜ່າຍຈຸດບໍລິເວນນັ້ນ ແລະ ເຂດໃກ້ຄຽງ ເກີດມີບັນຫາແຮງດັນຕົກ ຫຼື ໄຟຟ້າບໍ່ພໍໃຊ້ ເຊິ່ງເປັນສິ່ງທ້າທາຍໜຶ່ງ ຕໍ່ກັບລະບົບຈໍາໜ່າຍໄຟຟ້າຂອງໄຟຟ້າລາວ ກໍລະນີການເພີ່ມຂຶ້ນຂອງເຄື່ອງປັບອາກາດ ແລະການນໍາໃຊ້ເຄື່ອງສາກໃນເວລາດຽວກັນ ຈະສົ່ງຜົນກະທົບຕໍ່ລະບົບຈໍາໜ່າຍພາກທີ່ຢູ່ອາໄສ ຖ້າຫາກການສາກລົດໄຟຟ້າ EV ຈໍານວນຫຼາຍ ຈະເຮັດໃຫ້ການຊົມໃຊ້ກໍາລັງໝໍ້ແປງເຕັມ ຫຼື ເກີນກໍາລັງ ທີ່ຈະຈ່າຍໄຟໃຫ້ໄດ້ ເຮັດໃຫ້ເກີດມີກະແສໄຟຟ້າລັດວົງຈອນ(Over Load), ຄຽງຄູ່ກັນນັ້ນ ບັນຫາການຕິດຕັ້ງສາຍເກາະຫ້ອຍໂທລະຄົມ ແລະ ບັນດາອຸປະກອນສື່ສານຕ່າງໆ ທີ່ເກາະຫ້ອຍໃສ່ເສົາຕາຂ່າຍໄຟຟ້າເປັນຈຳນວນຫຼາຍ, ບໍ່ເປັນໄປຕາມມາດຕະຖານ (ມີສຸມສາຍເກາະຫ້ອຍຈໍານວນຫຼາຍ ທີ່ບໍ່ໄດ້ນໍາໃຊ້ ແຕ່ບໍ່ໄດ້ຮັບການຮື້ຖອນ) ສ່ຽງຕໍ່ເສົາຫັກ-ເສົາລົ້ມ ມີຄວາມສ່ຽງ ຕໍ່ເຫດອັກຄີໄພຕ່າງໆເກີດຂຶ້ນ ດັ່ງທີ່ພົບເຫັນໃນໄລຍະຜ່ານມາ.

ນອກຈາກນີ້, ແມ່ນເກີດຈາກປັດໄຈພາຍນອກ ໂດຍສະເພາະ ບັນຫາໄພທຳມະຊາດ, ພາຍຸລົມແຮງ ທີ່ກະທົບພັດເອົາວັດຖຸ ແລະ ສິ່ງປຸກສ້າງຕ່າງໆ ໄປພາດສາຍໃສ່ໄຟຫຼາຍຈຸດ ກໍ່ເປັນເຫດເຮັດໃຫ້ລະບົບໄຟຟ້າໄດ້ຮັບຄວາມເສຍຫາຍ ເປ່ເພ. ນອກຈາກນັ້ນອຸປະຕິເຫດ ທີ່ເກີດຈາກລົດຕໍາເສົາໄຟ ຕົ້ນໄມ້ລົ້ມຫັກທັບສາຍໄຟ, ເສົາໄຟລົ້ມ, ສາຍໄຟຂາດ ແລະ ໝໍ້ແປງໄຟຟ້າລະເບີດ ເຊິ່ງສະຖິຕິໄຟດັບ-ໄຟມອດ ພາກລະບົບຈຳໜ່າຍ ສະເພາະໃນນະຄອນຫຼວງວຽງຈັນ ເດືອນ 1-4/2024 ປະມານ 373 ຄັ້ງ ເຫັນວ່າຫຼາຍພໍສົມຄວນ ແລະ ເປັນສະຖິຕິໃໝ່ທີ່ເກີດຂຶ້ນ ເຊິ່ງລະບົບໄຟຟ້າພວກເຮົາບໍ່ເຄີຍມີມາກ່ອນ.

ກ່ຽວກັບບັນຫາ ໄຟຕົກ-ໄຟມອດ ການແກ້ໄຂແມ່ນໃຊ້ເວລາດົນແດ່ນັ້ນ; ທ່ານຜູ້ອໍານວຍການໃຫຍ່ ຜອ.ຟຟລ ວົງສະກຸນ ຍິ່ງຍົງ ໄດ້ຊີ້ໃຫ້ເຫັນວ່າ: ເຫດການໄຟຕົກ-ໄຟມອດມີຫຼາຍສາເຫດທັງໃນໂຕ ແລະ ນອກໂຕ ໂດຍຖ້າເຫດການໄຟຕົກ-ໄຟມອດ ເກີດຈາກລະບົບພາຍໃນຂອງໄຟຟ້າລາວ ບໍ່ວ່າຈະເປັນການມອດໄຟສຸກເສີນ, ບຳລຸງຮັກສາ, ສ້ອມແປງ, ປ່ຽນຖ່າຍອຸປະກອນ, ມອດໄຟໃຫ້ບັນດາບໍລິສັດ ຜູ້ປະກອບການກໍ່ສ້າງ ແລະ ຕິດຕັ້ງໄຟຟ້າ ເພື່ອຂະຫຍາຍການຊົມໃຊ້ໄຟຟ້າໃຫ້ກັບລູກຄ້າ ໃນກໍລະນີນີ້ ຟຟລ ຈະມີແຈ້ງການເປັນທາງການ ໂດຍຜ່ານສື່ອອນລາຍ ຫຼື ສ່ອງທາງແອັບພິເຄຊັນ, Facebook Page EDL LAO ຂອງ ຟຟລ ເພື່ອໃຫ້ລູກຄ້າໄດ້ຮັບຊາບຢ່າງທົ່ວເຖິງ ແລະ ແຜນການມອດໄຟຈະມີກຳ ນົດເວລາຢ່າງຊັດເຈນ ໃນການມອດໄຟແຕ່ລະຄັ້ງ.

ໃນກໍລະນີເກີດຈາກ ປັດໃຈພາຍນອກກະທົບໃສ່ລະບົບຂອງໄຟຟ້າລາວ ໂດຍສະເພາະເຫດການໄພພິບັດທາງທຳ ມະຊາດ ເຊັ່ນ: ພາຍຸ, ລົມແຮງ, ຝົນຕົກ, ຟ້າຜ່າ, ນໍ້າຖ້ວມ, ຕົ້ນໄມ້ຫັກລົ້ມທັບສາຍໄຟ, ສາຍໄຟຂາດ ຕໍ່ກັບບັນຫາເຫຼົ່ານີ້ ໄຟຟ້າລາວ ບໍ່ສາມາດຫຼີກລ່ຽງໄດ້ ທຸກບັນຫາທີ່ເກີດຂື້ນໄດ້ສ້າງຄວາມເສຍຫາຍ, ຜົນກະທົບຕໍ່ກັບໄຟຟ້າລາວ ແລະ ຜູ້ຊົມ ໃຊ້ໄຟຟ້າ. ການແກ້ໄຂບັນຫາດັ່ງກ່າວ ໃນໄລຍະຜ່ານມາ ໄຟຟ້າລາວ ໄດ້ສຸມໃສ່ທຸກເຫື່ອແຮງໃນການລະດົມພະນັກງງານພາຍໃນສາຂາ ຫຼື ສູນບໍລິການທີ່ໃກ້ຄຽງ ເພື່ອມາຊ່ວຍແກ້ໄຂເລັ່ງສ້ອມແປງລະບົບໄຟຟ້າ ໃຫ້ສາມາດກັບມາສະໜອງໄຟໃຫ້ກັບສັງຄົມໄດ້ເປັນປົກກະຕິໂດຍໄວ. ດັ່ງເຫດການທີ່ເກີດຂຶ້ນ ຢູ່ນະຄອນຫຼວງວຽງຈັນ ໃນໄລຍະ 2-3 ອາທິດ ຜ່ານມາ ເກີດມີພາຍຸລະດູຮ້ອນກະທົບໃສ່ຫຼາຍຕົວເມືອງໃນຂອບເຂດນະຄອນຫຼວງວຽງຈັນສົ່ງຜົນກະທົບໃຫ້ລະບົບໄຟຟ້າໄດ້ຮັບ ຄວາມເສຍຫາຍຈຳນວນຫຼາຍ ແລະ ເກີດເຫດການໄຟດັບ ເປັນບໍລິເວນກວ້າງ ເນື່ອງຈາກສາຍໄຟຖືກຕັດຂາດຫຼາຍຈຸດ, ເສົາຫັກ-ເສົາລົ້ມ, ອຸປະກອນເປ່ເພ ເສຍຫາຍຈຳນວນຫຼາຍ;

ຕໍ່ກັບເຫດການດັ່ງກ່າວ ອາດໃຊ້ເວລາດົນພໍສົມຄວນໃນການສ້ອມແປງແກ້ໄຂ ເກັບກູ້ລະບົບໃຫ້ສາມາດກັບມາສະໜອງໄຟເປັນປົກກະຕິ. ສະນັ້ນ, ຕໍ່ກັບເຫດການທີ່ເກີດຂື້ນໃນໄລຍະຜ່ານມາ ໃນນາມຄະນະພັກ, ຄະນະນໍາຜູ້ບໍລິຫານລັດວິສາຫະກິດໄຟຟ້າລາວ ພ້ອມດ້ວຍພະນັກງານ-ກຳມະກອນ ຂໍຮຽກຮ້ອງມາຍັງສັງຄົມ ຖ້າພົບເຫັນເຫດການໄຟຕົກ-ໄຟມອດ, ເຫດການໄຟຟ້າຂັດຂ້ອງຕ່າງໆ ຫຼື ປະກົດການຄົນລັກໄຟ ຂໍຄວາມກະລຸນາ ແຈ້ງມາຍັງສູນບໍລິການໃກ້ກັບບ້ານ-ເຮືອນຂອງທ່ານຜ່ານສາຍດ່ວນ 1199, EDL APP, Facebook Page EDL LAO ເພື່ອໃຫ້ໄຟຟ້າລາວ ສາມາດ ແກ້ໄຂບັນຫາໄດ້ຢ່າງທັນການ.

ໃນສະເພາະໜ້າ ແລະ ໄລຍະຍາວນັ້ນ, ລັດວິສາຫະກິດໄຟຟ້າລາວ ໄດ້ມີກົນໄກ, ແບບແຜນ ແລະ ແຜນການຮັບມືແກ້ໄຂໃຫ້ດີຂຶ້ນກ່ວາເກົ່າ ໂດຍໃນຜ່ານມາ ຟຟລ ໄດ້ມີການຄົ້ນຄວ້າຫຼາກຫຼາຍແນວທາງແກ້ໄຂ ລວມທັງໄດ້ມີການແລກປ່ຽນບົດຮຽນກັບປະເທດເພື່ອນບ້ານ ທີ່ມີປະສົບການ ແລະ ມີຜົນສໍາເລັດໃນການບໍລິຫານຈັດການລະບົບຈໍາໜ່າຍ ຢ່າງມີປະສິດທິຜົນ ເພື່ອຍົກສູງຂີດຄວາມສາມາດໃນການດໍາເນີນວຽກງານຄຸ້ມຄອງລະບົບຈໍາໜ່າຍຂອງໄຟຟ້າລາວ ໃຫ້ມີຄວາມຮັບປະກັນໃນການສະໜອງໄຟໃຫ້ກັບສັງຄົມ. ປັດຈຸບັນ ຟຟລ ໄດ້ສຸມໃສ່ວຽງານການບຳລຸງຮັກສາ, ປ່ຽນຖ່າຍອຸ ປະກອນເກົ່າແກ່, ເສີມກຳລັງໝໍ້ແປງ, ປ່ຽນສາຍຂະໜາດນ້ອຍເປັນສາຍຂະໜາດໃຫຍ່ ເພື່ອຍົກສູງການບໍລິການສະໜອງໄຟໃຫ້ກັບສັງຄົມ ທີ່ມີຄຸນນະພາບ ແລະ ພຽງພໍ ໃນແຕ່ລະໄລຍະ:

1. ສຸມໃສ່ວຽກງານການປັບປຸງລະບົບຈໍາໜ່າຍໃນຂອບເຂດທົ່ວປະເທດ ໂດຍສະເພາະ ນະຄອນຫຼວງວຽງຈັນ ໃຫ້ມີຄວາມຮັບປະກັນສູງຂຶ້ນ ເພື່ອຫຼຸດຜ່ອນບັນຫາແຮງດັນຕົກ (ໄຟບໍ່ພໍ) ໂດຍແນໃສ່ການປັບປຸງປ່ຽນສາຍຈາກສາຍຂະໜາດນ້ອຍ ເປັນສາຍຂະໜາດໃຫຍ່, ເສີມໝໍ້ແປງໄຟຟ້າ ເພື່ອໃຫ້ແທດເໝາະກັບສະພາບຂອງການຊົມ ໃຊ້ໄຟຟ້າຕົວຈິງໃນແຕ່ລະເຂດ ເຊິ່ງໃນປີ 2023 ຜ່ານມາໄດ້ສໍາເລັດການເສີມໝໍ້ແປງໄຟຟ້າ ລວມຈໍານວນທັງໝົດ 993 ໜ່ວຍ, ລວມກໍາລັງຕິດຕັ້ງໝໍ້ແປງໄຟຟ້າ ເພີ່ມຂຶ້ນທັງໝົດ 43.359 kVA ເພີ່ມຂຶ້ນຫຼາຍກວ່າ 50% ເມື່ອທຽບໃສ່ການຈັດຕັ້ງປະຕິບັດ ໃນປີ 2022 (ຈໍານວນ 440 ໜ່ວຍ, ເປັນກໍາລັງຕິດຕັ້ງ 27.565 kVA) ເຮັດໃຫ້ການສະໜອງໄຟມີຄວາມສະຖຽນລະພາບຂຶ້ນ ແລະ ຫຼຸດຜ່ອນບັນຫາແຮງດັນຕົກໄດ້ຫຼາຍໃນຂອບເຂດຕົວເມືອງ.

2. ສຳເລັດການຄົ້ນຄວ້າຮ່ວມກັບ ພາກສ່ວນກ່ຽວຂ້ອງຂອງລັດ ແລະ ບັນດາບໍລິສັດໂທລະຄົມຕ່າງໆ ໃນການອອກລະບຽບການເກາະຫ້ອຍສາຍໂທລະຄົມ ແລະ ອຸປະກອນສື່ສານ ໃສ່ລະບົບຕາຂ່າຍໄຟຟ້າ ໃຫ້ເປັນໄປຕາມມາດຕະຖານ ເພື່ອຮັບປະກັນຄວາມປອດໄພ ແລະ ຫຼີກລ່ຽງບັນຫາການເກີດອັກຄີໄພຄືໃນໄລຍະຜ່ານມາ.

3. ເລັ່ງຄົ້ນຄວ້າອອກລະບຽບການ ໃນການກໍານົດມາດຕະຖານການຕິດຕັ້ງສະຖານີສາກລົດໄຟຟ້າ (EV) ສໍາລັບທີ່ ຢູ່ອາໄສ, ອາຄານທີ່ພັກ ແລະ ສໍານັກງານອົງການຕ່າງໆ ເພື່ອກໍານົດເປັນຫຼັກການໃນການຈັດຕັ້ງປະຕິບັດໃຫ້ມີຄວາມສະດວກໃນການໃຊ້ງານເປັນໄປຕາມມາດຕະຖານກໍານົດ ແລະສືບຕໍ່ຄົ້ນຄວ້າຂໍ້ກໍານົດເງື່ອນໄຂການເຊື່ອມ ຕໍ່ສະຖານີສາກ ແລະ ເຄື່ອງສາກລົດໄຟຟ້າ ເຂົ້າກັບຕາຂ່າຍໄຟຟ້າ ຂອງ ຟຟລ ລວມທັງການກໍານົດກົນໄກດ້ານລາຄາແບບ (Time of Use) TOU ໂດຍການກໍານົດລາຄາຖືກໃນຊ່ວງເວລາທີ່ມີການຊົມໃຊ້ໄຟຟ້າບໍ່ສູງ Off-Peakເພື່ອເປັນການສົ່ງເສີມການຊົມໃຊ້ພະລັງງານໄຟຟ້າສໍາລັບການສາກລົດ EV ສໍາລັບທີ່ຢູ່ອາໄສ ສາມາດມີທາງເລືອກໃນການສາກຊ່ວງ Off-Peakໄດ້.

4. ປັດຈຸບັນນີ້ ຟຟລ ໄດ້ນຳສະເໜີ ລັດຖະບານເລັ່ງດ່ວນ ເພື່ອຂໍອະນຸມັດນຳໃຊ້ເງິນກູ້ຢືມຈຳນວນໜື່ງ ເພື່ອມາເລັ່ງປັບປຸງລະບົບຈຳໜ່າຍໄຟຟ້າໃນຂອບເຂດທົ່ວປະເທດ ໂດຍສະເພາະນະຄອນຫຼວງວຽງຈັນ ໃຫ້ມີຄວາມຮັບປະ ກັນ ຫຼຸດຜ່ອນບັນຫາໄຟຕົກ-ໄຟມອດ ໃຫ້ຫຼຸດໜ້ອຍຖອຍລົງ.