ຝ່າຍຄຸ້ມຄອງລະບົບໄຟຟ້າພາກກາງ ມີຜົນສໍາເລັດຫຼາຍດ້ານ

23-05-2024.



  ວັນທີ 23 ພຶດສະພາ 2024 ທີ່ສໍານັກງານໃຫຍ່ ລັດວິສາຫະກິດໄຟຟ້າລາວ (ຟຟລ) ໄດ້ຈັດກອງປະຊຸມ ຝ່າຍຄຸ້ມຄອງລະບົບໄຟຟ້າພາກກາງ ຂອງ ຟຟລ ໂດຍການໃຫ້ກຽດເປັນປະທານຂອງທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ ຟຟລ ພ້ອມຄະນະ ແລະ ມີຄະນະຝ່າຍ, ຄະນະສາຂາ, ຄະນະພະແນກ ແລະ ຜູ້ຊີ້ນໍາວຽກແຕ່ລະສາຂາ ເຂົ້າຮ່ວມ.

ໃນກອງປະຊຸມ; ທ່ານຫົວໜ້າຝ່າຍຄຸ້ມຄອງລະບົບໄຟຟ້າພາກກາງ ໄດ້ລາຍງານສະພາບພົ້ນເດັ່ນ ແລະແຜນການ ວຽກວິຊາສະເພາະ 6 ເດືອນທ້າຍ ປີ 2024 ໂດຍເລັ່ງໃສ່ວຽກງານການສະໜອງໄຟຟ້າຮັບໃຊ້ສັງຄົມ, ວຽກບຸກຄະລາກອນ, ວຽກງານດ້ານການເງິນ, ວຽກຫຼຸດຜ່ອນພະລັງງານຕົກເຮ່ຍ ຊຶ່ງປັດຈຸບັນ ຝ່າຍຄຸ້ມຄອງລະບົບໄຟຟ້າພາກກາງຄຸ້ມຄອງສາຍສົ່ງໄຟຟ້າແຮງສູງ 230 ກິໂລໂວນ 1,433.86 ກິໂລແມັດ ວົງຈອນ, ແຮງດັນສູງ 115 ກິໂລໂວນ 1,984.05 ກິໂລແມັດ ວົງຈອນ, ແຮງດັນກາງ 22 ກິໂລໂວນ 8,378.60 ກິໂລແມັດ ວົງຈອນ ແລະ ແຮງດັນຕໍ່າ 0,4 ກິໂລແມັດ ວົງຈອນ 6,264.62 ກິໂລແມັດ ວົງຈອນ; ຄຸ້ມຄອງ 32 ສະຖານີ ມີກໍາລັງຕິດຕັ້ງ 4,997 ເມກາວັດອໍາແປ, ມີໝໍ້ແປງແຮງດັນ 22 ກິໂລໂວນ 13,549 ໜ່ວຍ, ມີໝໍ້ນັບໄຟໃນການຄຸ້ມຄອງ 633,675 ໜ່ວຍ; ວຽກງານພະລັງງານຕົກເຮ່ຍ ສາ ມາດຈັດຕັ້ງໄດ້ 3,50% ມາເປັນ 2,10%(ໄຟຟ້າແຮງສູງ) ແລະ 9,57% ມາເປັນ 8,31% (ໄຟຟ້າພາກຈໍາໜ່າຍ); ວຽກງານລັກນໍາໃຊ້ກະແສໄຟຟ້າ ຈໍານວນ 13 ລູກຄ້າ ຄິດໄລ່ພະລັງງານຄືນຫຼັງ 189,074 ກິໂລວັດໂມງ, ຄິດໄລ່ເປັນມູນຄ່າ 265 ລ້ານກວ່າກີບ; ນອກຈາກນັ້ນ; ທີ່ປະຊຸມ ຍັງໄດ້ຍົກໃຫ້ເຫັນຫຼາຍບັນຫາເປັນຕົ້ນດ້ານບຸກຄະລາກອນ, ດ້ານອຸປະກອນທາງເຕັກນິກ ໂດຍສະເພາະ ໝໍ້ແປງໄຟຟ້າ ທີ່ຫຼາຍເຂດແມ່ນຮັບພະລັງງານເກີນ 80% ເນື່ອງຈາກວ່າ ໃນປີ 2024 ການຊົມໃຊ້ໄຟຟ້າ ແມ່ນມີຈັງຫວະກ້າວກະໂດດ ໂດຍສະເພາະ ນະຄອນຫຼວງວຽງຈັນ (ເພີ່ມຂື້ນ 28%) ຈຶ່ງເປັນສາເຫດໃຫ້ລະບົບໄຟຟ້າ ພາກຈໍາໜ່າຍ ເກີດມີໄຟຕົກໄຟມອດໃນໄລຍະອາກາດຮ້ອນ ຄຽງຄູ່ກັບທຸກບັນຫາທີ່ກ່າວມານັ້ນ ກອງປະຊຸມເຫັນດີເປັນເອກະພາບປັບປຸງແກ້ໄຂທຸກໜ້າວຽກຂອງທຸກສາຂາເພື່ອຮັບປະກັນຄວາມສະຖຽນດ້ານພະລັງງານຮັບໃຊ້ສັງຄົມ ຕອນທ້າຍ, ທ່ານປະທານກອງປະຊຸມ ກໍ່ໄດ້ມີທິດຊີ້ນໍາ ໃຫ້ແຕ່ລະສາຂາ ເອົາໃຈໃສ່ວຽກງານການບໍລິການໄຟ ຟ້າ ຫັນເປັນທັນສະໄໝ ແນໃສ່ເພື່ອຮັບໃຊ້ສັງຄົມໃຫ້ມີບາດກ້າວໃໝ່ ແລະ ດີລື່ນເກົ່າ ຕາມແນວທາງຂອງພັກ ແລະ ລັດຖະບານ.