ລັດວິສາຫະກິດໄຟຟ້າລາວ ສາຂາແຂວງຫຼວງນ້ຳທາ ກູ້ລະບົບຈຳໜ່າຍຢ່າງຮີບດ່ວນ

02-01-2020.



   ລະບົບຈຳໜ່າຍລັດວິສາຫະກິດໄຟຟ້າລາວ ທີ່ເມືອງສິງ ແຂວງຫຼວງນໍ້າທາ ໄດ້ຮັບຜົນກະທົບຈາກໄພທຳມະຊາດ ໃນຕອນເຊົ້າຂອງວັນທີ 29 ທັນວາ 2019 ທີ່ຜ່ານມາ ລັດວິສາຫະກິດໄຟຟ້າລາວ ສາຂາແຂວງຫຼວງນ້ຳທາໄດ້ລົງສ້ອມແປງຕາຂ່າຍໄຟຟ້າ 22ກິໂລໂວນ ເປ່ເພເສຍຫາຍ ຢູ່ເຂດ ບ້ານສໍ້ ຫາບ້ານ ນາຄຳ ເມືອງສີງ ແຂວງຫຼວງນ້ຳທາ ໂດຍການນຳພາຂອງ ທ່ານ ສີງຄຳ ເລີ່ງຮ່ວມເສືອງ ຮອງຫົວໜ້າລັດວິສາຫະກິດໄຟຟ້າລາວ ສາຂາແຂວງຫຼວງນໍ້າທາ ໄດ້ລົງສົມທົບກັບພະນັກງານ-ກຳມະກອນ ສູນບໍລິການໄຟຟ້າເມືອງສີງ ລົງສ້ອມແປງຕາຂ່າຍໄຟຟ້າເປ່ເພຢ່າງຮີບດ່ວນ ຍ້ອນໄດ້ຮັບຜົນກະທົບຈາກໄພທຳມະຊາດມີຝົນຕົກໜັກ, ລົມແຮງ ເຮັດໃຫ້ລະບົບຕາຂ່າຍໄຟຟ້າເປ່ເພເສຍຫາຍ ລະຫວ່າງ  ບ້ານ ສໍ້  ຫາ ບ້ານ ນາຄຳ ເມືອງສີງແຂວງຫຼວງນ້ຳທາ  ເຊີ່ງເຂດດັ່ງກ່າວຢູ່ໃກ້ກັບຊາຍແດນ ລາວ-ຈີນ ໄດ້ເຮັດໃຫ້ລະບົບຕາຂ່າຍໄຟຟ້າ 22 ກິໂລໂວນ ແລະ ຕາຂ່າຍ 0,4 ກິໂລໂວນ ຫັກລົມ ເປັນສາເຫດໃຫ້ ສອງບ້ານໃກ້ຄຽງບໍ່ມີໄຟຟ້າໃຊ້ ເພາະກະແສໄຟຟ້າໄດ້ຖືກຕັດ ຄື:ບ້ານ ສີລິມູນ, ບ້ານ ປຸງກອກ ເຊີ່ງຜົນເສຍຫາຍໃນຄັ້ງນີ້ປະກອບມີໝໍ້ແປງ 50 ກາເວອາ ຂອງເອກະຊົນ  2 ໜ່ວຍ ແລະ ມີເສົາ 12 ແມັດ ຫັກ ຈຳນວນ 4 ຕົ້ນ ເຊີ່ງມີຄວາມຍາວທັງໝົດ 0,34 ກິໂລແມັດ ດັ່ງນັ້ນລັດວິສາຫະກິດໄຟຟ້າລາວ ສາຂາແຂວງຫຼວງນໍ້າທາ ຈື່ງໄດ້ ສົມທົບກັບສູນບໍລິການໄຟຟ້າເມືອງສິງ ລົງສ້ອມແປງປ່ຽນຖ່າຍອຸປະກອນທີ່ເປ່ເພອອກ ແລະ ສາມາດກູ້ລະບົບໄດ້ໃນວັນດຽວກັນ ແລະ ສາມາດສົ່ງກະແສໄຟຟ້າໃຫ້ກັບປະຊາຊົນໄດ້ຊົມໃຊ້ໄຟຟ້າເປັນປົກກະຕິ. ລວມມູນຄ່າການເສຍຫາຍໃນຄັ້ງນີ້ 18 ລ້ານກວ່າກີບ.