ພິທີວາງສີລາລືກໂຄງການສະໜອງໄຟຟ້າໃຫ້ເສັ້ນທາງລົດໄຟລາວ-ຈີນ

31-12-2019.



  ໃນວັນທີ 30 ທັນວາ 2019, ຢູ່ທີ່ ບ້ານ ໂຄກສະອາດ ເມືອງໄຊຖານີ ນະຄອນຫຼວງວຽງຈັນ ໄດ້ມີພິທີວາງສີລາລືກໂຄງການສະໜອງໄຟຟ້າໃຫ້ເສັ້ນທາງລົດໄຟລາວ - ຈີນ ໂດຍການເປັນປະທານຂອງ ທ່ານ ທອງພັດ   ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ Jiang Zaidong, ເອກອັກຄະລັດຖະທູດຈີນປະຈຳລາວ, ທ່ານ Chen Yunpeng ຮອງປະທານບໍລິສັດ China Southern Power Grid ຈຳກັດ (CSG), ທ່ານ ບຸນອູ້ມ ສີວັນເພັງ ອໍານວຍການໃຫຍ່ລັດວິສາຫະກິດໄຟຟ້າລາວ, ທ່ານ Ding Xingzhong ຫົວໜ້າພະແນກພະລັງງານໄຟຟ້າແຂວງຢຸນນານ ພ້ອມທັ້ງພາກສ່ວນທີ່ກ່ຽວຂ້ອງທັ້ງສອງຝ່າຍເຂົ້າຮ່ວມ.  ໂຄງການສະໜອງ ໄຟຟ້າໃຫ້ເສັ້ນທາງລົດໄຟລາວ - ຈີນ. ປະກອບມີ 20 ວົງຈອນຂອງສາຍສົ່ງ 115 ກິໂລໂວນທີ່ມີຄວາມຍາວທັງໝົດ 268 ກມ ແລະ ຂະຫຍາຍ 11 ສາຍໃນ 10 ສະຖານີ, ເພື່ອສະໜອງ ພະລັງງານຈາກຕາຂ່າຍໄຟຟ້າຂອງ ລັດວິສາຫະກິດໄຟຟ້າລາວ ໄປເປັນ 10 ເສົາຍ່ອຍຂອງທາງລົດໄຟ. ຊື່ງແລວສາຍສົ່ງໄດ້ຜ່ານຢູ່ 05 ແຂວງ  01 ນະຄອນຫຼວງວຽງຈັນຄື: ແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ ແລະ ແຂວງວຽງຈັນ.ໂຄງການຈະໄດ້ເລີ່ມກໍ່ສ້າງພາຍໃນ ເດືອນ ທັນວາ 2019 ແລະ ຈະໃຫ້ສໍາເລັດ ໃນເດືອນ ມີນາ 2021. ໂຄງການດັ່ງກ່າວ ຈະເປັນໂຄງການສາຍສົ່ງໄຟຟ້າທຳອິດ ທີ່ລົງທຶນໃນຮູບແບບ BOT ຢູ່ ສປປລາວ, ໃນການຮັບປະກັນການສະໜອງໄຟໃຫ້ລົດໄຟລາວ-ຈີນ ທີ່ຈະສາມາດແລ່ນລົດໄດ້ຕາມເປົ້າໝາຍ ແລະ ເປັນໂຄງການໜື່ງທີ່ຊຸຸກຍູ້ການພັດທະນາຄູ່ຮ່ວມ ລະຫວ່າງ ສປປລາວ ກັບ ສປຈີນ ເປັນໂຄງການ “ໜື່ງແລວທາງໜື່ງເສັ້ນທາງ” ໃນການເຊື່ອມໂຍງພື້ນຖານໂຄງລ່າງກັບບັນດາປະເທດໃນພາກພື້ນ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ກໍ່ຄືປະຊາຊົນລາວໃຫ້ມີຊີວິດທີ່ດີຂື້ນເທື່ອລະກ້າວ.