ລັດວິສາຫະກິດໄຟຟ້າລາວ ຈັດກອງປະຊຸມ ສະຫຼຸບວຽກງານງານ 6 ເດືອນຕົ້ນປີ ແລະ ແຜນສູ້ຊົນ 6 ເດືອນທ້າຍປີ 2018.

10-08-2018.



                ໃນວັນທີ 10 ສິງຫາ 2018 ຢູ່ທີ່ຫ້ອງປະຊຸມໃຫຍ່ ລັດວິສາຫະກິດໄຟຟ້າລາວ ໄດ້ຈັດກອງປະຊຸມ ສະຫຼຸບວຽກງານງານ 6 ເດືອຕົ້ນປີ ແລະ ແຜນສູ້ຊົນ 6 ເດືອນທ້າຍປີ 2018. ໂດຍການເປັນປະທານຂອງ ທ່ານ ນາງ ຈັນສະຫວາດ ບຸບຜາ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ມີ ທ່ານ ບຸນອູ້ມ  ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍຄະນະ, ມີບັນດາອົງການຈັດຕັ້ງທີ່ກ່ຽວຂ້ອງ ແລະ ບໍລິສັດ ໃນເຄືອຂອງລັດວິສາຫະກິດໄຟຟ້າລາວເຂົ້າຮ່ວມ. ທ່ານ ບຸນອູ້ມ  ສີວັນເພັງ ໄດ້ລາຍງານໃຫ້ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ຮັບຊາບວ່າ: ປະຈຸບັນ ລັດວິສາຫະກິດໄຟຟ້າລາວ ມີພະນັກງານ 7 ພັນ ກ່ວາຄົນ. ທົ່ວປະເທດມີແຫຼ່ງຜະຫຼິດໄຟຟ້າ 63 ເຂື່ອນ, ມີກຳລັງຕິດຕັ້ງ 6 ພັນກວ່າ ເມກາວັດ ແລະ ມີສະຖານີໄຟຟ້າແຮງສູງ 65 ແຫ່ງ. ສໍາລັບແຜນການສູ້ຊົນ 6 ເດືອນທ້າຍປີ 2018 ຂອງ ລັດວິສາຫະກິດໄຟຟ້າລາວ ຈະປະຕິບັດຄຳຂວັນ ເພີ່ມລາຍຮັບ, ຫຼຸດຜ່ອນລາຍຈ່າຍ, ຈຳໜ່າຍໃຫ້ພຽງພໍ, ບໍລິການໄວ ດ້ວຍຄວາມປອດໄພນຳໃຊ້ໃຫ້ເກີດຜົນ.

       ໃນຕອນທ້າຍຂອງພິທີ ໄດ້ປະດັບຫຼຽນໄຊແຮງງານ ແລະ ໃບຍ້ອງຍໍໃຫ້ແກ່ບຸກຄົນ ແລະ ກົມກອງລວມໝູ່ ທີ່ໄດ້ປະກອບສ່ວນເຂົ້າໃນໂຄງການສາຍສົ່ງ 115 ກິໂລໂວນ ນໍ້າທຸງ-ຫຼວງນໍ້າທາ-ນາໝໍ້. ໃນນັ້ນໄດ້ປະດັບຫຼຽນໄຊແຮງງານຊັ້ນ 2 ໃຫ້ 1 ກົມກອງ ແລະ ບຸກຄົນ 7 ທ່ານ, ຫຼຽນໄຊແຮງງານຊັ້ນ 3 ໃຫ້ບຸກຄົນລວມ 11 ທ່ານ, ປະດັບຫຼຽນກາແຮງງານໃຫ້ບຸກຄົນ 5 ທ່ານ ແລະ ຍັງມອບໃບຍ້ອງຍໍຂັ້ນລັດຖະບານໃຫ້ບຸກຄົນ 3 ທ່ານ.