ໜ່ວຍງານ Hotline ລັດວິສາຫະກິດໄຟຟ້າລາວ ເຂົ້າຮ່ວມແຂ່ງຂັນ ທັກສະໃນການປະຕິບັດວຽກງານ

14-08-2018.



ໃນລະຫວ່າງວັນທີ 7-10 ສິ່ງຫາ 2018 ທີ່ຜ່ານມາ, ລັດວິສາຫະກິດໄຟຟ້າລາວ(ຟຟລ) ໄດ້ເຂົ້າຮ່ວມການແຂ່ງຂັນ ທັກສະໃນການປະຕິບັດວຽກງານ Hotline ປະຈໍາປີ 2018 ທີ່ການໄຟຟ້າສ່ວນພູມີພາກແຫ່ງປະເທດໄທເປັນເຈົ້າພາບຈັດການແຂ່ງຂັນ, ໂດຍການນຳພາຂອງ ທ່ານ ກຽງສັກ ປຣັກສາດທອງ ຮອງຫົວໜ້າຝ່າຍບຸກຄະລາກອນ ຟຟລ ພ້ອມໜ່ວຍງານ Hotline ເຂົ້າຮ່ວມ. ການແຂ່ງຂັນໃນຄັ້ງນີ້ແມ່ນມີ 13 ທີມເຂົ້າຮ່ວມ, ໃນນັ້ນປະກອບມີ: ທີມ Hotline ຟຟລ 1 ທີມ ແລະ ທີມ Hotline ການໄຟຟ້າສ່ວນພູມີພາກຂອງໄທ 12 ທີມ. ເຊີ່ງ ທີມ Hotline ຟຟລ ມີ 8 ຄົນ ໂດຍໄດ້ແບ່ງອອກເປັນ 2 ປະເພດການແຂ່ງຂັນ ໃນນັ້ນປະກອບມີ: ການເຊື່ອມສາຍລາຍແຍກ ສາຍ SAC 1x50 sqmm, ເສົາຄອນກີດ, ຄອນສາຍເຫລັກປໍປາ ແລະ ການປອກສາຍ SAC 1x185 sqmm. ເຊີ່ງພິທີແມ່ນໄດ້ຈັດຂື້ນຢູ່ທີ່ສູນຝຶກໄຟຟ້າແຮງສູງ ອຳເພີນະຄອນໄຊສີ ຈັງຫວັດ ນະຄອນປະຖົມ ປະເທດໄທ. ຈຸດປະສົງ ກໍ່ເພື່ອເຮັດໃຫ້ພະນັກງານ-ວິຊາການ ທຸກພາກສ່ວນທີ່ປະຕິບັດວຽກງານ Hotline ໄດ້ມີຄວາມຮູ້ ຄວາມເຂົ້າໃຈຫຼາຍຂື້ນກ່ຽວກັບການປະຕິບັດວຽກໃຫ້ຖືກຕ້ອງຕາມມາດຕະຖານເຕັກນິກ ແລະ ມີຄວາມປອດໄພສູງ ພ້ອມທັງພັດທະນາບຸກຄະລາກອນຂອງວຽກງານ Hotline ໃຫ້ມີປະສິດທິພາບ ແລະ ຕໍ່ເນື່ອງ ເພື່ອສ້າງບຸກຄະລາກອນໃຫ້ມີຄວາມເປັນມືອາຊີບ, ການແຂ່ງຂັນແມ່ນໄດ້ຈັດເປັນຄັ້ງທີ 7 ໂດຍແມ່ນການໄຟຟ້າສ່ວນພູມີພາກໄດ້ຈັດຂື້ນ ແລະ ເປັນຄັ້ງທຳອິດທີ່ Hotline ລັດວິສາຫະກິດໄຟຟ້າລາວ ເຂົ້າຮ່ວມແຂ່ງຂັນ ສາມາດຍາດໄດ້ລາງວັນຊະນະເລີດ ແລະ ໄດ້ຮັບຫລຽນຄຳ.