ກອງປະຊຸມສະຫຼຸບວຽກງານ 4 ບຸກ ໜ່ວຍຮາກຖານຊາວໜຸ່ມ ລັດວິສາຫະກິດໄຟຟ້າລາວ.

21-05-2018.



ໃນຕອນບ່າຍຂອງວັນທີ 18 ພຶດສະພາ 2018, ຢູ່ສໍານັກງານໃຫຍ່ ລັດວິສາຫະກິດໄຟຟ້າລາວ(ຟຟລ) ນະຄອນຫຼວງວຽງຈັນ, ໄດ້ມີກອງປະຊຸມສະຫຼຸບວຽກງານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2017 ແລະ ຜ່ານແຜນການ 2018 ຂື້ນ ໂດຍການເປັນປະທານຂອງ ສະຫາຍ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ທັງເປັນປະທານກວດກາ ມີ ສະຫາຍ ປອ ສີມອນ ພິຈິດ ເລຂາຄະນະບໍລິຫານງານຊາວໜຸ່ມກະຊວງພະລັງງານ ແລະ ບໍ່ແຮ່, ສະຫາຍ ໂສພອນ ສາຍຊົນຈະເລີນ ຄະນະພັກຮາກຖານ ຟຟລ ພ້ອມທັງເລຂາຊາວໜຸ່ມຮາກຖານ ຟຟລ ພ້ອມຄະນະ ແລະ ສະມາຊິກຊາວໜຸ່ມ ຟຟລ ເຂົ້າຮ່ວມ 420 ກວ່າ ສະຫາຍ. ໃນພິທີ ສະຫາຍ ກຽງສັກ ປຣັກສາດທອງ ເລຂາໜ່ວຍຊາວໜຸ່ມຮາກຖານ ຟຟລ ກໍ່ໄດ້ຂື້ນລາຍງານສະພາບລວມການຈັດຕັ້ງປະຕິບັດວຽກງານ 4 ບຸກ ປະຈໍາປີ 2017 ແລະ ຜ່ານແຜນການ ປະຈໍາປີ 2018 ມີບາງຕອນສະຫາຍໄດ້ກ່າວວ່າ: ໜ່ວຍຮາກຖານຊາວໜຸ່ມ ປະຊາຊົນ ປະຕິວັດລາວ ຟຟລ ແມ່ນອົງການຈັດຕັ້ງມະຫາຊົນ ພາຍໃຕ້ການຊີ້ນໍາຂອງໜ່ວຍພັກ ຟຟລ ເຊີ່ງມີສາຍໄຍການຈັດຕັ້ງຂື້ນກັບ ຄະນະບໍລິຫານງານ ຊປປລ ກະຊວງພະລັງງານ ແລະ ບໍ່ແຮ່ ມີສະມາຊິກຊາວໜຸ່ມທັງໝົດ 1,633 ສະຫາຍ ເປັນເພດຍິງ 497 ສະຫາຍ ຄະນະໜ່ວຍຮາກຖານ ຊາວໜຸ່ມ ຟຟລ ແມ່ນໄດ້ເອົາໃນໃສ່ວຽກງານ 4 ບຸກຢ່າງຕັ້ງໜ້າໂດຍສະເພາະ ບຸກດ້ານການເມືອງແນວຄິດແມ່ນໄດ້ສູ້ຊົນສຶກສາອົບຮົມດ້ານການເມືອງແນວຄິດໃຫ້ກັບສະມາຊິກຊາວໜຸ່ມໂດຍຜ່ານການເຜີຍແຜ່ເອກະສານຕ່າງໆຂອງ ພັກ-ລັດ ແລະ ຮ່ວມຊີວິດໄດ້ຕາມແຜນ, ດ້ານການຝຶກຝົນຫຼໍ່ຫຼອມຮໍ່າຮຽນ ໄດ້ຍົກສູງຄວາມຮູ້ຄວາມສາມາດສະມາຊິກພາຍໃນໜ່ວຍໄດ້ລື່ນແຜນການໂດຍສະເພາະໄດ້ສົ່ງສະມາຊິກຊາວໝຸ່ມໄປຍົກລະດັບຢູ່ຕ່າງປະເທດ ແລະ ພາຍໃນປະເທດ ຄື: ເປັນໄລຍະສັ້ນ ແລະ ໄລຍະຍາວ, ວຽກງານການຈັດຕັ້ງ ຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກຊາວໜຸ່ມໄດ້ 100% ພ້ອມທັງຂະຫຍາຍມາຫາຊົນເຂົ້າພັກໃຫ້ໄດ້ຕາມແຜນ ແລະ ສ້າງໜ່ວຍຊາວໜຸ່ມໃຫ້ເປັນໜ່ວຍຊາວໜຸ່ມເຂັ້ມແຂງຮູ້ນໍາພາຮອບດ້ານ ແລະ ເປັນແບບຢ່າງວຽກງານ 4 ບຸກ  ໃຫ້ຄຽງຄູ່ກັບຂະບວນການອອກແຮງງານ, ກິລາ, ປ້ອງກັນ ແລະ ສີນລະປະຢ່າງເປັນຂະບວນການ, ດ້ານວິຊາສະເພາະ ພະນັກງານ ສະມາຊິກຊາວໜຸ່ມ ຕ້ອງເປັນແບບຢ່າງ ໃຫ້ສົມກັບແຂນຂົວຂອງພັກ ເປັນກະດູກສັນຫຼັງຂອງຊາດ ສຸມທຸກຄວາມສາມາດ ປະກອບສ່ວນພັດທະນາພະລັງງານໄຟຟ້າເຂົ້າໃນການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງຕາມນະໂຍບາຍຂອງ ພັກ ແລະ ລັດຖະບານ, ຫຼັງຈາກນັ້ນ ຍັງໄດ້ຮັບຟັງ ການໂອລົມຂອງສະຫາຍ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໂດຍສະຫາຍໄດ້ຍົກໃຫ້ເຫັນ 3 ບັນຫາຄືື: ການຜັນຂະຫຍາຍມະຕິ 7 ຂອງ ສູນກາງຊາວໜຸ່ມປະຊາຊົນປະຕິວັດລາວ, ຫວນຄືນມູນເຊື້ອຂອງຊາວໜຸ່ມປະຊາຊົນປະຕິວັດລາວໃນແຕ່ລະຍຸກ ແຕ່ລະສະໄໝ ແລະ ທິດທາງແຜນການພັດທະນາພະລັງງານໄຟຟ້າໃຫ້ເປັນແກນກາງໃນການພັດທະນາເສດຖະກິດ ແລະ ສັງຄົມ ຂອງ ສປປລາວ.