ກອງປະຊຸມດ້ານພະລັງງານໄຟຟ້າ ລະຫວ່າງ ລັດວິສາຫະກິດໄຟຟ້າລາວ ແລະ ການໄຟຟ້າຝ່າຍຜະລິດແຫ່ງປະເທດໄທ

16-05-2018.



ເພື່ອເປັນການປັບປຸງການຮ່ວມມືດ້ານພະລັງງານໄຟຟ້າລະຫວ່າງ 2 ອົງກອນ ໃຫ້ມີບາດກ້າວທີ່ດີຂື້ນ, ໃນວັນທີ 15 ພຶດສະພາ 2018, ຢູ່ທີ່ ສໍານັກງານໃຫຍ່ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ມີກອງປະຊຸມປຶກສາຫາລືລະຫວ່າງ ລັດວິສາຫະກິດໄຟຟ້າລາວ (ຟຟລ) ກັບ ການໄຟຟ້າຝ່າຍຜະລິດແຫ່ງປະເທດໄທ (ກຟຜ) “ໂດຍການເປັນປະທານຮ່ວມຂອງ   ທ່ານ ດວງສີ ພາຣະຍົກ ຮອງຜູ້ອໍານວນການໃຫຍ່  ລັດວິສາຫະກິດໄຟຟ້າລາວ ແລະ               ທ່ານ ພັດທະນາ ແສງສີໂຣດ ຮອງຜູ້ວ່າການນະໂຍບາຍ ແລະ ແຜນການ ມີພະນັກງານ ແລະ ວິຊາການທັງສອງຝ່າຍເຂົ້າຮ່ວມ. ຈຸດປະສົງຂອງກອງປະຊຸມແມ່ນເພື່ອປຶກສາຫາລືການເຊື່ອມໂຍງລະບົບໄຟຟ້າລະບົບຕໍ່ລະບົບ (System to System) ໂດຍສະເພາະລະບົບສາຍສົ່ງໄຟຟ້າແຮງສູງ ຄວາມດັນ 115 ກິໂລໂວນ ຄື: ສາຍສົ່ງໄຟຟ້າແຮງສູງ 115 ກິໂລໂວນ ສິຣິທອນ-ບັງເຍາະ, ສາຍສົ່ງ 115 ກິໂລໂວນ ທ່າລີ່-ປາກລາຍ, ສາຍສົ່ງ 115 ກິໂລໂວນ ໂພນຕ້ອງ-ໜອງຄາຍ, ສາຍສົ່ງ 115 ກິໂລໂວນ  ທ່ານາແລ້ງ-ໜອງຄາຍ, ສາຍສົ່ງ 115 ກິໂລໂວນ ປາກຊັນ-ບຶງການ, ສາຍສົ່ງ 115 ກິໂລໂວນ ທ່າແຂກ-ນະຄອນພະນົມ ແລະ ສາຍສົ່ງ 115 ກິໂລໂວນ ປາກບໍ່-ມຸກດາຫານ. ນອກຈາກນັ້ນ ທັງສອງຝ່າຍກໍ່ໄດ້ເຈລະຈາການ ຊື້-ຂາຍ ພະລັງງານໄຟຟ້າຮ່ວມກັນສະບັບໃໝ່ ລະຫວ່າງ ລັດວິສາຫະກິດໄຟຟ້າລາວ ກັບ ການໄຟຟ້າຝ່າຍຜະລິດແຫ່ງປະເທດໄທ ແລະ ໃນຕອນທ້າຍຂອງກອງປະຊຸມສອງຝ່າຍກໍ່ໄດ້ເຫັນດີຮ່ວມກັນຫຼາຍບັນຫາ ເພື່ອເປັນການພັດທະນາດ້ານພະລັງງານຮ່ວມກັນໂດຍສະເພາະເພື່ອແລກປ່ຽນພະລັງງານໄຟຟ້າເຮັດໃຫ້ສອງປະເທດ ລາວ-ໄທ ມີໄຟຟ້າຊົມໃຊ້ຢ່າງໝັ້ນຄົງ ແລະ ທົ່ວເຖີງ.