ລັດວິສາຫະກິດໄຟຟ້າລາວ ຈັດພິທີວາງສີລາລຶກ ໂຄງການກໍ່ສ້າງເຂື່ອນໄຟຟ້າ ນ້ຳງື່ມ 4 ຂຶ້ນຢ່າງເປັນທາງການ ທີ່ ເມືອງພູກູດ ແຂວງຊຽງຂວາງ

12-02-2018.



        ໃນວັນທີ 25 ມັງກອນ 2018 ລັດວິສາຫະກິດໄຟຟ້າລາວ ໄດ້ຈັດ ພິທີວາງສີລາລຶກ ໂຄງການກໍ່ສ້າງເຂື່ອນໄຟຟ້າ ນ້ຳງື່ມ 4 ຂຶ້ນຢ່າງເປັນທາງການ ທີ່ ເມືອງພູກູດ ແຂວງຊຽງຂວາງ, ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ສຈ ດຣ. ສົມກົດ ມັງໜໍ່ເມກ ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງຊຽງຂວາງ, ທ່ານ ຫວາງ ເຫວິນທຽນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ແລະ ທ່ານ ບຸນອູ້ມ ສີວັນເພັງ ຄະນະພັກຮາກຖານ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍຄະນະ, ນອກນັ້ນຍັງມີການນຳຂັ້ນແຂວງ-ຂັ້ນເມືອງ, ອຳນາດການປົກຄອງທ້ອງຖິ່ນ, ບໍລິສັດຜູ້ຮັບເໝົາ ແລະ ບັນດາແຂກທີ່ຖືກເຊີນເຂົ້າຮ່ວມຢ່າງພ້ອມພຽງ. ໂຄງການເຂື່ອນໄຟຟ້ານ້ຳງື່ມ 4 ແມ່ນ ໂຄງການໜຶ່ງທີ່ນອນໃນແຜນຍຸດທະສາດແຫ່ງການພັດທະນາລະບົບໄຟຟ້າ ໃຫ້ກາຍເປັນກຳລັງແຮງດ້ານເສດຖະກິດແຫ່ງຊາດ, ອີກທັງ ຍັງເປັນ 1 ໃນ 5 ໂຄງການພັດທະນາເຂື່ອນໄຟຟ້າຕາມສາຍນ້ຳງື່ມ, ເຂື່ອນດັ່ງກ່າວແມ່ນເຂື່ອນປະເພດຄອນກຣີດອັດແໜ້ນ RCC ມີຄວາມສູງ 74 m, ຍາວ 252 m ສາມາດຜະລິດພະລັງງານໄດ້ 872 GWh/ປີ ມີກຳລັງຕິດຕັ້ງທັງຫມົດ 240 MW, ມີລະບົບສາຍສົ່ງ 230kV ວົງຈອນຄູ່ເຊື່ອມຕໍ່ສະຖານີ 500 kV ບ້ານ  ນາເພຍ ເມືອງຜາໄຊ ແຂວງຊຽງຂວາງ ມີຄວາມຍາວ 35 km, ດ້ວຍມູນຄ່າການລົງທຶນ 706 ລ້ານໂດລາສະຫະລັດ, ເຊິ່ງແມ່ນບໍລິສັດ China National Heavy Machinery Corporation ເປັນຜູ້ຮັບເຫມົາກໍ່ສ້າງໂຄງການດັ່ງກ່າວ ທີ່ຈະສຳເລັດໃນປີ 2022. ຈຸດປະສົງຫລັກຂອງໂຄງການກໍ່ເພື່ອແນໃສ່ສ້າງພື້ນຖານໂຄງລ່າງແກ້ໄຂຄວາມທຸກຈົນ ແລະ ເພື່ອໃຫ້ການພັດທະນາໃນຂະແໜງພະລັງງານ ແລະ ບໍ່ແຮ່ ໄດ້ຮັບການຈັດຕັ້ງປະຕິບັດດ້ວຍຈັງຫວະທີ່ຕໍ່ເນື່ອງ ແລະ ຫມັ້ນທ່ຽງ.