ສະຖານີໄຟຟ້າແຮງສູງຄວາມດັນ 115/22 ກິໂລໂວນ ຫ້ວຍຊາຍ ໄດ້ເປີດນໍາໃຊ້ຢ່າງເປັນທາງການ.

12-02-2018.



             ເພື່ອຮັບປະກັນການສະໜອງພະລັງງານໄຟຟ້າໃຫ້ພຽງພໍ ແລະ ທົ່ວເຖີງ ຕາມແຜນພັດທະນາພະລັງງານໄຟຟ້າຂອງລັດຖະບານ ໃນອານາຄົດ, ໃນວັນທີ 20 ມັງກອນ 2018, ລັດວິສາຫະກິດໄຟຟ້າລາວ ໄດ້ຈັດພິທີເປີດການນຳໃຊ້ສະຖານີໄຟຟ້າ 115 /22 ກິໂລໂວນ ຫ້ວຍຊາຍ ທີ່ບ້ານຫ້ວຍຊາຍ ເມືອງຫ້ວຍຊາຍ ແຂວງບໍ່ແກ້ວ ຂື້ນຢ່າງເປັນທາງການ, ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ ກຳມະການສູນກາງພັກ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງເຈົ້າແຂວງໆບໍ່ແກ້ວ, ທ່ານ ສົມລິດ ສີຜາວັນ ປະທານສະພາປະຊາຊົນ ແຂວງບໍ່ແກ້ວ, ທ່ານ ບຸນອູ້ມ ສີວັນເພັງ ຄະນະພັກຮາກຖານ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ມີອໍານາດການປົກຄອງຂັ້ນແຂວງ, ຂັ້ນເມືອງ, ບໍລິສັດຜູ້ຮັບເໝົາກໍ່ສ້າງ ແລະ ແຂກທີ່ຖືກເຊີນເຂົ້າຮ່ວມ. ສະຖານີໄຟຟ້າ 115/22 ກິໂລໂວນ ຫ້ວຍຊາຍ ແມ່ນໄດ້ເລີ່ມການກໍ່ສ້າງໃນ ເດືອນ ພະຈິກ 2016 ເປັນຕົ້ນມາ ແລະ ໄດ້ສຳເລັດໃນເດືອນ ທັນວາ 2017 ທີ່ຜ່ານມາ ແລະ ເປັນແຜນພັດທະນາລະບົບສາຍສົ່ງໄຟຟ້າແຮງສູງ ຕາມຢຸດທະສາດຂອງລັດວິສາຫະກິດໄຟຟ້າລາວ 2016-2020 ເພື່ອເຊື່ອມຕໍ່ລະບົບສາຍສົ່ງໄຟຟ້າແຮງສູງ 115 ກິໂລໂວນ ຂອງບັນດາແຂວງພາກເໜືອໃຫ້ສາມາດເຊື່ອມເຂົ້າກັນ ແລະ ຈະເປັນລະບົບສົ່ງໄຟຟ້າແຮງສູງເພື່ອເຊື່ອມຕໍ່ກັບປະເທດໄກ້ຄຽງໃນການແລກປ່ຽນພະລັງງານໄຟຟ້າໃນປະຈຸບັນກໍ່ຄືອານາຄົດ ພ້ອມທັງເປັນລະບົບສາຍສົ່ງໄຟຟ້າທີ່ນອນໃນການສະໜອງພະລັງງານໄຟຟ້າໃຫ້ກັບ ໂຄງການ "ໜຶ່ງແລວທາງໜຶ່ງເສັ້ນທາງ" ຂອງ ສປຈີນ ໂດຍສະເພາະໂຄງການລົດໄຟຄວາມໄວສູງ ລາວ-ຈີນ ທີ່ກໍາລັງກໍ່ສ້າງ, ໃນນັ້ນ ສະຖານີດັ່ງກ່າວຈະເຊື່ອມຈອດກັບສະຖານີໄຟຟ້າ ທ່າຟ້າ ແລະ ສະຖານີໄຟຟ້າ ຜາອຸດົມ ເຊີ່ງເປັນສະຖານີໄຟຟ້າທີ່ສໍາຄັນໃນການຮອງຮັບພະລັງງານໄຟຟ້າທີ່ຜະລິດກະແສໄຟໄດ້ຈາກ ເຂື່ອນໄຟຟ້ານໍ້າທາ 1 ມາຮັບໃຊ້ດ້ານເສດຖະກິດ-ສັງຄົມ ແຂວງບໍ່ແກ້ວ ເພື່ອຫຼຸດຜ່ອນການຊື້ພະລັງງານໄຟຟ້າຈາກປະເທດໄກ້ຄຽງ  ເພື່ອເປັນການ ປະກອບສ່ວນໃນການສ້າງເສດຖະກິດຂອງແຂວງບໍ່ແກ້ວໃຫ້ມີຄວາມແຂງແຮງ ຍົກສູງຊິວິດການເປັນຢູ່ຂອງປະຊາຊົນ ພາຍໃນແຂວງ ແລະ ແຂວງອ້ອມຂ້າງ ນັບມື້ດີຂື້ນຕາມລໍາດັບ.