ລັດວິສາຫະກິດໄຟຟ້າລາວ ເປີດຊຸດຝຶກອົບຮົມວຽກງານກວດກາພັກ-ລັດ ຊຸດທີ I ປະຈໍາປີ 2021 ຂອງ ຂະແໜງການພະລັງງານ ແລະ ບໍ່ແຮ່

10-08-2021.



  ໃນວັນທີ 09 ສິງຫາ 2021 ທີ່ ສູນຝຶກອົບຮົມ ລັດວິສາຫະກິດໄຟຟ້າລາວ ໄດ້ເປີດຊຸດຝຶກອົບຮົມວຽກງານ ກວດກາພັກ-ລັດ ຂອງ ຂະແໜງການພະລັງງານ ແລະ ບໍ່ແຮ່ ຂຶ້ນ ໂດຍການເປັນປະທານຮ່ວມ ຂອງ ສະຫາຍ ທອງພັດ ອິນທະວົງ ຮອງເລຂາຄະນະພັກກະຊວງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ສະຫາຍ ແສງທອງ ຊາວພູວົງ ຮອງຫົວໜ້າກົມກວດກາ ຄະນະກວດກາສູນກາງພັກ, , ສະຫາຍ ຄໍາຫຼ້າ ວິຈິດວົງສາ ເລຂາພັກກົມ, ຫົວໜ້າກົມກວດກາ ກະຊວງພະລັງງານ ແລະ ບໍ່ແຮ່, ສະຫາຍ ຈັນສົມ ພິລາລົມ ຄະນະປະຈໍາພັກ, ປະທານກວດກາຄະນະພັກຮາກຖານ, ຫົວໜ້າຝ່າຍກວດກາ ລັດວິສາຫະກິດໄຟຟ້າລາວ ແລະ ຜູ້ເຂົ້າຮ່ວມຝຶກອົບຮົມຄັ້ງນີ້ທັງໝົດ 60 ສະຫາຍ.

ການຈັດຝຶກອົບຮົມໃນຄັ້ງນີ້ແມ່ນເລີ່ມແຕ່ວັນທີ 9-20 ສິງຫາ 2021 ປະກອບມີ 15 ຫົວຂໍ້ຄື:

1. ຄວາມຮູ້ພື້ນຖານກ່ຽວກັບວຽກງານກວດກາພັກ,

2. ວຽກງານຕິດຕາມກວດກາພັກ,

3. ການກວດກາການຈັດຕັ້ງພັກ-ລັດ ແລະ ສະມາຊິກພັກ ພະນັກງານ-ລັດຖະກອນ ເມື່ອມີປະກົດການລະເມີດ,

4. ລະບຽບວິໄນຂອງພັກ ແລະ ກວດກາການລົງວິໄນພັກ,

5. ກວດກາພິສູດວຽກງານກວດກາພັກ,

6. ບາງບັນຫາພື້ນຖານ ກ່ຽວກັບຈິດຕະສາດໃນວຽກງານກວດກາ,

7. ວິທີການສ້າງແຜນດຳເນີນການກວດກາ,

8. ຄວາມຮູ້ພື້ນຖານກ່ຽວກັບວຽກງານກວດກາລັດ,

9. ຄວາມຮູ້ພື້ນຖານກ່ຽວກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ,

10. ວຽກງານຄົ້ນຄ້ວາຄໍາຮ້ອງຟ້ອງ, ຮ້ອງທຸກ ແລະ ຄໍາສະເໜີ,

11. ຄວາມຮູ້ພື້ນຖານກ່ຽວກັບວຽກງານຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ,

12. ຄວາມຮູ້ພື້ນຖານກ່ຽວກັບວຽກງານສືບສວນ-ສອບສວນ,

13. ການແກ້ໄຂຜົນຂອງການກວດກາ ແລະ ການຕິດຕາມການຈັດຕັ້ງປະຕິບັດຜົນຂອງການກວດກາ ,

14. ການສ້າງເອກະສານ, ສໍານວນ ແລະ ສໍາເນົາເອກະສານໃນວຽກງານກວດກາ,

15. ວຽກກົງຈັກການຈັດຕັ້ງ ແລະ ການບໍາລຸງສ້າງພະນັກງານກວດກາ.

ເພື່ອໃຫ້ເຫັນໄດ້ເຖິງຄວາມໝາຍ ຄວາມສໍາຄັນຂອງວຽກງານກວດກາ ພັກ-ລັດ ໃນການເພີ່ມທະວີ, ສ້າງຄວາມເຂັ້ມແຂງ ແລະ ຄວາມສາມາດໃຫ້ແກ່ ສະມາຊິກ-ພະນັກງານຫຼັກແຫຼ່ງ ອ້ອມຂ້າງ ອົງຄະນະພັກ ກະຊວງພະລັງງານ ແລະ ບໍ່ແຮ່ ແລະ ລັດວິສາຫະກິດອ້ອມຂ້າງ ໄດ້ຮັບຮູ້ ແລະ ເຂົ້າໃຈຕໍ່ວຽກງານກວດກາຫຼາຍຂຶ້ນກວ່າເກົ່າ.

ພາບ-ຂ່າວ ແລະ ຮຽບຮຽງ: ພະແນກຂໍ້ມູນຂ່າວສານ ແລະ ປະຊາສຳພັນ