ລັດວິສາຫະກິດໄຟຟ້າລາວ ສາຂາແຂວງບໍລິຄຳໄຊ, ເປີດບູດທ໌ໂຄສະນາປະຊາສຳພັນ ແລະ ວາງສະແດງຜົນງານ ໃນງານບຸນແຂ່ງຂັນປະເພນີຊ່ວງເຮືອ ປະຈຳປີ 2019 ພສ 2562 ລະຫວ່າງ 11-12 ຕຸລາ 2019 ທີ່ເມືອງປາກຊັນ.

11-10-2019.



ໃນຕອນເຊົ້າຂອງວັນທີ 11 ຕຸລາ 2019, ເວລາ 9:00 ໂມງ ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ຈົ້າແຂວງໆບໍລິຄໍາໄຊ ໄດ້ໃຫ້ກຽດເຂົ້າຮ່ວມ ແລະ ລັ່ນຄັງ 9 ບາດ ພິທີເປີດການແຂ່ງຂັນບຸນຊ່ວງເຮືອ ອອກພັນສາປະວໍລະນາ ປະຈຳປີ 2019 ພສ 2562 ລະຫວ່າງວັນທີ 11-12 ຕຸລາ 2019 ຢູ່ທີ່ແຄມຂອງ ບ້ານປາກຊັນ ເມືອງປາກຊັນ ແຂວງບໍລິຄໍາໄຊ ພ້ອມດ້ວຍການນຳຂັ້ນຕ່າງໆທັງພາຍໃນ ແລະ ຕ່າງປະເທດ, ເຊິ່ງປີນີ້ເປັນປີພິເສດໄດ້ມີຄະນະຜູ້ແທນຈາກ ແຂວງຮາຕິ່ງ ສສ ຫວຽດນາມ ນໍາໂດຍທ່ານ ເລກວາງດຶງ ຮອງປະທານຄະນະກວດກາພັກນະຄອນຮ່າຕິ່ງ ແລະ ທ່ານ ທະວັດໄຊ ສີທອງ ຮອງເຈົ້າແຂວງບຶງການ ລາຊະອານາຈັກໄທ ພ້ອມດ້ວຍຄະນະ ໄດ້ນໍາເຮືອຊ່ວງເຂົ້າມາແຂ່ງຂັນເພື່ອໄມຕີຈິດ ແລະ ມິດຕະພາບ, ໃນພິທີ ທ່ານ ໄມຈອມ ວັນນະສານຄໍາ ເຈົ້າເມືອງໆປາກຊັນ ໄດ້ລາຍງານໃນການກະກຽມຈັດງານ ຫລັງຈາກນັ້ນທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄໍາໄຊປະທານ ກິດຕິມາສັກຈັດງານບຸນໄດ້ຂຶ້ນກ່າວເປີດພິທີກ່າວເປັນທາງການ ຈຸດປະສົງ: ຂອງການຕັ້ງບູດທ໌ຂອງ ລັດວິສາຫະກິດໄຟຟ້າລາວ ສາຂາແຂວງບໍລິຄໍາໄຊ ໃນງານແຂ່ງຂັນປະເພນີບຸນຊ່ວງເຮືອປີນີ້ ກໍເພື່ອນໍາສະເໜີວິທີການນຳໃຊ້ກະແສໄຟຟ້າແນວໃດໃຫ້ມີຄວາມປະຢັດ, ຖືກຕ້ອງ, ມີຄວາມປອດໄພ ແລະ ເປັນຈຸດບໍລິການສອບຖາມຂໍ້ມູນຂ່າວສານຂໍ້ຂ້ອງໃຈຕ່າງໆຂອງພໍ່ແມ່ປະຊາຊົນ, ນອກນີ້ຍັງໄດ້ນໍາສະເຫນີປະຫວັດຄວາມເປັນມາຂອງໄຟຟ້າແລະ ການສ້າງຕັ້ງເປັນ ໄຟຟ້າແຂວງບໍລິຄຳໄຊ ຕະຫລອດໄລຍະ 23 ປີ, ເຄື່ອງວັດກະແສໄຟຟ້າຂອງເຄື່ອງໃຊ້ໄຟຟ້າໃນຄົວເຮືອນ, ຮູບພາບການເຄື່ອນໄຫວທີ່ພົ້ນເດັ່ນໃນການເຮັດວຽກຂອງອ້າຍນ້ອງພະນັກງານພາກສະຫນາມ, ນຳສະເໜີການຊໍາລະຄ່າກະແສໄຟຟ້າຜ່ານທາງຊ່ອງທາງຕ່າງໆ, ແຜນທີ່ການຂະຫຍາຍຕາຂ່າຍໄຟຟ້າໃນປະຈຸບັນ ເຊິ່ງປີນີ້ແມ່ນໄດ້ເຊິນຫົວຫນ້າສູນ ແລະ ຜູ້ຮັບຜິດຊອບວຽກງານປະຊາສໍາພັນຂັ້ນເມືອງ 2 ເມືອງໄດ້ມາໂຄສະນາສະພາບລວມການຈັດຕັ້ງປະຕິບັດວຽກງານທີ່ພົ້ນເດັ່ນຂອງສູນບໍລິການໄຟຟ້າປະຈໍາເມືອງ.