ລັດວິສາຫະກິດໄຟຟ້າລາວ ແລະ ທະນາຄານພັດທະນາແຫ່ງ ສປຈີນ ຮ່ວມມືພັດທະນາລະບົບສາຍສົ່ງໄຟຟ້າແຮງສູງ



http://www.designerreplica.co.uk/

               ເນື່ອງໃນໂອກາດປະທານປະເທດ ສປຈີນ ເດີນທາງມາຢ້ຽມຢາມທາງລັດຖະກິດ ສປປລາວ ຢ່າງເປັນທາງການ, ໃນ​ລະຫວ່າງວັນ​ທີ 13-14 ພະຈິກ 2017 ທີ່ນະຄອນຫຼວງວຽງຈັນ, ການພົບປະການນໍາຂັ້ນສູງລະຫວ່າງ ສປຈີນ ແລະ ສປປລາວ ເປັນໂອກາດອັນດີທີ່ການນໍາຂອງທັງສອງຝ່າຍໄດ້ເພີ່ມທະວີການຮ່ວມມືຮອບດ້ານໃຫ້ມີຄວາມແໜ້ນແຟນຂື້ນກວ່າເກົ່າ ແລະ ສອງຝ່າຍກໍ່ໄດ້ເຫັນດີຮ່ວມມືກັນໃນຫຼາຍດ້ານ ເຊີ່ງໃນນັ້ນ ການພັດທະນາດ້ານພະລັງງານໄຟຟ້າແມ່ນຫົວຂໍ້ໜຶ່ງທີ່ສອງຝ່າຍໄດ້ເຫັນດີຮ່ວມກັນເຊັ່ນ: ໂຄງການເຂື່ອນໄຟຟ້ານໍ້າຕົກ ແລະ ໂຄງການກໍ່ສ້າງສາຍສົ່ງໄຟຟ້າ ເພາະລັດຖະບານລາວເຫັນໄດ້ຄວາມສຳຄັນຂອງຂະແໜງພະລັງງານໄຟຟ້າແມ່ນປັດໃຈຫຼັກໃນການປະກອບສ່ວນໃນການພັດທະນາເສດຖະກິດ-ສັງຄົມ. ໃນຕອນບາຍ ວັນທີ 13 ພະຈິກ 2017, ຢູ່ທີ່ທໍານຽບປະທານປະເທດ ນະຄອນຫຼວງວຽງຈັນ, ໄດ້ມີພິທີລົງນາມໂຄງການສາຍສົ່ງໄຟຟ້າແຮງສູງ 500/230 ກິໂລໂວນ ອ້ອມນະຄອນຫຼວງວຽງຈັນ ລະຫວ່າງ ທ່ານ ບູນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ Hu Huaibang ປະທານທະນາຄານພັດທະນາແຫ່ງ ສປຈີນ(CDB) ໂດຍເປັນກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດແຫ່ງ ສປປລາວ ແລະ ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກຄອມມູນິດຈີນ ປະທານປະເທດແຫ່ງ ສປຈີນ ແລະ ມີຄະນະການນໍາຂັ້ນສູງຂອງສອງຝ່າຍເຂົ້າຮ່ວມ.

               ໂຄງການກໍ່ສ້າງສາຍສົ່ງໄຟຟ້າແຮງສູງ 500/230 ກິໂລໂວນ ອ້ອມນະຄອນຫຼວງວຽງຈັນ ເປັນໂຄງການປັບປຸງລະບົບສາຍສົ່ງໄຟຟ້າແຮງສູງ ໂດຍໄດ້ຮັບທຶນກູ້ຢືມ ຈາກລັດຖະບານ ສປຈີນ ເພື່ອຮັບປະກັນການສະໜອງພະລັງງານໄຟຟ້າໃຫ້ກັບນະຄອນຫຼວງວຽງຈັນ ໃຫ້ມີຄວາມໝັ້ນຄົງດ້ານພະລັງງານ ປະກອບສ່ວນຫຼັກໃນການພັດທະນາດ້ານ ການເມືອງ, ເສດຖະກິດ ແລະ ສັງຄົມ ຂອງປະເທດ ເພາະໃນແຕ່ລະປີ ນະຄອນຫຼວງວຽງຈັນມີການຂະຫຍາຍໂຕທາງດ້ານເສດຖະກິດຢ່າງຕໍ່ເນື່ອງ ແລະ ໄວວາ ດັ່ງນັ້ນ ຄວາມຕ້ອງການພະລັງງານໄຟຟ້າມາຮັບໃຊ້ຈິ່ງມີຄວາມສຳຄັນ ແລະ ຈໍາເປັນຫຼາຍ, ຖ້າໂຄງການດັ່ງກ່າວກໍ່ສ້າງສໍຳເລັດ ຈະຊ່ວຍໃຫ້ການສະໜອງພະລັງງານໄຟຟ້າໃຫ້ກັບຕົວເມືອງ, ເຂດເສດຖະກິດພິເສດ ແລະ ເຂດເສດຖະກິດສະເພາະ ສາມາດມີພະລັງງານໄຟຟ້າໃຊ້ຢ່າງໝັ້ນຄົງ ແລະ ຮັບປະກັນໄດ້ໃນກໍລະນີໄຟຕົກ ໄຟມອດ ແລະ ໄຟບໍ່ພໍ.