ລັດວິສາຫະກິດໄຟຟ້າລາວ ໄດ້ຮັບໃບຢັ້ງຢືນ ISO 9001:2015



              ໃນວັນທີ 28 ກໍລະກົດ 2017, ຢູ່ທີ່ ຫ້ອງປະຊຸມຊັ້ນ 8 ສໍານັກງານໃຫຍ່ ລັດວິສາຫະກິດໄຟຟ້າລາວ (ຟຟລ) ນະຄອນຫຼວງວຽງຈັນ ໄດ້ມີພິທີ ມອບ-ຮັບ ໃບຢັ້ງຢືນ ISO 9001:2015 ໃຫ້ ຟຟລ ຂື້ນຢ່າງເປັນທາງການ, ຊຶ່ງໃຫ້ກຽດຂຶ້ນຮັບໂດຍແມ່ນ ທ່ານ ຄຳປະເສີດ ເທບປັນຍາ ຮອງຜູ້ອຳນວຍການໃຫຍ່ ຟຟລ ແລະ ກ່າວມອບໂດຍ ທ່ານ ໂຮຢຸນ ຊິນ (Hoo Yoon Sin) ຕາງໜ້າ ບໍລິສັດ BM Trada, ພ້ອມດ້ວຍຄະນະຝ່າຍ, ພະນັກງານ - ວິຊາການ ທີ່ກ່ຽວຂ້ອງກັບວຽກງານ ISO ກໍ່ເຂົ້າຮ່ວມ.

              ໃນພິທີ ທ່ານ ວັນຄຳ ແສງເມືອງ ຮອງຫົວໜ້າສູນຝຶກ ຟຟລ ທັງເປັນຄະນະຮັບຜິດຊອບວຽກງານ ISO ກໍ່ໄດ້ຂື້ນລາຍງານສະພາບການກ່ຽວກັບໜ້າວຽກ ແລະ ຂັ້ນຕອນໃນການປະຕິບັດວຽກງານດັ່ງກ່າວໂດຍຫຍໍ້; ເຊິ່ງໃນບາງຕອນ ທ່ານໄດ້ກ່າວວ່າ: ຟຟລ ແມ່ນເລີ່ມໄດ້ຮັບໃບຢັ້ງຢືນການບໍລິຫານທີ່ມີຄຸນນະພາບຕາມ ມາດຕະຖານສາກົນ ISO 9001:2008 ໃນປີ 2011 ເປັນຕົ້ນມາ ພາຍຫຼັງໄດ້ສືບຕໍ່ປະຕິບັດຂໍ້ກຳນົດ ແລະ ກົດລະບຽບຕ່າງໆ ຕາມມາດຕະຖານສາກົນ ຈຶ່ງສາມາດ ປັບປຸງ ແລະ ກວດສອບແຕ່ລະໄລຍະ ເປັນຕົ້ນແມ່ນ ໄດ້ແຕ່ງຕັ້ງຄະນະຮັບຜິດຊອບວຽກງານດັ່ງກ່າວໂດຍກົງ ເຊີ່ງໄດ້ສົບທົບກັບຫ້ອງການກວດສອບພາຍໃນ ເພື່ອເຮັດ ໃຫ້ທຸກໜ້າວຽກຂອງ ຟຟລ ໃຫ້ສອດຄ່ອງກັບຂໍ້ກຳນົດ ກົດລະບຽບຂອງ ISO 9001:2015 ໄດ້ວາງອອກ ແລະ ມາຮອດ ເດືອນສິງຫາ ປີ 2016 ຟຟລ ກໍ່ໄດ້ຮັບການ ຢັ້ງຢືນສະບັບໃໝ່ ISO 9001:2015 ຢ່າງເປັນທາງການຈາກ ບໍລິສັດ BM Trada ແລະ ມີອາຍຸການນຳໃຊ້ຮອດປີ 2020. ໃບຢັ້ງຢືນດັ່ງກ່າວ ແມ່ນການບໍລິຫານທີ່ ມີຄຸນນະພາບຕາມມາດຖານສາກົນ ແລະ ຫຼາຍປະເທດໃນທົ່ວໂລກໃຫ້ການຍອມຮັບ ເພື່ອຍົກສູງຄວາມໜ້າເຊື່ອຖືໃນການບໍລິຫານດ້ານພະລັງງານໄຟຟ້າ ໃຫ້ຄຽງຄູ່ໃນ ການດໍາເນີນທຸລະກິດ ໃຫ້ມີຄວາມໝັ້ນຄົງ.