ລັດວິສາຫະກິດໄຟຟ້າລາວ ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ຜ່ານແຜນການ 6 ເດືອນທ້າຍປີ 2017.



            ໃນວັນທີ 24-25 ສິງຫາ 2017, ລັດວິສາຫະກິດໄຟຟ້າລາວ(ຟຟລ) ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ຜ່ານແຜນການ 6 ເດືອນທ້າຍປີ 2017 ຂຶ້ນຢ່າງເປັນທາງການ, ຢູ່ທີ່ຫ້ອງປະຊຸມສຳນັກງານໃຫຍ່ຊັ້ນ 1  ເມືອງສີສັດຕະນາກ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນອູ້ມ ສີວັນເພັງ,  ເລຂາຄະນະພັກຮາກຖານ, ຜູ້ອໍານວຍການໃຫຍ່ ຟຟລ, ໂດຍໃຫ້ກຽດເຂົ້າຮ່ວມກອງປະຊຸມ ທ່ານ ປອ ຄໍາມະນີ ອິນທິລາດ ເລຂາຄະນະພັກ ລັດຖະມົນຕີກະຊວງພະລັງງານ-ບໍ່ແຮ່ ມີຫົວໜ້າກົມ, ຮອງກົມ, ຄະນະອໍານວຍການ,  ຄະນະຝ່າຍ, ຄະນະສາຂາ, ຄະນະຫ້ອງການ, ຫົວໜ້າໂຄງການ ແລະ ແຂກທີ່ຖືກເຊີນເຂົ້າຮ່ວມ.

           ໃນກອງປະຊຸມ ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ຟຟລ ໄດ້ຂື້ນລາຍງານການຈັດຕັ້ງປະຕິບັດວຽກງານ 6 ເດືອນ ຕົ້ນປີ 2017 ບາງຕອນທ່ານໄດ້ກ່າວວ່າ: ວຽກງານການຄຸ້ມຄອງລະບົບຜະລິດ ຟຟລ ສົມທົບກັບ ບໍລິສັດ ຜະລິດ-ໄຟຟ້າລາວ ມະຫາຊົນ (ຜ-ຟຟລ) ໄດ້ພ້ອມກັນຕັ້ງໜ້າເອົາໃຈໃສ່ ການຜະລິດ ການຊື້-ຂາຍ ກະແສໄຟຟ້າທັງພາຍໃນ ແລະ ຕ່າງປະເທດ ເພື່ອມາສະໜອງໃຫ້ກັບຄວາມຕ້ອງການຂອງຜູ້ຊົມໃຊ້ໄຟຟ້າແຕ່ລະໄລຍະຄື: 6 ເດືອນຕົ້ນປີ 2017 ແມ່ນໄດ້ຊື້ ແລະ ຜະລິດເອງ 3,516.33 ລ້ານ ກິໂລວັດໂມງ ເປັນເງິນ 1,674.12 ຕື້ກີບ, ວຽກງານຄຸ້ມຄອງລະບົບສາຍສົ່ງໄຟຟ້າໃນປະຈຸບັນ ທີ່ ຟຟລ ແລະ ບໍລິສັດເອກະຊົນຄຸ້ມຄອງປະກອບມີ: ສາຍສົ່ງໄຟຟ້າແຮງສູງ 500 ກິໂລໂວນ ຍາວ 167 ກິໂລແມັດ, ສາຍສົ່ງ 230 ກິໂລໂວນ ຍາວ 2,024.92 ກິໂລແມັດ, ສາຍສົ່ງ 115 ກິໂລໂວນ ຍາວ 6,422.16 ກິໂລແມັດ ມີສະຖານີໄຟຟ້າ 230/115/22 ກິໂລໂວນ ຈໍານວນ 7 ແຫ່ງ ແລະ ສະຖານີໄຟຟ້າ 115/22 ກິໂລໂວນ ຈຳນວນ 54 ແຫ່ງ, ປະຈຸບັນທົ່ວປະເທດມີ 1,158,025 ຄອບຄົວ ມີໄຟຟ້າໃຊ້ແລ້ວ 1,090,571 ຄອບຄົວ ເທົ່າກັບ 94,18% ຂອງຄອບຄົວໃນທົ່ວປະເທດ ຖ້າທຽບໃສ່ແຜນນະໂຍບາຍຂອງລັດຖະບານຄື: ຮອດປີ 2020 ຄອບຄົວຜູ້ຊົມໃຊ້ໄຟຟ້າໃຫ້ໄດ້ 95%ໃນທົ່ວປະເທດ ແລະ ຟຟລ ຍັງຕ້ອງສືບຕໍ່ແຜນພັດທະນາໜ້າວຽກທີ່ຍັງບໍ່ທັນສໍາເລັດເຊັ່ນ: ໂຄງການກໍ່ສ້າງເຂື່ອນໄຟຟ້າ, ໂຄງການກໍ່ສ້າງສາຍສົ່ງ-ສະຖານີ, ວຽກງານສີ່ງແວດລ້ອມສັງຄົມ ແລະ ແຜນພັດທະນາບຸກຄະລາກອນໃຫ້ຮອງຮັບກັບໜ້າວຽກ ນອກຈາກນັ້ນ ຟຟລ ຕ້ອງເອັາໃຈໃສ່ວຽກງານການບໍລິການ, ພະລັງງານຕົກເຮ່ຍ, ຂະຫຍາຍໄຟຟ້າລົງສູ້ເຂດຫ່າງໄກ ແລະ ວຽກງານເກັບກູ້ໜີ້ສິນໃຫ້ໄດ້ຕາມເປົ້າໝາຍ, ໃນຕອນທ້າຍຂອງກອງປະຊຸມຍັງໄດ້ຮັບຟັງການໂອລົມຂອງ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ກ່ອນອື່ນ ທ່ານໄດ້ຊົມເຊີຍຜົນງານທີ່ ຟຟລ ສາມາດຈັດຕັ້ງປະຕິບັດໃນ 6 ເດືອນຕົ້ນປີ ແລະ ໃຫ້ສືບຕໍ່ສູ້ຊົນແຜນການ 6 ເດືອນ ທ້າຍປີ 2017 ເພື່ອເຮັດໃຫ້ປະຊາຊົນໃນທົ່ວປະເທດມີໄຟຟ້າໄດ້ຊົມໃຊ້ຢ່າງໝັ້ນຄົງ ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ເພື່ອໃຫ້ປະເທດຊາດມັງຄັງ ສີວິໄລ ປະຊາຊົນຮັ່ງມີ.