ທ່ານລັດທະມົນຕີກະຊ່ວງພະລັງງານ ແລະ ບໍ່ແຮ່ ລົງຕິດຕາມ ຊຸກຍູ້ກວດກາ ການຈັດຕັ້ງປະຕິບັດວຽກງານຢູ່ ແຂວງ ພາກເໜືອ ແລະ ພາກກາງ



https://www.bestwatch.eu/

​       ໃນລະຫວ່າງ ວັນທີ 6 ຫາ 7 ມິຖຸນາ 2017 ນີ້, ທ່ານ ປອ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະກົມວິຊາການດ້ານພະລັງງານ-ບໍ່ແຮ່ ແລະ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ທ່ານ ໂກມົນຈັນ ເພັດອາສາ ພ້ອມດ້ວຍພະນັກງານວິຊາການ ໄດ້ລົງຕິດຕາມ ຊຸກຍູ້ ກວດກາການຈັດຕັ້ງປະຕິບັດວຽກງານ ໂຄງການເຂື່ອນໄຟຟ້ານ້ຳຕົກ ແລະ ບໍ່ແຮ່ ເຊິ່ງປະກອບມີ: ເຂື່ອນໄຟຟ້ານ້ຳຕົກ ນ້ຳຈຽນຢູ່ເມືອງພູນ ແຂວງ ຊຽງຂວາງ, ໂຄງການສະຖານີໄຟຟ້າແຮງສູງ ທ່າວຽງ ເມືອງທ່າໂທມ ແຂວງ ໄຊສົມບູນ, ໂຄງການສາຍສົ່ງໄຟຟ້າແຮງສູງ 230 ກວ ທ່າວຽງ-ຫລັກ20, ສະຖານີໄຟຟ້າແຮງສູງປອມປີກ (ຫລັກຊາວ) ເມືອງຄຳເກີດ ແຂວງ ບໍລິຄຳໄຊ, ສະຖານີໄຟຟ້າແຮງສູງ ມະຫາໄຊ, ເມືອງມະຫາໄຊແຂວງ ຄຳມ່ວນ ແລະ ໂຄງການ ບໍ່ຄຳ ຄຳເກີດແສນອຸດົມ.

      ໂຄງການກໍ່ສ້າງເຂື່ອນໄຟຟ້ານ້ຳຈຽນ ເປັນໂຄງການໜຶ່ງທີ່ນອນຢູ່ໃນແຜນພັດທະນາເສດຖະກິດສັງຄົມຂອງຊາດ ແລະ ເປັນໂຄງການຂອງລັດຖະບານ 100% ໂດຍການກູ້ຢືມທຶນໃນການກໍ່ສ້າງ ຈາກທະນາຄານ ຂາອອກ-ຂາເຂົ້າ ແຫ່ງ ສປ ຈີນ, ໂຄງການດັ່ງກ່າວ ໄດ້ເລີ່ມລົງມືກໍ່ສ້າງມາແຕ່ວັນທີ 1 ກໍລະກົດ 2013, ຄາດວ່າຈະສຳເລັດ ໃນເດືອນກຸມພາ 2018 ໄລຍະເວລາກໍ່ສ້າງ 56 ເດືອນ ແລະ ມາຮອດປະຈຸບັນ ແມ່ນຈັດຕັ້ງປະຕິບັດມາແລ້ວເປັນເວລາ 47 ເດືອນ, ສຳເລັດແລ້ວ 94% ບໍລິສັດຜູ້ຮັບເຫມົາກໍ່ສ້າງຈະສູ້ຊົນໃຫ້ສຳເລັດກ່ອນຄາດໝາຍ 6 ເດືອນ ເຊິ່ງຄາດວ່າໃນເດືອນ ກໍລະກົດ 2017 ນີ້ ຈະໄດ້ເກັບກັກນໍ້າ ແລະ ພ້ອມທີ່ຈະທົດລອງຜະລິດພະລັງງານໄຟຟ້າ ເຄື່ອງຈັກເບີ 1 ແລະ ຄາດວ່າພາຍໃນເດືອນ ກັນຍາ 2017 ຈະທົດລອງຜະລິດພະລັງງານໄຟຟ້າເຄືອງຈັກເບີທີ 2 ເພື່ອໃຫ້ໄດ້ສົ່ງພະລັງງານໄຟຟ້າທັງຫມົດເຂົ້າໃນລະບົບຂອງ ລັດວິສາຫະກິດໄຟຟ້າລາວ ແລະ ຈະຈໍາໜ່າຍພາຍໃນປະເທດໂດຍສະເພາະ ຈະນຳສົ່ງພະລັງງານໄຟຟ້າໃຫ້ກັບແຂວງ ຊຽງຂວາງ, ໄຊສົມບູນ, ບໍລິຄຳໄຊ ແລະ ບັນດາໂຮງງານອຸດສາຫະກຳ ໃນຂົງເຂດດັ່ງກ່າວ.

      ໂຄງການດັ່ງກ່າວ ໄດ້ຮັບຜົນກະທົບທາງດ້ານທາງດ້ານສິ່ງແວດລ້ອມ-ສັງຄົມ ມີທັງໝົດ 47 ຄອບຄົວ ແລະ ໄດ້ຮັບການຈັດຕັ້ງປະຕິບັດໃນການພັດທະນາຟື້ນຟູ ແລະ ແກ້ໄຂຊີວິດການເປັນຢູ່ຂອງປະຊາຊົນແລ້ວ ຈຳນວນ 45 ຄອບຄົວ, ຍັງພຽງແຕ່ 2 ຄອບຄົວ ທາງໂຄງການ ກໍ່ຄື ອຳນາດການປົກຄອງທ້ອງຖິ່ນ ແລະ ສູນກາງຈະສຶບຕໍ່ໃນການຈັດຕັ້ງປະຕິບັດ ໃຫ້ໄດ້ຮັບຜົນສຳເລັດ ແລະ ມີປະສິດທິຜົນສູງ ພ້ອມນີ້ ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ ກໍ່ໄດ້ລົງສົມທົບກັບອຳນາດການປົກຄອງ ແຂວງ, ເມືອງ, ບ້ານ ແລະ ຄອບຄົວປະຊາຊົນທີ່ຢູ່ເຂດໂຄງການ ໄດ້ມີການຈັດກອງປະຊຸມພົບປະປຶກສາຫາລື ແລະ ແກ້ໄຂບັນຫາຮ່ວມກັນຢ່າງກົງໄປກົງມາ ແລະ ມີບັນຍາກາດດີ, ໂດຍສະເພາະແມ່ນໄດ້ເນັ້ນໃສ່ໃນການແກ້ໄຂ ເພື່ອໃຫ້ພໍ່ແມ່ປະຊາຊົນໃນເຂດດັ່ງກ່າວ ມີຄວາມເຂົ້່າໃຈ ແລະ ເພິ່ງພໍໃຈ ໃນການແກ້ໄຂຊົດເຊີຍຂອງໂຄງການ ກໍ່ຄືການປະກອບສ່ວນເຂົ້າໃນການພັດທະນາທ້ອງຖິ່ນຂອງຕົນກໍ່ຄືປະເທດຊາດໃຫ້ລຸດພົ້ນອອກຈາກສະຖານະພາບ ຄວາມ ດ້ອຍພັດທະນາຕາມຄາດຫມາຍຂອງພັກ-ລັດ. ພ້ອມກັນນັ້ນ ທ່ານ ລັດຖະມົນຕີພ້ອມດ້ວຍຄະນະກໍ່ໄດ້ ສືບຕໍ່ລົງຕິດຕາມ ກວດກາການຈັດຕັ້ງປະຕິບັດ ໂຄງການສາຍສົ່ງໄຟຟ້າແຮງສູງ 230 ກວ ທ່າວຽງ - ຫລັກ 20, ຊຶ່ງໂຄງການດັ່ງກ່າວໄດ້ສຳເລັດແລ້ວ 98% ແລະ ພ້ອມທີ່ຈະນຳໃຊ້ໃນເດືອນ ກໍລະກົດ 2017 ນີ້ ແລະ ສືບຕໍ່ລົງຕິດຕາມກວດກາສະຖານີໄຟຟ້າແຮງສູງປອມປີກ (ຫລັກຊາວ) ເມືອງ ຄຳເກີດ, ແຂວງ ບໍລິຄຳໄຊ, ສະຖານີໄຟຟ້າແຮງສູງ ມະຫາໄຊ, ເມືອງ ມະຫາໄຊ, ແຂວງ ຄຳມ່ວນ ແລະ ໂຄງການ ບໍ່ຄຳ ຄຳເກີດແສນອຸດົມ, ເມືອງ ຄຳເກີດ, ແຂວງ ບໍລິຄຳໄຊ.