ກະຊວງພະລັງງານ ແລະ ບໍ່ແຮ່ ສ້າງຂະບວນການແຂ່ງຂັນສີມືແຮງງານ ຕ້ອນຮັບວັນກຳມະກອນສາກົນ.



        ໃນວັນທີ 27 ເມສາ 2017 ເວລາ 9:00, ທ່ານ ປອ ຄໍາມະນີ ອິນທິລາດ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງພະລັງງານ -   ບໍ່ແຮ່ ເປັນປະທານ ເປີດງານແຂ່ງຂັນສີມືແຮງງານ   ຊີງຂັນ ລັດຖະມົນຕີກະຊວງພະລັງງານ ແລະ ບໍ່ແຮ່ ເພື່ອສ້າງຂະບວນການຂໍ່ານັບຮັບຕ້ອນ ວັນກຳມະກອນສາກົນ ວັນທີ 1 ພຶດສະພາ ຄົບຮອບ 131 ປີ ມີທ່ານ ຮສ ປອ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ບຸນອຸ້ມ ສີວັນເພັງ ເລຂາຄະນະພັກຮາກຖານ, ອຳນວຍການໃຫຍ່ ລັດວິສາຫະກິດໄຟຟ້າລາວ(ຟຟລ), ມີປະທານກຳມະບານກະຊວງພະລັງງານ-ບໍ່ແຮ່, ພະນັກງານ, ກຳມະກອນ ຟຟລ ແລະ ແຂກທີ່ຖືກເຊີນເຂົ້າຮ່ວມ. ງານແຂ່ງຂັນສີມືແຮງງານໄດ້ຈັດຂື້ນຢູ່ທີ່ ເດີນສູນຝຶກອົບຮົມສີມືແຮງງານ ຟຟລ ຂ້າງສໍານັກງານໃຫຍ່, ບ້ານ ທົ່ງກາງ, ເມືອງ ສີສັດຕະນາກ ນະຄອນຫຼວງວຽງຈັນ.

        ການຈັດງານແຂ່ງຂັນສີມືແຮງງານ ຊີງຂັນລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍ່ເພື່ອເປັນການສ້າງຂະບວນການຂໍານັບຮັບຕ້ອນວັນກຳມະກອນສາກົນ ໃຫ້ເປັນຂະບວນການ ແລະ ມີບັນຍາກາດອັນຝົດຟື້ນມ່ວນຊື່ນ ເພາະວັນກຳມະກອນສາກົນ ແມ່ນເປັນວັນທີ່ມີຄວາມໝາຍ ຄວາມສໍາຄັນ ຕໍ່ຊົນຊັ້ນກຳມະກອນ ທີ່ໄດ້ຕໍ່ສູ້ເສຍເລືອດ ເສຍເນື້ອ ຈີ່ງຂ້ອຍຍາດມາໄດ້ໂດຍສະເພາະ ກຳມະກອນແມ່ນໄດ້ຖືກກົດຂີ່ຂູດຮີດ ທາງດ້ານຈິດໃຈ ແລະ ແຮງງານ ເຊັ່ນພວກເຂົາອອກແຮງງານ 15-16 ຊົ່ວໂມງຕໍ່ມື້ ແຕ່ຍ້ອນຜົນງານດັ່ງກ່າວ ມາຮອດປະຈຸບັນ ກໍາມະກອນ ແມ່ນມີສິດມີສຽງຄື: 8 ຊົ່ວໂມງເຮັດວຽກ 8 ຊົ່ວໂມງພັກຜ່ອນ ແລະ ອີກ 8 ຊົ່ວໂມງແມ່ນສຶກສາຮໍ່າຮຽນເພື່ອພັດທະນາຕົນເອງໃຫ້ສົມກັບວ່າກຳມະກອນບໍ່ມີມື້ຢຸດການພັດທະນາ.

       ຈຸດປະສົງ ແລະ ເປົ້າໝາຍຫຼັກຂອງການແຂ່ງຂັນສີມືແຮງງານຄັ້ງນີ້ ແມ່ນເພື່ອຍົກສູງດ້ານສີມືແຮງງານ, ສ້າງໃຫ້ ພະນັກງານ ກຳມະກອນ ກ້າສະແດງອອກ, ເປັນການແລກປ່ຽນປະສົບການ ແລະ ສ້າງຄວາມສາມະຄີລະຫວ່າງພະນັກງານດ້ວຍກັນ ເຊີ່ງປີນີ້ ແມ່ນໄດ້ຮັບຄວາມສົນໃຈຫຼາຍ ເຊີ່ງສະແດງອອກມີ 41 ທີມ ເຂົ້າຮ່ວມ ທີ່ມາຈາກ 13 ສາຂາ ຟຟລ ທົ່ວປະເທດ, 1 ທີມ ຈາກ ບໍລິສັດ ກໍ່ສ້າງຕິດຕັ້ງໄຟຟ້າ ແລະ ອີກ 1 ທີມ ມາຈາກ ບໍລິສັດ ທິບພະຈັນ ເຊີ່ງຈະມີການແຂ່ງຂັນໃນ 4 ຫົວຂໍ້ຫຼັກເຊັ່ນ: ການກວດສອບໝໍ້ແປງຈໍາໜ່າຍ ພາກສະ   ໜາມ, ການປຽ່ນດອກກັນໄຟ 22 ກິໂລໂວນ, ການເຊື່ອມຕໍ່ສາຍໄຟ ແລະ ດຶງສາຍໄຟ 22 ກິໂລໂວນ ແລະ ວິທີການບໍລິການລູກຄ້າ. ໃນນັ້ນ ການແຂ່ງຂັນຈະໄດ້ດຳເນີນໄປເປັນເວລາ 2 ວັນ ຄື: ວັນທີ 27-28 ເມສາ 2017.