ລັດວິສາຫະກິດໄຟຟ້າລາວ ໄດ້ເປີດກອງປະຊຸມສະຫຼຸບວຽກງານ ປີ 2017 ແລະ ຜ່ານແຜນການສູ້ຊົນ 2018

05-03-2018.




           ລັດວິສາຫະກິດໄຟຟ້າລາວ ໄດ້ເປີດກອງປະຊຸມສະຫຼຸບວຽກງານປະຈໍາປີ 2017 ແລະ ຜ່ານແຜນການປີ 2018 ຂື້ນ ໃນວັນທີ 2 ມີນາ 2018 ຢູ່ທີ່ຫ້ອງປະຊຸມສໍານັກງານໃຫຍ່ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ປອ ຄໍາມະນີ ອິນທິລາດ, ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງພະລັງງານ ແລະ ບໍ່ແຮ່ ມີ ທ່ານ ປອ ຄໍາເຜີຍ ຜັນທະຈອນ ປະທານສະພາປະຊາຊົນ ແຂວງສະຫວັນນະເຂດ, ທ່ານ ວິຊຽນ ນະວິກຸນ ຮອງເຈົ້າແຂວງ ແຂວງສາລະວັນ, ທ່ານຫົວໜ້າກົມ, ຮອງກົມ, ຄະນະອໍານວຍການ ແລະບໍລິສັດໃນເຄືອເຂົ້າຮ່ວມ. ໃນພິທີ ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວໄດ້ຂື້ນສະຫຼຸບການຈັດຕັ້ງປະຕິບັດວຽກງານໃນປີ 2017 ບາງຕອນທ່ານໄດ້ກ່າວວ່າ: ໃນປີ 2017 ການປະຕິບັດວຽກງານ ຂອງ ລັດວິສາຫະກິດໄຟຟ້າລາວ ໄດ້ເອົາໃຈໃສ່ປະຕິບັດຕາມທິດທາງ, ນະໂຍບາຍຂອງພັກ ແລະ ແຜນພັດທະນາເສດຖະກິດ - ສັງຄົມ ຂອງລັດຖະບານ ກໍ່ຄືການຊີ້ນໍາ ຂອງກະຊວງພະລັງງານ ແລະ ບໍ່ແຮ່, ຜ່ານມາ ພະນັກງານ-ກໍາມະກອນ ທົ່ວລັດວິສາຫະກິດໄຟຟ້າລາວ ໄດ້ສາມັກຄີຮ່ວມແຮງຮ່ວມໃຈກັນ ສ້າງຂະບວນການຍາດໄດ້ຜົນງານ ຫຼາຍດ້ານ, ໂດຍສະເພາະ ການຄຸ້ມຄອງບຳລຸງຮັກສາລະບົບໄຟຟ້າ ບໍ່ໃຫ້ເກີດມີໄຟດັບໄຟມອດ ແລະ  ເພື່ອສະໜອງໄຟ ໃຫ້ກອງປະຊຸມອາຊຽນໃນລະດັບຕ່າງໆ ທີ່ ສປປ ລາວ ເຮົາ ເປັນເຈົ້າພາບ, ພ້ອມນັ້ນ ກໍ່ຍັງໄດ້ຄົ້ນຄ້ວາຊອກຫາແຫຼ່ງທຶນ ເພື່ອການພັດທະນາລະບົບໄຟຟ້າ ໃຫ້ສາມາດສືບຕໍ່ຂະຫຍາຍຕົວໄດ້ຢ່າງຕໍ່ເນື່ອງ ແລະ ປະຕິບັດວຽກງານຂອງຕົນ ດ້ວຍຄວາມເອົາໃຈໃສ່ສູງ, ປັດຈຸບັນທົ່ວປະເທດ ມີແຫຼ່ງຜະລິດໄຟຟ້າ ທັງໝົດ 60  ເຂື່ອນລວມທັງ IPP, SPP ເຊິ່ງມີກຳລັງຕິດຕັ້ງທັງໝົດ 6.614,14 MW, ໃນນັ້ນປະກອບມີ: 20 ເຂື່ອນ ເປັນຂອງ IPP ມີກຳລັງຕິດຕັ້ງ ທັງໝົດ 5.784 MW, ໃນນີ້ ແມ່ນສະໜອງໃຫ້ ລັດວິສາຫະກິດໄຟຟ້າລາວ ຈໍານວນ 1.318 MW ສ່ວນທີ່ເຫຼືອ  4.466 MW ແມ່ນສົ່ງອອກຕ່າງປະເທດ, ອີກ 20 ເຂື່ອນ ເປັນຂອງ SPP ມີກຳລັງຕິດຕັ້ງ 124,93 MW, ສະໜອງໃຫ້ລັດວິສາຫະກິດໄຟຟ້າລາວ ອີກ 10 ເຂື່ອນ ເປັນ ຂອງ ບໍລິສັດ ຜະລິດໄຟຟ້າລາວ ມະຫາຊົນ (ຜ-ຟຟລ) ມີກໍາລັງຕິດຕັ້ງ 619 MW, ສະໜອງໃຫ້ ລັດວິສາຫະກິດໄຟຟ້າລາວ ແລະ ອີກ 10 ເຂື່ອນ ເປັນຂອງ ລັດວິສາຫະກິດໄຟຟ້າລາວ ມີກໍາລັງຕິດຕັ້ງ 86,21 MW ໃນປີ 2017 ຜ່ານມາ ລັດວິສາຫະກິດໄຟຟ້າລາວ ຊື້ພະລັງງານໄຟຟ້າທັງໝົດ ລວມທັງ ຜະລິດເອງ ແມ່ນ 8.350,89 ລ້ານ kWh, ເປັນເງິນກີບ 4.047,38 ຕື້ກີບ, ທຽບໃສ່ແຜນ ປີ 2017 ເປັນ kWh ເທົ່າກັບ 106,06%, ເປັນເງິນກີບ 114,58% ລາຄາສະເລ່ຍ ຊື້ພະລັງງານທັງໝົດ ເທົ່າກັບ 484,66 ກີບ/kWh. ພ້ອມກັນນັ້ນ ໃນທົ່ວປະເທດມີ ສະຖານີໄຟຟ້າແຮງສູງ ທັງໝົດ 63 ແຫ່ງ, ເປັນສະຖານີ 230/115 kV ຈໍານວນ 7 ແຫ່ງ, ສະຖານີ 115/22 kV ຈໍານວນ 56 ແຫ່ງ, ມີກໍາລັງຕິດຕັ້ງໝໍ້ແປງ ຢູ່ສະຖານີ ທັງໝົດ 2.553 MVA. ມີລະບົບສາຍສົ່ງໄຟຟ້າແຮງສູງ ລວງຍາວທັງໝົດ 8.265,42 km ເປັນລະບົບສາຍສົ່ງ 230 kV 1.618,92 km ລະບົບສາຍສົ່ງ 115 kV 6.646,50 km ລະບົບຕາຂ່າຍໄຟຟ້າແຮງດັນກາງ ລວງຍາວ ທັງໝົດ 30.720,22 km ທຽບໃສ່ ທ້າຍປີ 2016 ເພີ້ມຂຶ້ນ 1.529,12 km, ເທົ່າກັບ 5,24%. ລະບົບຕາຂ່າຍໄຟຟ້າແຮງດັນຕໍ່າ 0,4 kV, ລວງຍາວທັງໝົດ 19.279,29 km ທຽບໃສ່ ທ້າຍປີ 2016 ເພີ້ມຂຶ້ນ 574,70 km, ເທົ່າກັບ 3,07%. ມີໝໍ້ແປງລະບົບຈໍາໜ່າຍທັງໝົດ 28.194 ໜ່ວຍ, ມີກໍາລັງຕິດຕັ້ງລວມ 4.550,10 MVA. ທຽບໃສ່ ທ້າຍປີ 2016 ໝໍ້ແປງລະບົບຈໍາໜ່າຍເພີ້ມຂຶ້ນ 1.874 ໜ່ວຍ ເທົ່າກັບ 7,12%, ກໍາລັງຕິດຕັ້ງ ເພີ້ມຂຶ້ນ 413,17 MVA ເທົ່າກັບ 9,99%. ມີສະຖານີຍ່ອຍ 35/22 kV ຈໍານວນ 2 ແຫ່ງ ນອກຈາກນັ້ນ ແຜນສູ້ຊົນໃນ ປີ 2018 ຕ້ອງໄດ້ແກ້ໄຊເຊັ່ນ: ແກ້ໄຂບັນຫາໄຟເຫຼືອບໍ່ພໍໃນສະເພາະໜ້າ ແລະ ຍາວນານ, ສູ້ຊົນເພີ້ມລາຍຮັບ ແລະ ຫຼຸດຜ່ອນລາຍຈ່າຍ, ປັບປຸງການສະໜອງໄຟຟ້າໃຫ້ພຽງພໍ ແລະ ມີຄວາມໜັ້ນຄົງ, ສະເໜີໃຫ້ລັດຖະບານ ຊ່ວຍແກ້ໄຂໜີ້ຄ່າກະແສໄຟຟ້າພາກລັດ, ຊົນລະປະທານ ແລະ ຄ່າກະແສໄຟເຍືອງທາງສາທາລະນະ ແລະ ເຈລະຈາການ ຊື້-ຂາຍ ພະລັງງານໄຟຟ້າໃຫ້ເໝາະສົມກັບປະເທດໄກ້ຄຽງ ຫຼັງຈາກນັ້ນ ກໍ່ໄດ້ຮັບຟັງການໂອລົມຂອງ ທ່ານ ປອ ຄໍາມະນີ ອິນທິລາດ ເລຂາຄະນະພັກກະຊວງ, ລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ພິທີກໍ່ໄດ້ປິດລົງໃນຕອນແລງຂອງວັນດຽວກັນ.