ລັດວິສາຫະກິດໄຟຟ້າລາວ ສາຂາ 4 ຕົວເມືອງ ເລັ່ງແກ້ໄຂ ລະບົບຈໍາໜ່າຍໄຟຟ້າແຮງກາງ 22 ກິໂລໂວນ ເຂດບ້ານໜອງບຶກ.

23-02-2018.




             ໃນຕອນແລງຂອງວັນທີ 21 ກຸມພາ 2018 ເວລາ 18:30 ໂມງ ໄດ້ເກີດມີ ພາຍຸຟ້າຝົນຕົກ ແລະ ລົມແຮງ ພັດເຂົ້າເຂດພາກກາງ ສປປ ລາວ ໂດຍສະເພາະ ເຂດບ້ານໜອງບຶກໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ສ້າງຄວາມເສຍຫາຍເປັນບໍລິເວນກວ້າງ, ເຮັດໃຫ້ສາຍສົ່ງໄຟຟ້າແຮງກາງ 22 ກິໂລໂວນ ໄດ້ຮັບຄວາມເສຍຫາຍ ເສົາໄຟຟ້າຫັກ ແລະ ເປ່ເພ ຈໍານວນ 22 ຕົ້ນ. ເຊິ່ງລັດວິສາຫະກິດໄຟຟ້າລາວ ສາຂາ 4 ຕົວເມືອງ ກໍ່ໄດ້ລົງກວດກາ-ສ້ອມແປງປ່ຽນຖ່າຍ ເພື່ອກູ້ລະບົບຄືນ ແລະ ສົ່ງຈ່າຍພະລັງງານໄຟຟ້າກັບຄືນມາໄດ້ຢ່າງວ່ອງໄວໃນມື້ດຽວກັນ. ໃນຕອນເຊົ້າຂອງວັນທີ 22 ກຸມພາ 2018, ທ່ານ ບຸນອຸ້ມ ສີວັນເພັງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະ ມີຄະນະຝ່າຍປະຕິບັດການໄຟຟ້ານະຄອນຫຼວງ, ຫົວໜ້າສາຂາ, ຫົວໜ້າພະແນກຕາຂ່າຍ ແລະ ພະນັກງານ ວິຊາການ ລັດວິສາຫະກິດໄຟຟ້າລາວເຂົ້າຮ່ວມສໍາຫຼວດກວດກາ ແລະ ແກ້ໄຂ ເພື່ອກູ້ຄືນລະບົບສາຍສົ່ງໄຟຟ້າແຮງກາງ 22 ກິໂລໂວນ ທັງໝົດທີ່ໄດ້ຮັບຄວາມເສຍຫາຍຈາກພາຍຸດັ່ງກ່າວຢ່າງຮີບດ່ວນ. ການລົງສ້ອມແປງໃນຄັ້ງນີ້ ນໍາພາ ໂດຍ ທ່ານ ໂພໄຊ ພົມມະທຳ ຫົວໜ້າໄຟຟ້າ ສາຂາ 4 ຕົວເມືອງ ພ້ອມພະນັກງານ ພະແນກຕາຂ່າຍ 4 ຕົວເມືອງ, ໜ່ວຍງານ HOTLINE, ລັດວິສາຫະກິດໄຟຟ້າລາວ ສາຂາເມືອງຫາດຊາຍຟອງ ແລະ ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າ ລວມທັງໝົດ 60 ກວ່າ ສະຫາຍ ພ້ອມກົນຈັກໜັກຄົບຊຸດ ເພື່ອແກ້ໄຂລະບົບໄຟຟ້າ ແລະ ຮັບປະກັນໃຫ້ສາມາດປ່ອຍກະແສໄຟຟ້າໃຫ້ຜູ້ຊົມໃຊ້ໄຟຟ້າໄດ້ເປັນປົກກະຕິ. ການສ້ອມແປງປະກອບດ້ວຍ ປ່ຽນຖ່າຍ ເສົາໄຟຟ້າ ຍາວ 14 ແມັດ ຫັກຈໍານວນ 18 ຕົ້ນ, ປ່ຽນສາຍຕາຂ່າຍໄຟຟ້າແຮງກາງ 22 ກິໂລໂວນ ຂາດ 1,000 ກວ່າແມັດ, ດອກກັນໄຟ ແລະ ສ້ອມແປງປ້ອມໝໍ້ແປງເສຍຫາຍອີກ 5 ຈຸດ ລວມ ມູນຄ່າການເສຍຫາຍເບື້ອງຕົ້ນ ປະມານ 200 ກວ່າລ້ານກີບ ຄາດວ່າການສ້ອມແປງໃນຄັ້ງນີ້ແມ່ນຈະໃຫ້ສໍາເລັດພາຍໃນ 1 ວັນ ຫຼັງຈາກນັ້ນຈຶ່ງສາມາດປ່ອຍກະແສໄຟຟ້າໃຫ້ປະຊາຊົນໄດ້ຊົມໃຊ້ເປັນປົກກະຕິ.