ພິທີ ມອບ - ຮັບ ລົດໄຟຟ້າ (EV) ລະຫວ່າງ ລັດວິສາຫະກິດໄຟຟ້າລາວ ກັບ ບໍລິສັດ EV ລາວ ຈຳກັດ

28-10-2019.




     ໃນຕອນບ່າຍ ຂອງວັນທີ 28 ຕຸລາ 2019 ໄດ້ມີພິທີ ມອບ-ຮັບ ລົດທີ່ນຳໃຊ້ລະບົບສາກໄຟຟ້າ ຈຳນວນ 01 ຄັນ ເພື່ອນຳໃຊ້ໃນໂຄງການທົດລອງລະບົບສາກໄຟຟ້າສຳລັບ ລົດ EV ພິທີໄດ້ຈັດຂື້ນທີ່ສຳນັກງານໃຫຍ່ ລັດວິສາຫະກິດໄຟຟ້າລາວ, ນະຄອນຫຼວງວຽງຈັນ. ໃຫ້ກຽດເຂົ້າຮ່ວມເປັນສັກຂີພະຍານ ໃນຄັ້ງນີ້ມີ  ທ່ານ ສັນຍາ ສົມວິຈິດ ຮອງຫົວໜ້າກົມນະໂຍບາຍ ແລະ ແຜນພະລັງງານ, ໂດຍການເປັນປະທານຂອງ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ ບຸນເລີດ ຫຼວງປະເສີດ ປະທານ ບໍລິສັດ EV ລາວ ຈຳກັດ, ພ້ອມນັ້ນກໍ່ຍັງມີຄະນະຜູ້ຕາງໜ້າຈາກ ຫ້ອງການກະຊວງພະລັງງານ ແລະ ບໍ່ແຮ່ ແລະ ຕາງໜ້າຈາກສະຖາບັນສົ່ງເສີມພະລັງງານທົດແທນ, ຜູ້ຊ່ວຍຜູ້ອຳນວຍການ ຄະນະຝ່າຍ ຄະນະຫ້ອງການ ແລະ ພະນັກງານ ລັດວິສາຫະກິດໄຟຟ້າລາວ ເຂົ້າຮ່ວມຢ່າງພ້ອມພຽງ. ລັດວິສາຫະກິດໄຟຟ້າລາວ ແລະ ບໍລິສັດ EV ລາວ ຈຳກັດ, ເຊິ່ງໄດ້ມີການລົງນາມໃນບົດບັນທຶກຄວາມເຂົ້າໃຈຮ່ວມກັນ ໃນວັນທີ 02 ເມສາ 2019, ເພື່ອສຶກສາຄວາມເປັນໄປໄດ້ ແລະ ດຳເນີນໂຄງການທົດລອງນຳໃຊ້ລົດ ແລະ ລະບົບສາກໄຟຟ້າໃຫ້ລົດ EV ໃນຂອບເຂດນະຄອນຫຼວງວຽງຈັນ. ໃນພິທີ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ຟຟລ ໄດ້ກ່າວລາຍງານ ເຊິ່ງມີເນື້ອໃນບາງຕອນວ່າ: "ອີງໃສ່ນະໂຍບາຍຂອງ ຟຟລ ໃນປະຈຸບັນທີ່ໄດ້ມີການສົ່ງເສີມໃຫ້ເລີ່ມມີການນຳໃຊ້ລົດ EV ຢູ່ໃນ ສປປ ລາວ, ຕາມທິດທາງ ຂອງ ພັກ ແລະ ລັດຖະບານ, ເຊິ່ງ ຟຟລ ກໍ່ເຫັນວ່າມີຄວາມຈຳເປັນ ຈຶ່ງໄດ້ໃຫ້ການສະໜັບສະໜູນ ເພື່ອໃຫ້ສາມາດສຳເລັດ ບົດສຶກສາ FS ແລະ ນຳສະເໜີຂໍທິດຊີ້ນຳຈາກລັດຖະບານ". ເຖິງຢ່າງໃດກໍ່ຕາມ ໂຄງການດັ່ງກ່າວ ຈະສຳເລັດກໍ່ຕໍ່ເມື່ອ ໄດ້ຮັບການຮ່ວມມື ແລະ ສະໜັບສະໜູນຈາກຫຼາຍພາກສ່ວນ ເປັນຕົ້ນແມ່ນ ກະຊວງໂຍທາທິການ ແລະ ຂົນສົ່ງ, ກະຊວງການເງິນ, ກະຊວງພະລັງງານ ແລະ ບໍ່ແຮ່ ແລະ ກະຊວງອື່ນໆ ທີ່ກ່ຽວຂ້ອງ. ທັງນີ້ ກໍ່ເພື່ອໃຫ້ທັນກັບຄວາມຮຽກຮ້ອງຕ້ອງການຂອງສັງຄົມທີ່ໄດ້ໃຫ້ຄວາມສົນໃຈ ພາຫະນະທີ່ແລ່ນດ້ວຍລະບົບໄຟຟ້າ.