ກອງປະຊຸມປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມ ຂອງ ໂຄງການສະໜອງໄຟໃຫ້ກັບທາງລົດໄຟລາວ-ຈີີນ

27-08-2019.




   ໃນວັນທີ 27 ສິງຫາ 2019​ ຢູ່ທີ່ ພະແນກຊັບພະຍາກອນ ແລະ ທຳມະຊາດ ແຂວງຫຼວງພະບາງ ໄດ້ຈັດກອງປະຊຸມເຜີຍແຜ່ຂໍ້ມູນ ແລະ ປຶກສາຫາລື ກ່ຽວກັບ ບົດລາຍງານການປະເມີນຜົນກະທົບຕໍ່ສິ່ງແວດລ້ອມ ແລະ ສັງຄົມ ໂຄງການສາຍສົ່ງໄຟຟ້າແຮງສູງ 115 ກິໂລໂວນ ສໍາລັບໂຄງການທາງລົດໄຟລາວ-ຈີນ ໂດຍການເປັນປະທານຂອງ ທ່ານ ຖາວອນ ວົງໂພສີ ຮັກສາການຫົວໜ໊າ ກົມນະໂຍບາຍຊັບພະຍາກອນທຳມະຊາດ ແລະ ສິ່ງແວດລ້ອມ ມີ ທ່ານ ດວງສີພາຣະຍົກ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ໃນກອງປະຊຸມ ທ່ານ ດວງສີ ພາຣະຍົກ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ໄດ້ຂຶ້ນລາຍງານໂດຍຫຍໍ້ກ່ຽວກັບຂໍ້ມູນ ແລະ ແຜນການ ຂອງ ໂຄງການສະໜອງໄຟໃຫ້ກັບໂຄງການລົດໄຟ ລາວ-ຈີນ ແມ່ນມີຈຸດເລີ່ມຕົ້ນຈາກສະຖານີບໍ່ເຕນ ເມືອງຫຼວງນໍ້າທາ ແຂວງຫຼວງນໍ້າທາ ເຖິງ ນະຄອນຫຼວງວຽງຈັນ ເພື່ອຮັບປະກັນການສະໜອງກະແສໄຟຟ້າ ໃຫ້ກັບລົດໄຟຄວາມໄວສູງ, ໂຄງການດັ່ງກ່າວຈະດຶງເອົາໄຟຈາກສາຍສົ່ງ ແລະ ສະຖານີໄຟຟ້າແຮງສູງ ທີ່ນອນຢູ່ໃນຂອບເຂດ 05 ແຂວງ ທີ່ຢູ່ໃກ້ກັບແລວທາງລົດໄຟ ເພື່ອລຳລຽງກະແສໄຟຟ້າເຂົ້າສູ່ສະຖານີລົດໄຟທັງໝົດ 10​ ແຫ່ງ ເພື່ອຮັບປະກັນການຂົນສົ່ງຂອງຂະບວນລົດໄຟ ແລະ ສະຖານີລົດໄຟ, ເຊິ່ງໂຄງການດັ່ງກ່າວໄດ້ກວມເອົາ 05 ແຂວງ 13 ເມືອງຄື: ແຂວງຫຼວງນໍ້າທາ, ແຂວງອຸດົມໄຊ, ແຂວງຫຼວງພະບາງ, ແຂວງວຽງຈັນ ແລະ ນະຄອນຫຼວງວຽງຈັນ ມີຄວາມຍາວ ປະມານ 258 ກິໂລແມັດ. ກອງປະຊຸມກໍ່ໄດ້ຕົກລົງເຫັນດີຮ່ວມກັນຫຼາຍບັນຫາເພື່ອໃຫ້ການສະໜອງພະລັງງານໄຟຟ້າໃຫ້ກັບໂຄງການລົດໄຟຄວາມໄວສູງສາມາດດຳເນີນການໄປຕາມແຜນ.