ພິທີລົງນາມ ເອກະສານບົດບັນທຶກຄວາມເຂົ້າໃຈ (MOU) ຂອງສັນຍາຊື້-ຂາຍໄຟຟ້າ ໃນລະດັບແຮງດັນ 230/500 kV ໃຫ້ແກ່ລາຊະອານາຈັກກຳປູເຈຍ ຢ່າງເປັນທາງການ

05-12-2018.




          ໃນວັນທີ 5 ທັນວາ ປີ 2018, ພະນະທ່ານ ອັກຄະມະຫາ ເສນາບໍດີ ເຕໂຈ ຮຸນເຊັນ ນາຍົກລັດຖະມົນຕີແຫ່ງ ລາຊະອານາຈັກກຳປູເຈຍ ແລະ ພ້ອມດ້ວຍຄະນະ ໄດ້ເດີນທາງຢ້ຽມຢາມ ສປປ ລາວ ຢ່າງເປັນທາງການ ໂດຍຕອບສະຫນອງຕາມຄຳເຊີນຂອງພະນະທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ.  ຫຼັງຈາກການພົບປະສອງຝ່າຍຢ່າງເປັນທາງການແລ້ວ ຢູ່ທີ່ຫ້ອງວ່າການສຳນັກງານນາຍົກລັດຖະມົນຕີ ສອງນາຍົກລັດຖະມົນຕີໄດ້ເປັນກຽດເຂົ້າຮ່ວມເປັນສັກຂີພິຍານ ໃນພິທີລົງນາມ ເອກະສານບົດບັນທຶກຄວາມເຂົ້າໃຈ (MOU) ຂອງສັນຍາຊື້-ຂາຍໄຟຟ້າ ໃນລະດັບແຮງດັນ 230/500 kV ລະຫວ່າງສອງປະເທດເວົ້າລວມເວົ້າສະເພາະກໍ່ຄືລະຫວ່າງ ລັດວິສາຫະໄຟຟ້າລາວ (EDL) ແລະ ໄຟຟ້າກຳປູເຈຍ (EDC). ຝ່າຍ ສປປ ລາວ ຕ່າງໜ້າລົງນາມໂດຍທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ຝ່າຍລາຊະອານາຈັກກຳປູເຈຍ ຕ່າງໜ້າລົງນາມໂດຍທ່ານ KEO ROTTANAK ຜູ້ອໍານວຍການໃຫຍ່ ບໍລິສັດໄຟຟ້າກຳປູເຈຍ (EDC), ໂດຍຜ່ານຈຸດສາຍສົ່ງຈາກ ສະຖານີບ້ານຫາດ ແຂວງຈຳປາສັກ ຫາ ສະຖານີສະຕັງເຕັ່ງ (ລາຊະອານາຈັກກຳປູເຈຍ), ເປັນຈໍານວນ 195 MW ເຊິ່ງໄລຍະເວລາສັນຍາການຊື້-ຂາຍ ແມ່ນ 25 ປີ ແລະ ຈະເລີ່ມປ່ອຍກະແສໄຟຟ້າ ນັບແຕ່ປີ 2021 ເປັນຕົ້ນໄປ.