ພິທີສະເຫຼີມສະຫຼອງ “ສາຍສົ່ງ ສານສຳພັນ ພະລັງງານລາວ-ໄທ ຄົບຮອບ 50 ປີ”

15-12-2018.




            ໃນວັນທີ 14 ທັນວາ 2018 ນີ້, ຢູ່ທີ່ ຫໍປະຊູມແຫ່ງຊາດ, ນະຄອນຫຼວງວຽງຈັນ ໄດ້ມີພີທີສະເຫຼີມສະຫຼອງ “ສາຍສົ່ງ ສານສຳພັນ ພະລັງງານລາວ-ໄທ ຄົບຮອບ 50 ປີ” ຢ່າງເປັນທາງການ, ໂດຍການເຂົ້າຮ່ວມພິທີໃນຄັ້ງນີ້ໂດຍ ພະນະ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີ ແຫ່ງລາຊະອານາຈັກໄທ ເປັນປະທານໃນພິທີ, ມີລັດຖະມົນຕີກະຊວງພະລັງງານ ແລະ ບໍ່ແຮ່, ລັດຖະມົນຕີກະຊວງພະລັງງານໄທ, ມີຄະນະກົມ, ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະ, ຜູ້ວ່າການ ການໄຟຟ້າຝ່າຍຜະລິດ ແຫ່ງປະເທດໄທ ພ້ອມດ້ວຍການນໍາຂອງທັງສອງຝ່າຍ, ມີອາດີຜູ້ອຳນວຍການໄຟຟ້າລາວ-ໄທ ພ້ອມດ້ວຍພະນັກງານອາວຸໂສ ແລະ ແຂກທີ່ຖືກເຊີນເຂົ້າຮ່ວມ.ສປປ ລາວ ແລະ ຣາຊາອານາຈັກໄທ ໄດ້ລິເລີ່ມມີການພົວພັນຮ່ວມມືດ້ານພະລັງງານ ໂດຍເລີ່ມຈາກລັດຖະບານຂອງປະເທດໄທ ໃຫ້ການຊ່ວຍເຫລືອການກໍ່ສ້າງເຂື່ອນໄຟຟ້ານ້ຳງື່ມ1 ໂດຍການສະຫນັບສະຫນູນພະລັງງານໄຟຟ້າສຳຫລັບໃຊ້ເຂົ້າໃນການກໍ່ສ້າງ ຊຶ່ງ ສປປ ລາວ ຈະຄືນຜົນຕອບແທນເປັນຮູບແບບພະລັງງານໄຟຟ້າ ແລະ ການຂາຍໄຟຟ້າທີ່ເຫລືອໃຊ້ພາຍໃນປະເທດ ໃຫ້ກັບປະເທດໄທດ້ວຍລາຄາທີ່ເຫມາະສົມ. ຈາກນັ້ນກໍໍ່ໄດ້ລົງມືກໍ່ສ້າງສາຍສົ່ງແຮງສູງຈຸດທໍາອິດ ເຊື່ອມຕໍ່ຈາກ ນະຄອນຫຼວງວຽງຈັນ ຫາ ຈັງຫວັດ ໜອງຄາຍ ປະເທດໄທ ສໍາເລັດໃນ ເດືອນ ສິງຫາ ປີ 1968 ແລະ ໄດ້ມີພິທີເປີດສົ່ງພະລັງງານໄຟຟ້າຢ່າງເປັນທາງການ ໃນວັນທີ 16 ທັນວາ 1968 ໂດຍ ສົມເດັດພະເຈົ້າມະຫາຊີວິດ ສີສະຫວ່າງ ວັດທະນາ ແຫ່ງ ຣາຊອານາຈັກລາວ ແລະ ພະບາດສົມເດັດພະປະຣະມີນທອນມະຫາພູມີພົນອະດຸນຍະເດດ ບຣົມນາກບໍພິດ ລັຊການທີ 9 ແຫ່ງຣາຊອານາຈັກໄທ ໄດ້ຮ່ວມກັນກົດປຸ່ມເປີດສາຍສົ່ງໄຟຟ້າແຮງສູງຂ້າມແມ່ນ້ຳຂອງຈາກຝັ່ງໄທມາຫາຝັ່ງລາວ ທີ່ ແຂວງ ໜອງຄາຍ ກາງແມ່ນ້ຳຂອງນັບເປັນຈຸດເລີ່ມຕົ້ນຂອງການຮ່ວມ ມືດ້ານພະລັງງານໄຟຟ້າລະຫວ່າງປະເທດ.
      ໃນວາລະພິທີສະເຫລີມສະຫລອງຄົບຮອບ 50ປີ “ສາຍສົ່ງ ສານສຳພັນ ພະລັງງານລາວ-ໄທ” ຄັ້ງນີ້ ທັງ 2 ຝ່າຍໄດ້ລົງນາມສັນຍາສະບັບໃຫມ່ (MOU) ຊື້-ຂາຍພະລັງງານໄຟຟ້າຈາກເຂື່ອນໄຟຟ້ານໍ້າງື່ມ 1 ແລະ ສັນຍາຊື້-ຂາຍພະລັງງານໄຟຟ້າຈາກເຂື່ອນໄຟຟ້າເຊເສັດ ລະຫວ່າງ ລັດວິສາຫະກິດໄຟຟ້າລາວ (ຟຟລ) ໂດຍ ທ່ານ ບຸນອຸ້ມ ສີວັນເພັງ ຜູ້ອໍານວຍການໃຫຍ່ ແລະ ການໄຟຟ້າຝ່າຍຜະລິດ ແຫ່ງປະເທດໄທ ໂດຍ ທ່ານ ວິບູນ ເລີກສີລະໄທ ຜູ້ວ່າການໄຟຟ້າຝ່າຍຜະລິດແຫ່ງປະເທດໄທ (ກຟຜ) ອີກດ້ວຍ.
      50ປີ ຄວາມຮ່ວມມືດ້ານພະລັງງານໄຟຟ້າລະຫວ່າງ ສປປ ລາວ ແລະ ຣາຊອານາຈັກໄທ ຊ່ວຍສົ່ງເສີມໃຫ້ລະບົບໄຟຟ້າທັງສອງປະເທດມີຄວາມຫມັ້ນຄົງ ເປັນປັດໃຈສຳຄັນໃນການພັດທະນາເສດຖະກິດຂອງທັງສອງປະເທດ ແລະ ຈະສານຕໍ່ຄວາມມືໃນການເຊື່ອງໂຍງໂຄງຂ່າຍລະບົບໄຟຟ້າ ຂອງທັງສອງປະເທດເພື່ອພັດທະນາຕໍ່ຍອດໃຫ້ເກີດການເຊື່ອໂຍງເຄືອຂ່າຍລະບົບໄຟຟ້າອາຊຽນ ຊຶ່ງຈະຊ່ວຍສົ່ງເສີມເສດຖະກິດໃນທົ່ວພາກພື້ນໃຫ້ຈະເລີນກ້າວຫນ້າຢ່າງຢືນຍົງຕໍ່ໄປໃນອານາຄົດ.