ໂຄງການກໍ່ສ້າງສາຍສົ່ງ 230 kV ຫີນເຫີບ-ນໍ້າງື່ມ1-ນາບົງ ໄດ້ເປີດການນໍາໃຊ້ຢ່າງເປັນທາງການ

04-07-2018.




       ໃນວັນທີ 4 ກໍລະກົດ 2018 ຢູ່ທີ່ບ້ານ ແສງສະຫວ່າງ ເມືອງແກ້ວອຸດົມ ແຂວງວຽງຈັນ ໄດ້ມີພິທີເປີດ ແລະ ສະເຫຼີມສະຫລອງຜົນສຳເລັດການກໍ່ສ້າງ ສະຖານີ 230 kV ຂຶ້ນຢ່າງເປັນທາງການ ໂດຍມີການນໍາພັກລັດ ເຂົ້າຮ່ວມໃນພິທີ  ໂດຍການເປັນປະທານຂອງ  ພະນະທ່ານ ສອນໄຊ  ສີພັນດອນ  ກຳມະການກົມການເມືອງສູນກາງພັກ  ຮອງນາຍົກລັດຖະມົນຕີ  ຜູ້ລົງເລີກຊີ້ນຳວຽກງານຂົງເຂດເສດຖະກິດ - ການຜະລິດ, ທ່ານ ປອ ຄຳມະນີ  ອິນທິລາດ ກຳມະການສູນກາງພັກ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ  ບຸນປອນ ສີສຸລາດ ປະທານຄະນະກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ,  ທ່ານ ຫວາງ  ສີຮຸຍ ທູດເສດຖະກິດ ແລະ ການຄ້າ ສປ ຈີນ ປະຈໍາ ສປປ ລາວ, ທ່ານ ດວງສີ ພາຣະຍົກ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ມີອຳນາດການປົກຄອງຂັ້ນແຂວງ ແລະ ແຂກທີ່ຖືກເຊີນ ແລະ ຜູ້ຮັບເໝົ່າ ເຂົ້າຮ່ວມຢ່າງພ້ອມພຽງ.  ໂຄງການກໍ່ສ້າງສາຍສົ່ງ 230 ກິໂລໂວນ ຫີນເຫີບ-ນໍ້າງື່ມ1-ນາບົງ ໂຄງການໜຶ່ງທີ່ນອນໃນບູລິມະສິດຂອງລັດຖະບານ ກໍ່ຄືລັດວິສາຫະກິດໄຟຟ້າລາວ ເພື່ອການພັດທະນາລະບົບສາຍສົ່ງໄຟຟ້າ ເຊື່ອມໂຍງເຂົ້າດ້ວຍກັນ ລະຫວ່າງ ພາກເໜືອ, ພາກກາງ ແລະ ພາກໃຕ້. ຈຸດປະສົງ: ຂອງໂຄງການແມ່ນເພື່ອຮອງຮັບພະລັງງານໄຟຟ້າຈາກບັນດາເຂື່ອນ ພາກເໜືອ ແລະ ພາກກາງ  ໂດຍສະເພາະເຂື່ອນໄຟຟ້ານໍ້າງື່ມ1 ແລະ  ເຂື່ອນໄຟຟ້ານໍ້າງື່ມ1 ພາກຂະຫຍາຍຈັກເບີ 7-8 ເພື່ອສົ່ງມາຊົມໃຊ້ພາຍໃນ ແຂວງວຽງຈັນ ແລະ ນະຄອນຫຼວງວຽງຈັນ ໂດຍສະເພາະບັນດາເຂດເສດຖະກິດພິເສດ, ເຂດເສດຖະກິດສະເພາະ ແລະ ສູນການຄ້າຕ່າງໆທີ່ນະຄອນຫຼວງວຽງຈັນ ເຊື່ອມໂຍງກັນກັບລະບົບສາຍສົ່ງໄຟຟ້າພາກໃຕ້ ແລະ ຍັງຈະເຊື່ອມໂຍງກັບລະບົບສາຍສົ່ງຂອງປະເທດໃກ້ຄຽງທີ່ຈຸດສະຖານີ ນາບົງ ແລະ ສະຖານີ ດົງໂພສີ.