ພິທີເຊັນສັນຍາການຊໍາລະຄ່າໄຟຟ້າຜ່ານລະບົບທະນາຄານ ລະຫວ່າງ ລັດວິສາຫະກິດໄຟຟ້າລາວ (EDL) ກັບ ທະນາຄານ ຮ່ວມພັດທະນາ ຈໍາກັດ (JDB)

24-10-2019.




   ໃນວັນທີ 24 ຕຸລາ 2019 ທີ່ຫ້ອງປະຊຸມຊັ້ນ8 ສຳນັກງານໃຫຍ່ ໄດ້ມີພິທີເຊັນສັນຍາວ່າດ້ວຍການຊໍາລະຄ່າໄຟຟ້າຜ່ານລະບົບທະນາຄານ ລະຫວ່າງ ລັດວິສາຫະກິດໄຟຟ້າລາວ (EDL) ກັບ ທະນາຄານ ຮ່ວມພັດທະນາ ຈໍາກັດ (JDB) ໂດຍການເປັນປະທານຮ່ວມຂອງ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ ວິໄລ ສີພະພອນ ຜູ້ອຳນວຍການໃຫຍ່ ທະນາຄານ ຮ່ວມພັດທະນາມີບັນດາຄະນະຜູ້ອຳນວຍການໃຫຍ່, ຄະນະຝ່າຍ, ຄະນະຫ້ອງການ ອ້ອມຂ້າງລັດວິສາຫະກິດໄຟຟ້າລາວ ແລະ ທະນາຄານຮ່ວມພັດທະນາເຂົ້າຮ່ວມ. ພິທີໃນຄັ້ງນີ້ທັງສອງຝ່າຍໄດ້ຕົກລົງເຫັນດີເປັນເອກະພາບໃນການເປີດນໍາໃຊ້ບໍລິການຊໍາລະຄ່າກະແສໄຟຟ້າ ທຸກປະເພດລູກຄ້າ ຂອງ ລັດວິສາຫະກິດໄຟຟ້າລາວ ຜ່ານລະບົບຂອງ ທະນາຄານໃນຂອບເຂດທົ່ວປະເທດ ໂດຍຜ່ານປ່ອງບໍລິການ Counter Teller, Mobile Banking ຫຼື ສາມາດຊໍາລະຜ່ານຜະລິດຕະພັນການບໍລິການອີເລັກໂທນິກອື່ນໆ ຂອງ ທະນາຄານຮ່ວມພັດທະນາ  ເຊິ່ງໄລຍະເວລາຊອງສັນຍາ ແມ່ນມີກຳນົດທັງໝົດ 03 ປີ. ເຊິ່ງຈຸດປະສົງໃນການເຊັນສັນຍາໃນຄັ້ງນີ້ກໍ່ເພື່ອສ້າງຄວາມສະດວກສະບາຍໃຫ້ກັບບັນດາລູກຄ້າໃນການເພີ່ມຊ່ອງທາງເພື່ອຊໍາລະຄ່າກະແສໄຟຟ້າໃຫ້ໄດ້ຫຼາຍຂຶ້ນກວ່າເກົ່າ.