ກອງປະຊຸມສະຫຼຸບວຽກງານ 6 ເດືອນຕົ້ນປີ 2019 ແລະ ແຜນສູ້ຊົນ 6 ເດືອນທ້າຍປີ 2019

19-07-2019.




        ໃນວັນທີ 18 ກໍລະກົດ 2019 ຢູ່ທີ່ຫ້ອງປະຊຸມ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ມີກອງປະຊຸມສະຫຼຸບວຽກງານ 6 ເດືອນຕົ້ນປີ 2019 ແລະ ແຜນສູ້ຊົນ 6 ເດືອນທ້າຍປີ 2019, ໂດຍການເປັນປະທານຂອງ ທ່ານ ປອ ຄໍາມະນີ ອິນທິລາດ ລັດຖະມົນຕີ ກະຊວງພະລັງງານ ແລະ      ບໍ່ແຮ່, ມີທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະ, ຫົວໜ້າກົມ ຮອງກົມ ຄະນະຝ່າຍ, ຄະນະສາຂາ, ຄະນະຫ້ອງການ ແລະ ພະນັກງານ ວິຊາການເຂົ້າຮ່ວມ. ໃນກອງປະຊຸມ ທ່ານ ບຸນອູ້ມ   ສີວັນເພັງ ຜູ້ອຳນວຍການ ໃຫຍ່ລັດວິສາຫະກິດໄຟຟ້າລາວ ໄດ້ລາຍງານພາບລວມການຈັດຕັ້ງປະຕິບັດວຽກງານ 6 ເດືອນຜ່ານມາ ມີບາງຕອນທ່ານໄດ້ກ່າວວ່າ: ປະຈຸບັນໃນທົ່ວປະເທດມີແຫຼ່ງຜະລິດໄຟຟ້າມີ 69 ແຫ່ງ, ມີກຳລັງຕິດຕັ້ງ 7.525,69 ເມກາວັດ ປະກອບມີ: ມີ 25 ແຫ່ງ ຂອງ IPP ມີກຳລັງຕິດຕັ້ງ ທັງໜົດ 6.425,76 ເມກາວັດ, ໃນນັ້ນແມ່ນສະໜອງໃຫ້ໄຟຟ້າ ຈຳນວນ 1.959,79 ເມກາວັດ ສ່ວນທີ່ເຫຼືອ ຈຳນວນ 4.466 ເມກາວັດ ແມ່ນສົ່ງອອກຕ່າງປະເທດໂດຍກົງ, ມີ 23 ແຫ່ງ ເປັນຂອງ SPP ມີກຳລັງຕິດຕັ້ງ 179,40 ເມກາວັດ, ສະໜອງໄຟຟ້າໃຫ້ ໄຟຟ້າລາວ, 16 ແຫ່ງ ເປັນຂອງ ບໍລິສັດຜະລິດໄຟຟ້າລາວມະຫາຊົນ ມີກຳລັງຕິດຕັ້ງ 731 ເມກາວັດ, ສະໜອງໃຫ້ ໄຟຟ້າລາວ ແລະ 5 ແຫ່ງເປັນ ຂອງໄຟຟ້າລາວ ມີກຳລັງຕິດຕັ້ງ 189,50 ເມກາວັດ. ມີສະຖານີໄຟຟ້າແຮງສູງ 62 ແຫ່ງ, ມີລະບົບສາຍສົ່ງໄຟຟ້າແຮງສູງ 9 ພັນ ກວ່າ ກິໂລແມັດ, ແຮງກາງ 32 ພັນ ກວ່າກິໂລແມັດ, ແຮງຕໍ່າ 0,4 ກິໂລໂວນ ລວງຍາວທັງໜົດ 19 ພັນ ກວ່າກິໂລແມັດ, ໜໍ້ແປງລະບົບຈຳໜ່າຍ 30.574 ໜ່ວຍ ມີກໍາລັງຕິດຕັ້ງ 4.985,05 ເມກາໂວນອໍາເປ, ໜໍ້ນັບໄຟ ທີ່ຢຸ່ໃນການຄຸ້ມຄອງ ຂອງໄຟຟ້າລາວ ທັງໜົດ 1.451.478 ໜ່ວຍ,ສະເພາະພາຍໃນ 6 ເດືອນຕົ້ນປີ 2019 ສາມາດຈໍາໜ່າຍພະລັງງານໄຟຟ້າພາຍໃນປະເທດໄດ້ 2962,69 ກິໂລວັດໂມງ, ລວມເປັນເງິນ 2158,42 ຕື້ກີບ, ທຽບໃສ່ແຜນການ ໄດ້ 94 ກວ່າ ສ່ວນຮ້ອຍ, ສົ່ງພະລັງງານໄຟຟ້າຂາຍໃຫ້ຕ່າງປະເທດໄດ້ 921,96 ລ້ານກວ່າກິໂລວັດໂມງ ເປັນເງິນ 300 ກວ່າຕື້ກີບ ທຽບໃສ່ແຜນການ ສາມາດປະຕິບັດໄດ້ 98 ກວ່າສ່ວນຮ້ອຍ ແລະ ຂາຍໃຫ້ລູກຄ້າລາຍໃຫຍ່ (ບໍ່ຄໍາ ເຊໂປນ, ໂຮງງານຊີມັງທ່າແຂກ, ບໍ່ເຕັນ ແດນງາມ ແລະ ດອກງີ້ວຄຳ) 194,55 ກິໂລວັດໂມງ ລວມເປັນເງິນ 141,18 ຕື້ກີບ ທຽບໃສ່ແຜນການ ສາມາດປະຕິບັດໄດ້ 103,53 ກວ່າສ່ວນຮ້ອຍ. ໃນຕອນທ້າຍກອງປະຊຸມ ໄດ້ມີປະດັບຫຼຽນໄຊແຮງງານຊັ້ນ II  ຈຳນວນ 8 ທ່ານ, ຫຼຽນໄຊແຮງງານຊັ້ນ III ຈຳນວນ 7 ທ່ານ, ຫຼຽນການແຮງງານ 8 ທ່ານ ຂອງໂຄງການສາຍສົ່ງ 230 ກວ ຫີນເຫີບ-ນໍ້າງື່ມ1-ນາບົງ ອີກດ້ວຍ.