ລັດວິສາຫະກິດໄຟຟ້າລາວລາຍງານຜົນການດຳເນີນທຸລະກິດ ຂອງກອງປະຊຸມເປີດກວ້າງ ແຜນພັດທະນາ 5 ປີ ຄັ້ງທີ VIII ແລະ ທິດທາງແຜນການ 5 ປີ ຄັ້ງທີ IX ຂອງ ກະຊວງພະລັງງານ ແລະ ບໍ່ແຮ່

04-02-2020.




      ໃນລະຫວ່າງວັນທີ 4-5 ກຸມພາ 2020 ລັດວິສາຫະກິດໄຟຟ້າລາວ ໄດ້ເຂົ້າຮ່ວມກອງປະຊຸມເປີດກວ້າງ ການຈັດຕັ້ງປະຕິບັດແຜນພັດທະນາ 5ປີ ຄັ້ງທີ VIII ແລະ ທິດທາງແຜນການ 5ປີ ຄັ້ງທີ IX ຂອງກະຊວງພະລັງງານ ແລະ ບໍ່ແຮ່, ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່, ໂດຍມີບັນດາຮອງລັດຖະມົນຕີ ບັນດາກົມ ພະແນກການ ຄະນະພະແນກແຂວງຕ່າງໆ ແລະ ລັດວິສາຫະກິດໄຟຟ້າລາວ ນຳໂດຍ ທ່ານ ບຸນອູ້ມ ສີວັນເພັງ ຄະນະພັກກະຊວງ ພະລັງງານ ແລະ ບໍ່ແຮ່, ເລຂາຄະນະພັກຮາກຖານ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະໄດ້ເຂົ້າຮ່ວກອງປະຊຸມດັ່ງກ່າວ ພາຍໃນກອງປະຊຸມ ທ່ານ ບຸນອູ້ມ ສີວັນເພັງ ໄດ້ລາຍງານສະພາບການດຳເນີນທຸລະກິດຂອງລັດວິສາຫະກິດໄຟຟ້າລາວ, ເຊິ່ງມີເນື້ອໃນບາງຕອນທ່ານໄດ້ກ່າວວ່າອີງຕາມນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ຂອງລັດຖະບານ ກໍ່ຄື ການຊີ້ນຳຂອງກະຊວງພະລັງງານ ແລະ ບໍ່ແຮ່ ເປັນແຕ່ລະໄລຍະຜ່ານມາ, ຟຟລ ແມ່ນສາມາດຍາດໄດ້ຫຼາຍຜົນງານ ໂດຍສະເພາະແມ່ນການຄຸ້ມຄອງບໍລິຫານ ແລະ ການຈັດຕັ້ງປະຕິບັດບັນດາໂຄງການທີ່ໄດ້ຮັບມອບໝາຍໃຫ້ສຳເລັດຜົນຢ່າງເປັນຮູບປະທຳ ເຊັ່ນ: ການກໍ່ສ້າງແຫຼ່ງຜະລິດ, ສາຍສົ່ງ-ສະຖານີ ຕະລອດທັງການຂະຫຍາຍຕາຂ່າຍໄຟຟ້າ ໄປສູ່ເຂດຫ່າງໄກສອກຫຼີກ, ການບໍລິຫານຈັດການການຊື້-ຂາຍພະລັງງານໄຟຟ້າກັບບັນດາປະເທດໃກ້ຄຽງຢ່າງມີປະສິດທິພາບ ແລະ ຄຸ້ມຄອງບຳລຸງຮັກສາລະບົບໄຟຟ້າ ແລະ ເອົາໃຈໃສ່ຜັນຂະຫຍາຍ ຄຳສັ່ງເລກທີ 02/ ນຍ ເພື່ອຍົກລະດັບວຽກງານຂອດບໍລິການດ້ານໄຟຟ້າໃຫ້ດີຂຶ້ນ. ພ້ອມນັນກໍ່ຍັງໄດ້ຄົ້ນຄວ້າຊອກຫາແຫຼ່ງທຶນ ເພື່ອການພັດທະນາລະບົບໄຟຟ້າ ໃຫ້ສາມາດສືບຕໍ່ຂະຫຍາຍຕົວໄດ້ຢ່າງຕໍ່ເນື່ອງ, ເພື່ອພັດທະນາໃຫ້ໄດ້ຕາມເປົ້າໝາຍການດຳເນີນທຸລະກິດ ກໍ່ຍັງພົບກັບບັນຫາຫຍຸ້ງຍາກໃນຫຼາຍດ້ານ ແລະ ແກ່ຍາວ ບໍ່ວ່າຈະເປັນດ້ານເຕັກນິກ ແລະ ສັນຍາ ດ້ານການເງິນ ແລະ ດ້ານບຸກຄະລາກອນ, ເຊິ່ງ ຟຟລ ໄດ້ສະເໜີກ່ຽວກັບມາດຕະການແກ້ໄຂບັນຫາເບື້ອງມະຫາພາກຕໍ່ລັດຖະບານ ເພື່ອກຳນົດກົນໄກກະຕຸກຊຸກຍູ້ຊ່ວຍເຫຼືອສະສາງຂໍ້ຫຍຸ້ງຍາກ ເພື່ອໃຫ້ອີກ 5ປີໃນຕໍ່ໜ້າ ຟຟລ ຈະໄດ້ມີໃບໜ້າໃໝ່ ທີ່ສາມາດປະກອບສ່ວນຜົນງານໃນຂະແໜງພະລັງງານ ແລະ ປະກອບສ່ວນເຂົ້າໃນການພັດທະນາປະເທດຊາດ ໄດ້ຢ່າງເຕັມເມັດເຕັມໜ່ວຍ ເພື່ອບໍ່ໃຫ້ ຟຟລ ຂາດດຸນ ໃນການດຸ່ນດ່ຽງການຊື້-ຂາຍ ຢູ່ບົນພື້ນຖານການປະຢັດມັດທະຍັດ ພາຍໃຕ້ຄຳຂວັນ: ສະໜອງໄຟໃຫ້ພໍ ບໍລິການໄວ ດ້ວຍຄວາມປອດໄພ ຊົມໃຊ້ໃຫ້ເກີດຜົນ.