ສປປ ລາວ ໄດ້ສົ່ງພະລັງງານໄຟຟ້າ ໃຫ້ກັບ ລາຊະອານາຈັກ ກຳປູເຈຍ ຈຳນວນ 195 ເມກາວັດ

08-01-2020.



  ວັນທີ 6 ມັງກອນ 2020 ທີ່ຜ່ານມາ, ທ່ານ ປອ ຄຳມະນີ ອິນທິລາດ ລັດຖະມົນຕີ ກະຊວງພະລັງ ແລະ ບໍ່ແຮ່ ພ້ອມດ້ວຍຄະນະ ໄດ້ລົງຕິດຕາມຊຸກຍູ້ໂຄງການກໍ່ສ້າງສາຍສົ່ງ 500 ກວ (kV) ຈາກຈຸດບາຍພັສ Bypass (ຈຸດລັດຈາກໂຄງການເຂື່ອນໄຟຟ້າດອນສະໂຮງ) ໄປຫາຊາຍແດນລາວ-ກຳປູເຈຍ ພາຍຫຼັງໄດ້ກໍ່ສຳເລັດໃນວັນທີ 31/12/2019 ທີ່ຜ່ານມາ ແລະ ຕຽມຄວາມພ້ອມໃນການສົ່ງພະລັງງານໄຟຟ້າ ໄປຍັງປະເທດກຳປູເຈຍ ໃນວັນທີ 7/1/2020. ໂຄງການດັ່ງກ່າວແມ່ນເປັນໂຄງການທີ່ມີຄວາມໝາຍຄວາມສຳຄັນ ມີລັກສະນະຍຸດທະສາດ ຂອງທັງສອງປະເທດ ໃນການແລກປ່ຽນພະລັງງານໄຟຟ້າ ກໍ່ຄືການຈັດຕັ້ງປະຕິບັດ ສັນຍາ-ຂາຍໄຟຟ້າ ລະຫວ່າງສອງປະເທດ ກໍ່ຄື ລັດວິສາຫະກິດໄຟຟ້າລາວ ກັບ ໄຟຟ້າປະເທດກຳປູເຈຍ ທີ່ໄດ້ມີ ສັນຍາຊື້-ຂາຍໄຟຟ້າ ຈໍານວນ 2,900 MW, ໃນນັ້ນຝ່າຍກຳປູເຈຍ ຮັບຊື້ຈາກໂຄງການເຂື່ອນໄຟຟ້ານໍາ້ຕົກ ຈຳນວນ 500 MW ແລະ ຈາກໂຄງການໄຟຟ້າພະລັງງານຄວາມຮ້ອນຈາກຖ່ານຫີນ ຈານວນ 2.400 MW, ໃນວັນທີ 7 ມັງກອນ 2020 ທີ່ຜ່ານມາໄດ້ມີພິທີສົ່ງພະລັງງານໄຟຟ້າຈາກເຂື່ອນໄຟຟ້າດອນສະໂຮງ ທີ່ມີທີຕັ້ງຢູ່ ເມືອງໂຂງ ແຂວງຈໍາປາສັກ ຈຳນວນ 195 MW ໂດຍຜ່ານຈຸດເຊື່ອມຕໍ່ຂອງສາຍສົ່ງດ່ານສາກົນ ໜອງນົກຂຽນ ແຂວງຈໍາປາສັກ ສປປ ລາວ ແລະ ແຂວງຊຽງແຕຣັງ ລາຊະອານາຈັກກຳປູເຈຍ ແລະ ໃນການສົ່ງພະລັງງານໄຟຟ້າໃນຄັ້ງນີ້ ໃຫ້ກຽດເຂົ້າຮ່ວມເປີດໂດຍ ທ່ານ ດວງສີ ພາຣະຍົກ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ Mr. Praing Chulasa ຮອງຜູ້ອຳນວຍການໃຫຍ່ໄຟຟ້າກໍາປູເຈຍ, ຜູ້ອຳນວຍການບໍລິສັດໄຟຟ້າດອນສະໂຮງ ພ້ອມດ້ວຍພະນັກງານວິຊາການທັງສອງປະເທດ. ການສົ່ງພະລັງງານໃນຄັ້ງນີ້ເພື່ອບັນລຸຂໍ້ຕົກລົງວ່າດ້ວຍການຊື້-ຂາຍ ໃນເບື້ອງຕົ້ນລະຫວ່າງສອງປະເທດ. ຄາດວ່າຈະສົ່ງອອກໃຫ້ຄົບຕາມຈຳນວນສັນຍາ 2,900 MW ໃນໄລຍະແຕ່ປີ 2020 ຫາ 2027.