ກອງປະຊຸມເຜີຍແຜ່ວຽກງານວຽກງານປ້ອງກັນຄວາມສະຫງົບພາຍໃນ ກຳລັງປ້ອງກັນຕົວລັດວິສາຫະກິດໄຟຟ້າລາວ ຄັ້ງທີ I ປະຈໍາແຂວງພາກໃຕ້

10-10-2019.



ໃນວັນທີ 10 ຕຸລາ 2019 ຢູ່ທີ່ ຫ້ອງປະຊຸມສະໂມສອນເຂື່ອນໄຟຟ້າເຊເສັດ1 ເມືອງສາລະວັນ ແຂວງສາລະວັນ ໄດ້ເປີດກອງປະຊຸມເຜີຍແຜ່ ແລະ ຊີ້ນໍາວຽກງານປ້ອງກັນຄວາມສະຫງົບພາຍໃນ  ກຳລັງປ້ອງກັນຕົວຂອງ ລັດວິສາຫະກິດໄຟຟ້າລາວ ຄັ້ງທີ I ປະຈໍາແຂວງພາກໃຕ້  ຂຶ້ນ,  ໂດຍການເປັນປະທານຂອງ  ທ່ານ ພັອ ຄຳສົນ ທິບສົມພັນ ຮອງຫົວຫນ້າກົມການທະຫານທ້ອງຖິ່ນ ກະຊວງປ້ອງກັນປະເທດ,​ທ່ານ ພັທ ສຸວັນ ທອງຈະເລີນ ຫົວຫນ້າກົມຕໍາຫລວດສັນຕິບານ(ກົມ200)​ກະຊວງປ້ອງກັນຄວາມສະຫງົບ,​ ທ່ານ  ທອງຂັນ ພົມວິໄລ  ຫົວໜ້າ ກົມຈັດຕັ້ງ ແລະ  ພະນັກງານ,ຮອງຫົວໜ້າ ຄະນະປ້ອງກັນພາຍໃນກະຊວງ ແລະ ຄະນະພັກ ກະຊວງພະລັງງານແລະ ບໍ່ແຮ່, ທ່ານ ຄຳປະເສີດ ເທບປັນຍາ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ-ຄະນະບັນຊາກຳລັງປ້ອງກັນຕົວ ຟຟລ ມີຄະນະກຳລັງປ້ອງກັນຕົວໄຟຟ້າລາວ,​ ບັນດາໄຟຟ້າລາວສາຂາແຂວງ, ເຂື່ອນ, ຫ້ອງການຄຸ້ມຄອງລະບົບສົ່ງໄຟຟ້າພາກກາງ2 ແລະ ຫ້ອງການຄຸ້ມຄອງລະບົບສົ່ງໄຟຟ້າພາກໃຕ້ ເຂົ້າຮ່ວມທັງຫມົດ 40 ທ່ານ.​ ພາຍໃນກອງປະຊຸມ ທ່ານ ບຸນອ້ອມ ສໍທຳມະວົງ ຮອງຫົວຫນ້າຫ້ອງການປ້ອງກັນ ຟຟລ ໄດ້ຂຶ້ນກ່າວລາຍງານການກຳເນີດ ແລະ ການເຄື່ອນໄຫວວຽກງານໂດຍຫຍໍ້ໃນໄລຍະຜ່ານ ລວມມີຂໍ້ສະດວກ,​ ຂໍ້ຫຍຸ້ງຫຍາກ ແລະ ຂໍ້ສະເຫນີຕໍ່ກອງປະຊຸມ.​ ເຊິ່ງຈຸດປະສົງໃນການຈັດກອງປະຊຸມໃນຄັ້ງນີ້ກໍ່ເພື່ອໃຫ້ວຽກງານປ້ອງກັນຄວາມສະຫງົບມີຄວາມເຂັ້ມແຂງ,​ ຂະຫຍາຍຕົວໃນດ້ານວຽກງານສະເພາະ ແລະ ວຽກງານປ້ອງກັນຄຽງຄູ່ໄປພ້ອມກັນ.​ ຫລັງຈາກນັ້ນ ທ່ານ ພັອ ຄຳສົນ ທິບສົມພັນ  ຮອງຫົວໜ້າກົມທະຫານທ້ອງຖິ່ນກະຊວງປ້ອງກັນປະເທດ ກໍ່ໃຫ້ກຽດຂຶ້ນກ່າວເຜີຍແຜ່ ແລະ ຊີ້ນໍາວຽກງານຕໍ່ການຈັດຕັ້ງປະຕິບັດ,​ ຂັ້ນຕອນ, ການສືບຕໍ່ກວດກາອາວຸດ,​ ເນັ້ນຫນັກໃນການເອົາໃຈໃສ່ແລະ ເຫັນເຖິງຄວາມສຳຄັນຂອງວຽກງານປ້ອງກັນຄວາມສະຫງົບ.​ ນອກນັ້ນກໍ່ໄດ້ເປີດໂອກາດໃຫ້ບັນດາແຂກທີ່ເຂົ້າຮ່ວມແລກປ່ຽນຄຳຄິດເຫັນ, ແລະ ຂໍ້ຂ້ອງໃຈຕ່າງໆ.​ເຊິ່ງໃນຕອນທ້າຍຂອງກອງປະຊຸມ ທ່ານ ຄຳປະເສີດ ເທບປັນຍາ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ກໍ່ໄດ້ຂຶ້ນກ່າວຮັບຄຳໂອວາດ ແລະ ທິດຊີ້ນໍາ ເພື່ອສືບຕໍ່ ແລະ ຜັນຂະຫຍາຍວຽກງານປ້ອງກັນຄວາມສະຫງົບຂອງລັດວິສາຫະກິດໄຟຟ້າລາວໃຫ້ດີຂຶ້ນກວ່າເກົ່າ ແລະ ກອງປະຊຸມກໍ່ໄດ້ປິດລົງໃນວັນດຽວກັນ.​