ກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ຜ່ານແຜນສູ້ຊົນ 6 ເດືອນທ້າຍປີ 2020

07-07-2020.



ໃນລະຫວ່າງວັນທີ 6-7 ກໍລະກົດ 2020 ທີ່ຜ່ານມາຢູ່ທີ່ຫ້ອງປະຊຸມ ສຳນັກງານໃຫຍ່ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ມີກອງປະຊຸມສະຫຼຸບວຽກງານ 6 ເດືອນຕົ້ນປີ 2020 ແລະ ຜ່ານແຜນສູ້ຊົນ 6 ເດືອນທ້າຍປີ 2020, ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່, ມີຫົວໜ້າກົມ, ຮອງກົມ, ຄະນະອຳນວຍການ, ຄະນະຝ່າຍ, ຄະນະສາຂາ, ຄະນະຫ້ອງການ ແລະ ພະນັກງານ ວິຊາການເຂົ້າຮ່ວມ. ໃນກອງປະຊຸມ ທ່ານ ຈັນທະບູນ ສຸກອາລຸນ ຜູ້ວ່າການອຳນວຍການໃຫຍ່ ລັດວິສາຫະກິດໄຟຟ້າລາວ ໄດ້ຂື້ນລາຍງານພາບລວມການຈັດຕັ້ງປະຕິບັດວຽກງານ 6 ເດືອນຕົ້ນປີ 2020 ເປັນຕົ້ນ ການບໍລິການໄຟຟ້າ, ການຊື້-ຂາຍພະລັງງານໄຟຟ້າ, ການບໍາລຸງຮັກສາລະບົບຈຳໜ່າຍ, ການຂະຫຍາຍໄຟຟ້າລົງເຂດຊົນນະບົດ,ການບໍລິການ Call center ແລະ ຜັນຂະຫຍາຍຄໍາສັ່ງເລກທີ 02/ນຍ. ຫຼັງຈາກນັ້ນກອງປະຊຸມໄດ້ມີການປະດັບຫຼຽນໄຊແຮງງານຊັ້ນ II  ແລະ ຊັ້ນ III ຂອງໂຄງການສາຍສົ່ງ 230 ກວ, ແຕ່ເຂື່ອນໄຟຟ້ານໍ້າຊໍາ-ສະຖານີຫົວເມືອງ ແຂວງຫົວພັນ, ໂຄງການ GMS ພາກເໜືອ, ໂຄງກໍ່ສ້າງສາຍສົ່ງ-ສະຖານີ 115 ກວ ບຸນເໜືອ-ບຸນໃຕ້, ສາຍສົ່ງ 115 ກວ ໄຊຍະບູລີ-ປາກລາຍ-ແກ່ນທ້າວ, ໂຄງການສາຍສົ່ງ 115 ກວ ນໍ້າງຽບ1-ປາກຊັນ ແລະ ໂຄງການສາຍສົ່ງ 115 ກວ ຫ້ວຍຊາຍ-ສະຖານີຕົ້ນເຜີ້ງ. ໃນຕອນທ້າຍພິທີກໍ່ໄດ້ຮັບຟັງການໂອ້ລົມຂອງ ທ່ານ ປອ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ບາງຕອນທ່ານໄດ້ກ່າວວ່າ: ໃນ 6 ເດືອນຕົ້ນປີ ໂດຍສະເພາະໃນໄລຍະເວລາພະຍາດ COVID-19 ລະບາດ, ມີບາງໂຄງການ, ມີຫລາຍແຜນງານ, ຫລາຍໜ້າວຽກໄດ້ຖືຢຸດຊົວຄາວ, ຖືກໂຈະໄວ້, ໃຫ້ເອົາໃຈໃສ່ປັບປຸງລະບົບການບໍລິການ ໃຫ້ມີຄວາມວ່ອງໄວ ໂປ່ງໃສ ແລະ ໄດ້ມາດຕະຖານ,ເອົາໃຈໃສ່ປັບປຸງຂອດການປະສານສົມທົບຢູ່ພາຍໃນໃຫ້ໜັກແໜ້ນ ແລະ ເອົາໃຈໃສ່ວຽກງານການເມືອງ-ແນວຄິດໃຫ້ແຂງແຮງ, ໜັກແໜ້ນ ແລະ ເລິກເຊິ່ງກວ່າເກົ່າ ແລະ ກອງປະຊຸມກໍ່ອັດລົງດ້ວຍຜົນສຳເລັດ.