ກອງປະຊຸມ ການປັງປຸງຫົວໜ່ວຍໂຄງສ້າງລາຄາໄຟຟ້າໃໝ່ ພາຍໃນປະເທດ ຄັ້ງທີ II

16-08-2019.



        ໃນຕອນເຊົ້າຂອງວັນທີ 16 ສິງຫາ 2019 ທີ່ຫ້ອງປະຊຸມໃຫຍ່ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ຈັດກອງປະຊຸມ ປຶກສາຫາລື ແລະ ປະກອບຄຳຄິດເຫັນໃສ່ໂຄງປະກອບການປັງປຸງຫົວໜ່ວຍລາຄາໄຟຟ້າຄືນໃໝ່ ພາຍໃນປະເທດ ຄັ້ງທີ II ຂຶ້ນ ໂດຍການເປັນປະທານ ຂອງ ທ່ານ ທອງພັດ ອິນທະວົງ ຮອງລັດຖະມົນຕິ ກະຊວງພະລັງງານ ແລະ ບໍ່ແຮ່ ມີບັນດາຫ້ອງການກະຊວງ, ກົມນະໂຍບາຍ ແລະ ແຜນພະລັງງານ, ກົມແຜນການ ແລະ ການຮ່ວມມື, ກົມທຸລະກິດພະລັງງານ, ສະຖາບັນສົ່ງເສີມພະລັງງານທົດແທນ, ຫ້ອງການທີ່ຂຶ້ນກັບສຳນັກງານນາຍົກ ລັດຖະມົນຕີ ແລະ ລັດວິສາຫະກິດໄຟຟ້າລາວ ພ້ອມດ້ວຍຄະນະ ເຂົ້າຮ່ວມຈຳນວນ 20 ທ່ານ. ຈຸດປະສົງໃນການຈັດກອງປະຊຸມປຶກສາຫາລື ໃນຄັ້ງນີ້ກໍ່ເພື່ອປະຕິບັດຕາມທິດທາງນະໂຍບາຍຂອງ ພັກ ແລະ ລັດຖະບານ, ໂດຍສະເພາະແມ່ນແຜນພັດທະນາເສດຖະກິດ-ສັງຄົມແຫ່ງຊາດ ແນໃສ່ສົ່ງເສີມພາກກະສິກຳ, ອຸດສາຫະກຳການຜະລິດ ແລະ ການປຸງແຕ່ງສິນຄ້າໃຫ້ມີການຂະຫຍາຍຕົວຫຼາຍຂຶ້ນ, ເພື່ອເປັນການແກ້ໄຂສະພາບຄ່ອງ ທາງດ້ານການເງິນ ແລະ ການດຸນດ່ຽງໄຟຟ້າ. ຜ່ານມານະໂຍບາຍໂຄງສ້າງລາຄາໄຟຟ້າແມ່ນເນັ້ນໃສ່ສົ່ງເສີມເກື້ອກູນປະເພດທີ່ຢູ່ອາໄສແບບກວມລວມ ແລະ ພາກຊົນລະປະທານ, ເຊິ່ງສະຫຼຸບຜົນການປະຊຸມນະໂຍບາຍໃນຄັ້ງນີ້ແມ່ນແນໃສ່ເພື່ອຊຸກຍູ້ ການຜະລິດພາກກະສິກຳ, ອຸດສາຫະກຳປຸງແຕ່ງກະສິກຳ ທີ່ຕິດພັນກັບການຄໍ້າປະກັນສະບຽງອາຫານ ແລະ ຜະລິດເປັນສິນຄ້າເພື່ອກ້າວໄປສູ່ການຜະລິດເປັນຜະລິດຕະພັນ,ໃນການດໍາເນີນກອງປະຊຸມກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມ ໄດ້ມີໂອກາດສະແດງຄວາມຄິດເຫັນຕໍ່ກອງປະຊຸມອີກດ້ວຍ ແລະ ກອງປະຊຸມກໍ່ໃດ້ປິດລົງໃນວັນດຽວກັນ.