ລັດວິສາຫະກິດໄຟຟ້າລາວ ເຂົ້າຮ່ວມກອງປະຊຸມສະຫຼຸບຕີລາຄາ ຖອດຖອນບົດຮຽນໃນຂະແໜງພະລັງງານ ແລະ ບໍ່ແຮ່ ປະຈຳປີ 2018 ແລະ ໄຕມາດທີ I ປີ 2019

04-06-2019.



     ນະຄອນຫຼວງວຽງຈັນ, ໄດ້ມີການຈັດກອງປະຊຸມສະຫຼຸບຕີລາຄາ ຖອດຖອນບົດຮຽນໃນ  ຂະແໜງພະລັງງານ ແລະ   ບໍ່ແຮ່ ປະຈຳປີ 2018 ແລະ ໄຕມາດທີ I ປີ 2019 ໂດຍການເປັນປະທານຂອງ ທ່ານ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍຄະນະ, ໃຫ້ກຽດເຂົ້າຮ່ວມກອງປະຊຸມດັ່ງກ່າວມີຄະນະນຳຫ້ອງການສຳນັກງານນາຍົກ, ຄະນະນຳບັນດາກະຊວງ, ອົງການທຽບເທົ່າສູນກາງ, ບັນດາຄະນະນຳແຕ່ລະແຂວງ ເຂດພິເສດ ນະຄອນຫຼວງ ພ້ອມນັ້ນກໍ່ຍັງມີ ບັນດາຫ້ອງການ ບັນດາກົມ ສະຖາບັນ ລັດວິສາຫະກິດອ້ອມຂ້າງກະຊວງພະລັງງານ ແລະ ບໍ່ແຮ່ ທັງໝົດ 350 ທ່ານ, ເຊິ່ງ ລັດວິສາຫະກິດໄຟຟ້າລາວ ກໍ່ໄດ້ຮັບກຽດເຂົ້າຮ່ວມ ນຳໂດຍ ທ່ານ ບຸນອູ້ມ ສີວັນເພັງ ຄະນະພັກກະຊວງ ເລຂາຄະນະພັກຮາກຖານ ຟຟລ, ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍຄະນະ. ຈຸດປະສົງໃນການເຂົ້າຮ່ວມກອງປະຊຸມໃນຄັ້ງນີ້ກໍ່ເພື່ອປຶກສາຫາລື ແລະ ຖອດຖອນບົດຮຽນຂອງຂະແໜງພະລັງງານ ແລະ ບໍ່ແຮ່ ໂດຍສະເພາະແມ່ນຂົງເຂດວຽກງານໄຟຟ້າ, ໂດຍການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2016-2020) ໃນການຕອບສະໜອງພະລັງງານບົນພື້ນຖານແນວທາງການຫັນເປັນອຸດສາຫະກຳ ແລະ ທັນສະໄໝ, ໃນກອງປະຊຸມແມ່ນໄດ້ມີການນຳສະເໜີ ແລະ ແລກປ່ຽນຄວາມຄິດເຫັນກ່ຽວກັບການປັບປຸງທິດທາງໃນການແກ້ໄຂບັນຫາຕ່າງໆເພື່ອກະຕຸ້ນເສດຖະກິດພາຍໃນໃຫ້ມີຄວາມສົມດຸນທີ່ສຸດໃນຊ່ວງໄລຍະບຸກເບີກທີ່ມີຄວາມຫຍຸ້ງຍາກໃນຫຼາຍດ້ານນີ້ເພື່ອໃຫ້ບັນລຸເປົ້າໝາຍສົ່ງເສີມຜົນປະໂຫຍດລວມຂອງຊາດ. ໃນຕອນທ້າຍຂອງກອງປະຊຸມ ຍັງໄດ້ຮັບກຽດຮັບຟັງການໂອ້ລົມຈາກ ພະນະທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ, ເຊິ່ງເນື້ອໃນບາງຕອນທ່ານໄດ້ກ່າວວ່າ: “ພວກເຮົາມີພະລັງງານພາຍໃນປະເທດກໍຈິງ ແຕ່ກໍຍັງຖືວ່າຂາດແຄນ, ສະນັ້ນ ພວກເຮົາຕ້ອງຮີບຮ້ອນແກ້ໄຂບັນຫາ ໂດຍໃຫ້ເນັ້ນໜັກວຽກງານກວດກາ ໂດຍສະເພາະແມ່ນບັນດາໂຄງການຕ່າງໆໃຫ້ໄດ້ມາດຕະຖານສາກົນ ແລະ ໃຫ້ຖືເອົາຫຼັກການ ຄິດໃຫ້ກວ້າງ ເບິ່ງໃຫ້ໄກ ແລະ ໄປໃຫ້ຖືກທາງ” ພ້ອມນັ້ນທ່ານຍັງໄດ້ຊີ້ນຳແນວທາງໃນການແກ້ໄຂບັນຫາລຶບລ້າງຄວາມທຸກຍາກ ໃຫ້ກ້າວໄປສູ່ການພັດທະນາທີ່ມີປະສິດທິຜົນ ເພື່ອໃຫ້ປະຊາຊົນລາວມີຊີວິດການເປັນຢູ່ທີ່ດີຂຶ້ນ. ຫຼັງຈາກນັ້ນ ທ່ານ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ແລະ ບໍ່ແຮ່ ກໍ່ໄດ້ກ່າວຮັບຄຳໂອວາດ ແລະ ໄດ້ກ່າວປິດກອງປະຊຸມຢ່າງເປັນທາງການ.