ລັດວິສາຫະກິດໄຟຟ້າລາວ ເຂົ້າຮ່ວມງານເທດສະການອາຫານລາວ ປະຈໍາປີ 2020

28-01-2020.



ເພື່ອເປັນການສົ່ງເສີມອາຫານລາວໃຫ້ສັງຄົມໄດ້ຮັບຮູ້ ເຂົ້າໃຈຫຼາຍຂື້ນ, ໃນວັນທີ 28 ມັງກອນ 2020 ໄດ້ມີພິທີເປີດງານເທດສະການອາຫານລາວ ປະຈໍາປີ 2020 ຂື້ນຢ່າງເປັນທາງການ, ໂດຍການຮ່ວມມືຂອງ ສະມາຄົມນັກທຸລະກິດແມ່ຍິງລາວ ກັບ ສູນກາງສະຫະພັນແມ່ຍິງລາວ ຈັດຂື້ນຢູ່ທີ່ເດີນເຈົ້າອານຸວົງ ນະຄອນຫຼວງວຽງຈັນ, ງານເທດສະການອາຫານລາວ ແມ່ນໄດ້ຈັດຂື້ນທຸກໆປີ ເລີ່ມແຕ່ປີ 2006 ເປັນຕົ້ນມາ ເຊີ່ງປີນີ້ກໍ່ເປັນປີທີ 15 ແລະ ມີຮ້ານອາຫານເຂົ້າຮ່ວມ 190 ຮ້ານ, ຮ້ານອາຫານ (ເອກະລັກຈາກ 18 ແຂວງ )ແລະ ຈາກນະຄອນຫຼວງ 140 ຮ້ານ, ຮ້ານເຄື່ອງຫັດຖະກໍາ-ກະສິກໍາ 30 ຮ້ານ, ຈາກ 8 ສະຖານທູດ 05 ຮ້ານ  ແລະ ຮ້ານເຄື່ອງຜະລິດຕະພັນຈາກປະເທດໄທ 15 ຮ້ານ ຈຸດປະສົງຂອງງານກໍ່ເພື່ອເປັນການສົ່ງເສີມ ອານຸລັກຮີດຄອງປະເພນີ ແລະ ວັດທະນາທໍາຂອງຄົນລາວ ໄວ້ຄຽງຄູ່ກັບສັງຄົມລາວ ທັງເປັນການເຊື່ອມໂຍງ ເຜີຍແຜ່ສິ່ງທີ່ຍອດຍິ່ງຂອງຄົນລາວໃຫ້ສັງຄົມພາຍໃນ ແລະ ຕ່າງປະເທດໄດ້ຮັບຮູ້ ໂດຍສະເພາະຄົນຕ່າງປະເທດທີ່ມາເຮັດວຽກ ແລະ ທ່ອງທ່ຽວ ສປປລາວ ພ້ອມກັບສ້າງໂອກາດໃຫ້ກັບຜູ້ຜະລິດໄດ້ຂາຍຜະລິດຕະພັນ ໃນໂອກາດນີ້ ລັດວິສາຫະກິດໄຟຟ້າລາວ ກໍໄດ້ເຂົ້າຮ່ວມເອົາຜົນງານຫຼາຍດ້ານມາສະແດງເປັນຕົ້ນ: ການຊໍາລະຄ່າກະແສໄຟຟ້າເຄື່ອນທີ່, ການແນະນໍາການໃຊ້ໄຟຟ້າ, ການຫລີ້ນກິດຈະກຳ ແລະ ແຈກຂອງທີ່ລະນຶກຈາກໄຟຟ້າລາວ. ເຊິ່ງບູດໄດ້ເປີດໃຫ້ບໍລິການ ໃນລະຫວ່າງວັນທີ 28-31 ມັງກອນ 2020.