ພິທີລົງນາມເຊັນສັນຍາຊື້-ຂາຍ ພະລັງງານໄຟຟ້າ ລະຫວ່າງ ລັດວິສາຫະກິດໄຟຟ້າລາວ (ຟຟລ)​ ກັບ ການໄຟຟ້າຝ່າຍຜະລິດແຫ່ງປະເທດໄທ (ກຟຜ)

16-03-2019.



           ໃນວັນທີ 15 ມີນາ 2019, ໄດ້ມີພິທີລົງນາມເຊັນສັນຍາ ຊື້-ຂາຍ ພະລັງງານໄຟຟ້າ ລະຫວ່າງ ລັດວິສາຫະກິດໄຟຟ້າລາວ (ຟຟລ) ໂດຍ ທ່ານ ບຸນອູ້ມ ສີວັນເພັງ ຜູ້ອຳນວຍການໃຫຍ່ ຟຟລ ກັບ ການໄຟຟ້າຝ່າຍຜະລິດແຫ່ງປະເທດໄທ (ກຟຜ) ໂດຍ ທ່ານ ວິບູນ ເລີກສີຣະໄທ ຜູ້ວ່າການໄຟຟ້າຝ່າຍຜະລິດແຫ່ງປະເທດໄທ ຈຳນວນ 02 ໂຄງການຄື: ໂຄງການເຂື່ອນໄຟຟ້າເຊເສັດ ແລະ ໂຄງການເຂື່ອນໄຟຟ້ານໍ້າງື່ມ1 ເຊິ່ງຈັດຂື້ນຢູ່ທີ່ຈັງຫວັດ ນົນທະບູລີ ປະເທດໄທ ໂດຍໃຫ້ກຽດເປັນປະທານຂອງ ທ່ານ ປອ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແຫ່ງ ສ ປປ ລາວ ແລະ ທ່ານ ສິຣິ ຈິລະພົງພັນ ລັດຖະມົນຕີວ່າການກະຊວງພະລັງງານ ແຫ່ງ ລາດຊະອານາຈັກໄທ ໃນລະດັບແຮງດັນ 115 ກິໂລໂວນ ເຊິ່ງບໍ່ຈຳກັດປະລິມານພະລັງງານໄຟຟ້າ ໂດຍອີງຕາມປະລິມານຕົວຈິງຂອງແຕ່ລະຝ່າຍທີ່ສາມາດຜະລິດໄດ້ໃນແຕ່ລະຄັ້ງ, ມີໄລຍະສັນຍາປີ ຕໍ່ ປີ ແລະ ສາມາດຕໍ່ສັນຍາໄດ້ເມື່ອໝົດອາຍຸສັນຍາ. ເຊິ່ງທັງ 02 ໂຄງການມີຈຸດຮັບ-ສົ່ງຄື:ໂຄງການເຂື່ອນໄຟຟ້າເຊເສັດມີຈຸດຮັບສົ່ງພະລັງງານໄຟຟ້າ ຈຳນວນ 01 ຈຸດ ຢູ່ທີ່ ສະຖານີໄຟຟ້າສິຣິນທອນ ຫາ ສະຖານີໄຟຟ້າບັງເຢາະ ແລະ ໂຄງການເຂື່ອນໄຟຟ້ານໍ້າງື່ມ1 ມີຈຸດຮັບ-ສົ່ງພະລັງງານໄຟຟ້າ ຈຳນວນ 05 ຈຸດຄື: ສະຖານນີໄຟຟ້າໜອງຄາຍ -ສະຖານີໄຟຟ້າໂພນຕ້ອງ, ສະຖານນີໄຟຟ້າໜອງຄາຍ-ສະຖານີໄຟຟ້າທ່ານນາແລ້ງ, ສະຖານີໄຟຟ້າບຶງການ-ສະຖານີໄຟຟ້າປາກຊັນ, ສະຖານີໄຟຟ້ານະຄອນພະນົມ-ສະຖານີໄຟຟ້າທ່າແຂກ ແລະ ສະຖານີໄຟຟ້າມຸກດາຫານ-ສະຖານີໄຟຟ້າປາກບໍ່.