ການຮ່ວມມືດ້ານວິຊາການ ລະຫວ່າງ ລັດວິສາຫະກິດໄຟຟ້າລາວ ກັບ JEPIC

29-01-2019.



      ພິທີເປີດສໍາມະນາຮ່ວມລະຫວ່າງ ລັດວິສາຫະກິດໄຟຟ້າລາວ ແລະ JEPIC ໃນຫົວຂໍ້ Power system Analysis ຂື້ນຢ່າງເປັນທາງການ ໃນວັນ 29 ມັງກອນ 2019 ທີ່ສູນຝຶກອົບຮົມ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ໂກມົນຈັນ ເພັດອາສາ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ ໂນບູອາກິ ຊາໂຕ ຜູ້ອໍານວຍການຝ່າຍການຮ່ວມມືພະລັງງານນິວເຄຍ ມີຄະນະຝ່າຍ ຄະນະຫ້ອງການ ຊ່ຽວຊານຈາກບໍລິສັດ ເຈພາວເວີ ພ້ອມພະນັກງານ ວິຊາການເຂົ້າຮ່ວມ. ສປປລາວ ແລະ ປະເທດຢີ່ປຸ່ນ ແມ່ນມີສາຍພົວພັນຮ່ວມມືຊ່ວຍເຫຼືອເຊີ່ງກັນ ແລະ ກັນ ເປັນເວລາຍາວນານ ໂດຍສະເພາະ ລັດວິສາຫະກິດໄຟຟ້າລາວ ກັບອົງການ JEPIC ແຫ່ງປະເທດຢີ່ປຸ່ນ ໄດ້ພົວພັນ ຮ່ວມມືເປັນເວລາ 10 ກວ່າປີມາແລ້ວ ແລະ ມີການລົງນາມຢ່າງເປັນທາງການຄັ້ງຫຼ້າສຸດ ໃນວັນທີ 1 ເມສາ 2016 ໂດຍມີຈຸດປະສົງແນໃສຂອບການຮ່ວມືດ້ານການພັດທະນາຊັບພະຍາກອນມະນຸດ, ການບໍລິຫານ ແລະ ການຄຸ້ມຄອງຂອງຜູ້ສະໜອງພະລັງງານໄຟຟ້າ, ແຜນພັດທະນາພະລັງງານໄຟຟ້າ ແລະ ການບໍາລຸງຮັກສາອົງກອນຕ່າງໆ ທີ່ຮັບໃຊ້ການບໍລິຫານດ້ານພະລັງງານໄຟຟ້າໃຫ້ໝັ້ນຄົງ ຍືນຍົງ ແລະ ເປັນມິດກັບສີ່ງແວດລ້ອມ ນອກຈາກນັ້ນ ເພື່ອເປັນການຮອງຮັບກັບການຂະຫຍາຍໂຕ ການຜະລິດກະແສໄຟຟ້າ, ລະບົບສາຍສົ່ງ, ສະຖານີໄຟຟ້າ ແລະ ລະບົບຈໍາໜ່າຍໄຟຟ້າໄດ້ມີການເພີ່ມຂື້ນທຸກປີ ໂດຍສະເພາະລະບົບສາຍສົ່ງ ຖ້າໃນເມືອກ່ອນມີພຽງແຮງດັນ 22 ກິໂລໂວນ ແລະ 115 ກິໂລໂວນ ແຕ່ມາຮອດປະຈຸບັນໄດ້ມີການພັດທະນາຮອດ 230 ແລະ 500 ກິໂລໂວນ ເພື່ອເປັນການເຊື່ອມລະບົບໃຫ້ເຂົ້າກັບບັນດາປະເທດລຸ່ມແມ່ນໍ້າຂອງ ຫຼື ອາຊຽນ ໃນປະຈຸບັນກໍ່ຄືອານາຄົດ ດັ່ງນັ້ນ ວຽກງານການຄຸ້ມຄອງ ບັນຊາ ແລະ ການບໍາລຸງຮັກສາຈີ່ງຕ້ອງການບຸກຄະລາກອນຜູ້ມີຄວາມຮູ້ ແລະ ປະສົບການສູງ, ການສໍາມະນາໃນຄັ້ງນີ້ຈະໄດ້ດໍາເນີນໄປເປັນເວລາ 3 ວັນ ຈີ່ງຈະປິດລົງ.