ເລົ່າຂານຄວາມຫມັ້ນຄົງໄຟຟ້າ ລາວ-ໄທ 5 ທົດສະວັດ

05-12-2018.



ໃນວັນທີ 04 ທັນວາ 2018, ທ່ານ ດວງສີ ພາຣະຍົກ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ (ຟຟລ) ໄດ້ເຂົ້າຮ່ວມງານເສວະນາສື່ມວນຊົນພາກອີສານ “ເລົ່າຂານຄວາມຫມັ້ນຄົງໄຟຟ້າ ລາວ-ໄທ 5 ທົດສະວັດ” ໂດຍທ່ານ ເຣີງໄຊ ຄົງທອງ ຮອງຜູ້ວ່າການລະບົບສົ່ງ ການໄຟຟ້າຝ່າຍຜະລິດແຫ່ງປະເທດໄທ (ກຟຜ) ເປັນປະທານເປີດງານ, ມີ ທ່ານປຣີຊາ ພັນນິກູນ ຮອງປະທານຫໍການຄ້າ ແຂວງ ຂອນແກ່ນ ຮ່ວມເສວະນາ ແລະ ທ່ານ ຈະເລີນລັກ ເພັດປະດັບ ເປັນຜູ້ດຳເນີນລາຍການເທິງເວທີເສວະນາ ພ້ອມດ້ວຍນັກຂ່າວຈາກສື່ມ່ວນຊົນທຸກຂະແຫນງເຂົ້າຮ່ວມ ເພື່ອສົ່ງເສີມແລກປ່ຽນໃຫ້ສັງຄົມໄດ້ຮູ້ເຖິງຄວາມຫມັ້ນຄົງດ້ານພະລັງງານໄຟຟ້າລະຫວ່າງ ລາວ-ໄທ ທີ່ມີຄວາມສຳພັນມາຢ່າງຍາວນານເຖິງ 50 ປີ ທີ່ໂຮງແຮມ ພລູແມນ ຂອນແກ່ນ ຣາຊາອໍຄິດ.

ສປປ.ລາວ ມີຄວາມສຳພັນດ້ານພະລັງງານໄຟຟ້າກັບປະເທດໄທໂດຍເລີ່ມຈາກລັດຖະບານຂອງປະເທດໄທໃຫ້ການຊ່ວຍເຫລືອການກໍ່ສ້າງເຂື່ອນໄຟຟ້ານ້ຳງື່ມ1 ໂດຍການສະຫນັບສະຫນູນພະລັງງານໄຟຟ້າ ແລະ ປູນຊີມັງ ສໍາຫລັບໃຊ້ໃນການກໍ່ສ້າງ ໂດຍ ສປປ.ລາວ ຈະຄືນຜົນຕອບແທນເປັນຮູບແບບພະລັງງານໄຟຟ້າ ແລະ ການຂາຍໄຟຟ້າທີ່ເຫລືອໃຊ້ພາຍໃນປະເທດໃຫ້ກັບປະເທດໄທດ້ວຍລາຄາທີ່ເຫມາະສົມ, ຈາກນັ້ນວັນທີ 16 ທັນວາ 1968 ສົມເດັດພະເຈົ້າມະຫາຊີວິດ ສີສະຫວ່າງວັດທະນາ ແຫ່ງ ລາຊອານາຈັກລາວ ແລະ ພະບາດສົມເດັດພະປະຣະມີນທອນມະຫາພູມີພົນອະດຸນຍະເດດ ບຣົມນາກບໍພິດ ລັຊການທີ 9 ແຫ່ງຣາຊອານາຈັກໄທ ໄດ້ຮ່ວມກັນກົດປຸ່ມເປີດສາຍສົ່ງໄຟຟ້າແຮງສູງຂ້າມແມ່ນ້ຳຂອງຈາກຝັ່ງໄທໄປຝັ່ງລາວ ທີ່ ແຂວງ ຫນອງຄາຍ ກາງແມ່ນ້ຳຂອງ ນັບເປັນຈຸດເລີ່ມຕົ້ນຂອງການຮ່ວມມືດ້ານພະລັງງານໄຟຟ້າລະຫວ່າງປະເທດ ທີ່ຕໍ່ເນື່ອງຍາວນານມາເຖິງປະຈຸບັນ.

ນອກຈາກຄວາມສຳພັນຮ່ວມມື ດ້ານພະລັງງານໄຟຟ້າ ລະຫວ່າງ ລາວ-ໄທ ໃຫ້ມີລະບົບໄຟຟ້າທີ່ມີຄວາມຫມັ້ນຄົງແລ້ວ ທາງການໄຟຟ້າໄທ ຍັງໄດ້ສະຫນັບສະຫນູນດ້ານການພັດທະນາບຸກຄະລາກອນ, ໃຫ້ທຶນການສຶກສາລະດັບປະລິນຍາໂທ, ດ້ານການພັດທະນາເທັກໂນໂລຍີຮ່ວມກັນ, ດ້ານການກິລາ ແລະ ມີ MOU ຮ່ວມກັນໃນຫລາຍດ້ານອີກດ້ວຍ.