ພິທີເປີດການນໍາໃຊ້ ສາຍສົ່ງສະຖານີ 230 ກວ ທ່າວຽງ-ຫຼັກ20 ແລະ ສາຍສົ່ງສະຖານີ 115 ກວ ເຂື່ອນໄຟຟ້ານໍ້າໄຜ່ - ທົ່ງຄູນ2 ຢ່າງເປັນທາງການ.

14-09-2018.



              ສາຍສົ່ງ-ສະຖານີ 230 ກິໂລໂວນ ທ່າວຽງ-ຫຼັກຊາວ ແລະ ສາຍສົ່ງ-ສະຖານີ 115 ກິໂລໂວນ ເຂື່ອນໄຟຟ້ານໍ້າໄຜ່ ຫາ ສະຖານີໄຟຟ້າທົ່ງຄູນ2 ໄດ້ເປີດການນໍາໃຊ້ຢ່າງເປັນທາງການ, ໃນວັນທີ 14 ກັນຍາ 2018 ຢູ່ທີ່ສໍານັກງານໃຫຍ່ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ພະນະທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ສປປ ລາວ ມີ ທ່ານເອກອັກຄະລະສະທູດ ສປຈີນ ປະຈໍາລາວ, ທ່ານ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານເຈົ້າແຂວງແຂວງບໍລິຄໍາໄຊ, ຄະນະກົມ ຮອງກົມ, ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ບໍລິສັດຜູ້ຮັບເໝົາກໍ່ສ້າງ, ຫົວໜ້າໂຄງການ, ພະນັກງານ ກໍາມະກອນ ແລະ ແຂກທີ່ຖືກເຊີນເຂົ້າຮ່ວມ. ໂຄງການສາຍສົ່ງ-ສະຖານີ 230 ກິໂລໂວນ ທ່າວຽງ-ຫຼັກ 20 ເປັນໂຄງການພັດທະນາລະບົບສາຍສົ່ງໄຟຟ້າແຮງສູງລະດັບຊາດເພື່ອລໍາລຽງພະລັງງານໄຟຟ້າຈາກພາກເໜືອມາຮັບໃຊ້ພາກກາງແຂວງບໍລິຄໍາໄຊ ໂດຍສະເພາະໂຄງການຂຸດຄົ້ນແຮ່ຄໍາຢູ່ເມືອງຄໍາເກີດ ແຂວງບໍລິຄໍາໄຊ, ໜ້າວຽກໂຄງການປະກອບດ້ວຍ ກໍ່ສ້າງສາຍສົ່ງ 230 ກິໂລໂວນ ວົງຈອນຄູ່ ຈາກສະຖານີໄຟຟ້າທ່າວຽງ ຫາ ສະຖານີໄຟຟ້າຫຼັກ20 ມີຄວາມຍາວ 220 ກິໂລແມັດ ແລະ ສ້າງສະຖານີໄຟຟ້າ 230 ກິໂລໂວນ ໃໝ່ 1 ແຫ່ງ ແລະ ຂະຫຍາຍສະຖານີໄຟຟ້າ 230 ກິໂລໂວນ ທ່າວຽງ, ໂຄງການໄດ້ເລີ່ມການກໍ່ສ້າງໃນເດືອນ ມັງກອນ 2016 ແລະ ສໍາເລັດ ໃນເດືອນ ກໍລະກົດ 2017  ຮອດ ເດືອນກໍລະກົດ 2018 ຈີ່ງສາມາດເຊື່ອມໄຟຟ້າເຂົ້າກັບລະບົບຂອງລັດວິສາຫະກິດໄຟຟ້າລາວຢ່າງເປັນທາງການ ແລະ ໂຄງການສາຍສົ່ງ-ສະຖານີໄຟຟ້າ 115 ກິໂລໂວນ ເຂື່ອນໄຟຟ້ານໍ້າໄຜ່ ຫາ ສະຖານີໄຟຟ້າທົ່ງຄູນ2 ເປັນໂຄງການລະບົບສາຍສົ່ງທີ່ລໍາລຽງພະລັງງານໄຟຟ້າທີ່ຜະລິດໄດ້ຈາກເຂື່ອນໄຟຟ້ານໍ້າໄຜ່ເຂົ້າສູ້ລະບົບໄຟຟ້າຂອງ ລັດວິສາຫະກກິດໄຟຟ້າລາວ ເພື່ອສະໜອງໄຟຟ້າ ຮັບໃຊ້ໃຫ້ ແຂວງໄຊສົມບູນ ໂດຍກົງ ມີຄວາມຍາວ ຂອງສາຍສົ່ງ 45 ກິໂລແມັດ ໜ້າວຽກປະກອບດ້ວຍ ກໍ່ສ້າງສາຍສົ່ງ 115 ກິໂລໂວນ ວົງຈອນຄູ່ ແລະ ຂະຫຍາຍສະຖານີໄຟຟ້າທົ່ງຄູນ2  ເຊີ່ງເລີ່ມກໍ່ສ້າງມາແຕ່ເດືອນ ຕຸລາ 2015 ແລະ ສໍາເລັດ ໃນເດືອນ ມັງກອນ 2017 ຮອດປະຈຸບັນສາມາດປ່ອຍໄຟເຂົ້າລະບົບໄຟຟ້າລາວແລ້ວ ພາຍຫຼັງໂຄງດັ່ງກ່າວໄດ້ສໍາເລັດ ການສະໜອງພະລັງງານໃຫ້ກັບບັນດາແຂວງ, ເຂດອຸດສະຫະກໍາ ແລະ ຄວາມຕ້ອງການຂອງສັງຄົມກໍ່ຈະມີຄວາມໝັ້ນຄົງດ້ານພະລັງງານໄຟຟ້າ ເພື່ອປະກອບສ່ວນໃນການສ້າງສາ ແລະ ພັດທະນາ ສປປລາວ ໃນຍຸກໃໝ່.