ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ ຟຟລ ເຂົ້າຮ່ວມງານ CeBIT 2018 ທີ່ປະເທດ ເຢຍລະມັນ

29-06-2018.



       ເພື່ອເປັນການຍົກສູງການຮ່ວມມືຮອບດ້ານຂອງ 2 ອົງກອນ ໃຫ້ມີບາດກ້າວດີຂື້ນກວ່າເກົ່າ, ບໍລິສັດ ຫົວເຫວີຍ ເທັກໂນໂລຢີ (ລາວ)  ຈໍາກັດຜູ້ດຽວ ແລະ ລັດວິສາຫະກິດໄຟຟ້າລາວ ນໍາໂດຍ ທ່ານ ບຸນອູ້ມ ສີວັນເພັງ   ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍຄະນະ ເຂົ້າຮ່ວມງານສະແດງເຕັກນິກ ຂໍ້ມູນຂ່າວສານ ແລະ ການສື່ສານ CEBIT 2018  ທີ່ຈັດຂຶ້ນຢູ່ເມືອງ ຫັນໂນເວີ ປະເທດເຢຍລະມັນ (Hannover, Germany) ໃນລະຫວ່າງວັນທີ 12-15 ມິຖຸນາ 2018.

        ຈຸດປະສົງ: ໃນການເຂົ້າຮ່ວມງານໃນຄັ້ງນີ້ ກໍເພື່ອເປັນແລກປ່ຽນບົດຮຽນ ແລະ ປະສົບການລະຫວ່າງ ລັດວິສາຫະກິດໄຟຟ້າລາວ ກັບ ບໍລິສັດ ຫົວເຫວີຍ ເທັກໂນໂລຢີ (ລາວ)    ຈໍາກັດຜູ້ດຽວ, ເຊິ່ງໃນກອງປະຊຸມຍັງໄດ້ປຶກສາຫາລືກັນກ່ຽວກັບ ໝໍ້ນັບໄຟອັດສະລິຍະ (Smart Meter) ທີ່ທັນສະໄໝອີກດ້ວຍ ແລະ ທ່ຽວຊົມງານວ່າງສະແດງເທັກໂນໂລຢີ ທີ່ທັນສະໄໝລະດັບແຖວໜ້າຂອງໂລກອີກດ້ວຍ. ນອກນັ້ນ ຍັງໄດ້ຮັບການນໍາສະເໜີຜະລິດ   ຕະພັນໃຫມ່ລ່າສຸດ, ເທັກໂນໂລຢີ ຈາກ ບໍລິສັດ ຫົວເຫວີຍ ເຊັ່ນ: ລະບົບອິນເຕີເນັດລະຫວ່າງວັດຖຸສິ່ງຂອງ (IOT), Artificial Intelligence (AI), ລະບົບທະນາຄານແບບດີຈີຕ້ອນ, ການຄວບຄຸມໄຟຟ້າແບບອັດສະລິຍະ, ລະບົບຂົນສົ່ງແບບອັດສະລິຍະ ເຫຼົ່ານີ້ເປັນຕົ້ນ.

      ງານສະແດງເຕັກນິກຂໍ້ມູນຂ່າວສານ ແລະ ການສື່ສານ CEBIT, ເປັນງານສະແດງລະດັບສາກົນທີ່ໃຫຍ່ທີ່ສຸດໃນໂລກ ທາງດ້ານເຕັກນິກ ICT ໃນຂະແໜງອຸດສາຫະກຳຕ່າງໆ, ເຊິ່ງມີຈຸດກຳເນີດເລີ່ມຕົ້ນມາຈາກ ພາກຕາເວັນຕົກເອີລົບ ແລະ ໄດ້ແຜ່ຂະຫຍາຍອອກໄປທົ່ວໂລກ.