ລັດວິສາຫະກິດໄຟຟ້າລາວ ສາຂາ ແຂວງຄໍາມ່ວນ ສາມາດຍາດໄດ້ຜົນງານຫຼາຍດ້ານໃນ ປີ 2017.

27-02-2018.



        ໃນວັນທີ 24 ກຸມພາ 2018, ລັດວິສາຫະກິດໄຟຟ້າລາວ ສາຂາແຂວງຄໍາມ່ວນ ໄດ້ຈັດພິທີເປີດກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ  2017 ແລະ ວາງແຜນວຽກງານ ປີ 2018 ແລະ ພິທີມອບການຍ້ອງຍໍໃຫ້ບຸກຄົນ ແລະ ລວມໝູ່ ທີ່ມີຜົນງານດີເດັ່ນໃນການປະຕິບັດວຽກງານ ໃນໂຄງການຂະຫຍາຍໄຟຟ້າຊົນນະບົດ ໄລຍະ II, ໂດຍການເປັນປະທານຮ່ວມຂອງ ທ່ານ ປອ ຄຳມະນີ ອິນທິລາດ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ໂອໃດ ສຸດາພອນ ກຳມະການສູນກາງພັກ ເລຂາພັກແຂວງ ເຈົ້າແຂວງ ແຂວງຄຳມ່ວນ ມີທ່ານ ໂກມົນຈັນ ເພັດອາສາ ຮອງຄະນະພັກຮາກຖານ ຮອງຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ທັງເປັນຜູ້ອໍານວຍການໃຫຍ່ ບໍລິສັດ ນໍ້າງື່ມ 3 ພາວເວີ ຈໍາກັດ ພ້ອມດ້ວຍຄະນະຝ່າຍ, ຄະນະພະແນກ ແລະ ບັນດາອ້າຍເອື້ອຍນ້ອງພະນັກງານ ລັດວິສາຫະກິດໄຟຟ້າລາວ ສາຂາແຂວງຄໍາມ່ວນ ເຂົ້າຮ່ວມຢ່າງພ້ອມພຽງ. 

        ໃນພິທີ ທ່ານ ປອ ເພັດສະໝອນ ພອນວິໄລສັກ ຫົວໜ້າລັດວິສາຫະກິດໄຟຟ້າລາວ ສາຂາແຂວງຄໍາມ່ວນ ໄດ້ຂຶ້ນລາຍງານສະພາບລວມການຈັດຕັ້ງປະຕິບັດວຽກງານໃນຊຸມປີ 2017 ຜ່ານມາ ໂດຍບາງຕອນທ່ານໄດ້ກ່າວວ່າ:  ສໍາລັບວຽກງານການຜະລິດ ແລະ ຈໍາໜ່າຍພະລັງງານໄຟຟ້າພາຍໃນແຂວງແມ່ນ 202,34 ລ້ານ (Kwh), ສ້າງລາຍຮັບທັງໝົດ 129,97 ຕື້ກີບ ເທົ່າກັບ 110,62%,  ສ່ວນການປະຕິບັດພັນມອບອາການໃຫ້ລັດທັງໝົດ 13,24 ຕື້ກີບ ແລະ ການຊົມໃຊ້ໄຟຟ້າພາຍໃນເມືອງສາມາດປະຕິບັດໄດ້ 10 ເມືອງ ເທົ່າກັບ 100% ແລະ 94,33% ຂອງຄອບຄົວທັງໝົດພາຍໃນແຂວງແມ່ນໄດ້ຊົມໃຊ້ໄຟຟ້າຢ່າງຖາວອນ. ສໍາລັບທິດທາງ ແລະ ແຜນການຈັດຕັ້ງ ປີ 2018 ແມ່ນຈະຕ້ອງໄດ້ເພີ່ມທະວີ ແລະ ເອົາໃຈໃສ່ຢ່າງຕັ້ງໜ້າຕິດຕາມກວດກາລາຍຮັບ-ລາຍຈ່າຍ, ຊຸກຍູ້ສົ່ງເສີມເກັບກູ້ໜີ້ສິນຄ່າກະແສໄຟຕື່ມອີກ. ໂຄງການຂະຫຍາຍໄຟຟ້າຊົນນະບົດ ໄລຍະ II ແມ່ນໄດ້ເລີ່ມຕົ້ນມາແຕ່ປີ 2012 – 2016 ໄດ້ສໍາເລັດ 100 % ທີ່ນອນໃນ 9 ຕົວເມືອງ ລວມມີ 56 ບ້ານ ປະກອບມີ 4.205 ຫຼັງຄາເຮືອນ ທີ່ໄດ້ຊົມໃຊ້ໄຟຟ້າ. ດັ່ງນັ້ນ ຄຽງຄູ່ຕໍ່ໝາກຜົນສຳເລັດດັ່ງກ່າວ ພະນັກງານ ວິຊາການ ລັດວິສາຫະກິດໄຟຟ້າລາວ ສາຂາ ແຂວງຄໍາມ່ວນ 15 ສະຫາຍ ໄດ້ຮັບການຍ້ອງຍໍຂັ້ນລັດຖະບານ, 16 ສະຫາຍ ໄດ້ຮັບໃບຍ້ອງຍໍຂັ້ນກະຊວງ, ໂຄງການຂະຫຍາຍໄຟຟ້າຊົນນະບົດ 8 ສະຫາຍ ໄດ້ຮັບຫລຽນໄຊແຮງງານຊັ້ນ II ແລະ 01 ກົມກອງລວມໝູ່, 27 ສະຫາຍ ໄດ້ຮັບຫລຽນກາແຮງງານ, 33 ສະຫາຍໄດ້ຮັບ ໃບຍ້ອງຍໍລັດຖະບານ, 32 ສະຫາຍໄດ້ຮັບໃບຍ້ອງຍໍກະຊວງພະລັງງານ ແລະ ບໍ່ແຮ່ ລວມທັງໝົດ 159 ສະຫາຍ ແລະ 01 ກົມກອງ.