ພິທີປິດຊຸດຝຶກອົບຮົມທິດສະດີ ການເມືອງ-ການປົກຄອງ ໄລຍະສັ້ນ 45 ວັນ ຊຸດທີ XII

06-11-2019.



     ໃນວັນທີ 6 ພະຈິກ 2019, ຢູ່ທີ່ຕຶກສູນຝຶກອົບຮົມ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ, ໄດ້ມີພິທີປິດຊຸດຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນຊຸດທີ XII ຂື້ນຢ່າງເປັນທາງການ, ໂດຍມີ  ສະຫາຍ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກກະຊວງ ລັດຖະມົນຕີກະຊວງ ພະລັງງານ ແລະ ບໍ່ແຮ່, ສະຫາຍ ບຸນອູ້ມ ສີວັນເພັງ ເລຂາຄະນະພັກ ຮາກຖານ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍບັນດາສະຫາຍເລຂາໜ່ວຍພັກ 24 ໜ່ວຍພັກ ຕະຫຼອດເຖິງນັກຝຶກອົບຮົມທິດສະດີການເມືອງ-ການປົກຄອງ 64 ສະຫາຍ ເຂົ້າຮ່ວມ. 
     ໃນພິທີ ສະຫາຍ ໂສພອນ ສາຍຊົນຈະເລີນ  ຄະນະພັກຮາກຖານ ລັດວິສາຫະກິດໄຟຟ້າລາວ ຮອງຫົວໜ້າຮັບຜິດຊອບຊຸດຝຶກອົບຮົມທິດສະດີ ການເມືອງ-ການປົກຄອງ ໄລຍະສັ້ນ 45 ວັນ ຊຸດທີ XII ຂອງ ຟຟລ ປະຈຳປີ 2019 ສະຫາຍ ກໍໄດ້ຂຶ້ນຜ່ານບົດສະຫຼຸບໂດຍຫຍໍ້ໃນການເຄື່ອນໄຫວວຽກງານບັນດໍາເນີນຊຸດຝຶກອົບຮົມໃນຄັ້ງນີ້ ໂດຍສະຫາຍໄດ້ຍົກໃຫ້ເຫັນຜົນສໍາເລັດຫຼາຍດ້ານເປັນຕົ້ນ ສະມາຊິກທຸກສະຫາຍໄດ້ເອົາໃຈໃສ່ ຕັ້ງໃຈຝຶກຝົນຕົນເອງໄດ້ຕາມແຜນການເປັນຕົ້ນ 5 ພາກວິຊາຫຼັກຄື: ພາກວິຊາປັດຊະຍາ, ພາກວິຊາເສດຖະສາດການເມືອງ, ພາກວິຊາລັດທິສັງຄົມວິທະຍາສາດ, ພາກວິຊາບໍລິຫານສາດ ແລະ ພາກວິຊາກໍ່ສ້າງພັກ ລວມ 315 ຊົ່ວໂມງ ເພື່ອເປັນການຍົກລະດັບຄວາມຮູ້ດ້ານທິດສະດີ ການເມືອງ-ການປົກຄອງ ຂອງພັກໃນໄລຍະໃໝ່ ໃນການປັບປຸງທັດສະນະຫຼັກໝັ້ນ ຄຸນສົມບັດສິນທຳປະຕິວັດ ໃຫ້ກັບພະນັກງານຫຼັກແຫຼ່ງຂອງໄຟຟ້າລາວ. ຕອນທ້າຍຂອງພິທີ ສະຫາຍ ປອ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກກະຊວງ ລັດຖະມົນຕີກະຊວງ ພະລັງງານ ແລະ ບໍ່ແຮ່ ກໍ່ໄດ້ມີຄໍາເຫັນເພີ່ມໃນນັ້ນ ສະຫາຍໄດ້ເນັ້ນໜັກໃຫ້ກັບສະມາຊິກພັກທຸກສະຫາຍທີ່ຢູ່ໃນແຕ່ລະຂົງເຂດຂອງ ລັດວິສາຫະກິດໄຟຟ້າລາວ ຕ້ອງໄດ້ພ້ອມກັນຕັ້ງໜ້າຈັດຕັ້ງເສີມຂະຫຍາຍທາດແທ້ ມູນເຊື້ອຂອງພັກ ເພື່ອນຳໄປຈັດຕັ້ງເຂົ້າກັບວຽກງານວິຊາສະເພາະຂອງຕົນໃຫ້ເກີດຜົນປະໂຫຍດສູງສຸດ ແລະ ເປັນກໍາລັງແຮງປະກອບສ່ວນໃນການປົກປັກຮັກສາ ແລະ ສ້າງສາປະເທດຊາດ.